“Üç il əvvəl “Neftçi”dən təklif almışdım” – Mircavadov

“Üç il əvvəl “Neftçi”dən təklif almışdım” – Mircavadov
ÖLKƏ FUTBOLU 6 Mart 2023 / 12:30 3583
-  A +

Azərbaycanın ən titullu məşqçilərindən olan Ağasəlim Mircavadov artıq 12 ildir işsizdir. 2011-ci ildə “Xəzər Lənkəran”dan ayrılan 75 yaşlı mütəxəssis xeyli müddətdir ki, təklif almır. 

Bunu Azərbaycanın Əməkdar məşqçisi Qol.az-a açıqlamasında özü deyib. O, son bir neçə ildə yalnız “Neftçi”dən təklif aldığını bildirib: 

“Neçə ildir ki, təklif yoxdur. 3 il bundan qabaq “Neftçi” ilə söhbətimiz olmuşdu. Xalq yazıçısı Çingiz Abdullayevin “Neftçi”də Müşahidə Şurasının sədri olan vaxt idi. Dəvət elədilər, nəsə sonra alınmadı. Belə insanlar var də… Bizi tez yola saldılar. Yəni məni və mənim kimi məşqçiləri. Biz hələ futbolumuza xeyir verə bilərdik. Mən yenə də futbolla yaşayıram. Hər zaman futbolu izləyirəm. Məndən nə soruşsalar, fikirlərimi bildirirəm. Öyrənmək və öyrətmək heç vaxt gec deyil”. 

Mircavadov yaşının onun işləməyinə heç bir əngəl olmadığını, müasir futbolu, metodları da yaxşı bildiyini qeyd edib: “Mən çox vaxt İngiltərə Premyer Liqasına baxıram. Çünki orada yeniliklər həddindən artıq çoxdur. Demək olar ki, İngiltərə futbolu kökündən dəyişilib. 

Müasir deyəndə məgər 12 nəfərlə oynayırlar? Yoxsa indi künc zərbəsi, penalti, yaxud da başqa qaydalar dəyişib? Sadəcə olaraq sürət artıb, yeniliklər var. 4-4-2 sistemindən birdən-birə 3-4-3-ə keçirlər. Məşq prosesi dəyişilib. Daha da intensiv olub. Amma futbolun prinsipləri eynidir. 

Vallah, mən heç vaxt 60-cı illərin metodu ilə işləməmişəm. 1980-ci ildə Moskvada akademiyanı bitirəndən sonra yeni qaydalardan istifadə etməyə başladıq. “Neftçi”də də bunu tətbiq etmişəm. Futbolda əsas qaydalar var ki, heç vaxt dəyişmir. Mən hamısını detallı danışsam, ona vaxt çatmaz. Sağlıq olsun. Bu yaşımda Allah qismət eləsə, işləyərəm. Mən mömin adamam. Hər şey Allahın özündən asılıdır. Mən bu günümə şükür edirəm. Şükür ki, biz qalib ölkəyik. Bu, məni həddindən artıq çox sevindirir”.

Ramiq Ağaməmmədov

Daha çox


Son xəbərlər
topaz banner