"Onunla danışacaq səviyyədə deyiləm" - Regekampf

ÖLKƏ FUTBOLU 10 Fevral 2023 / 17:48 5608

- A +

"Oyunda ən neqativ hal hakimlik idi".

Qol.az xəbər verir ki, bunu “Neftçi”nin baş məşqçisi Laurentsiu Regekampf “Qəbələ" ilə qolsuz bərabərə qaldıqları Misli Premyer Liqasının 22-ci tur oyunundan sonra mətbuat konfransında deyib.

Rumıniyalı mütəxəssis qarşılaşmanın baş hakimi Fərid Hacıyevin idarəçiliyindən narazılığını bildirib: “Hakimlik haqda heç vaxt danışmıram. Oyundan sonra onunla aramızda dialoq olmasına çalışdım. Bəlkə də, onunla danışacaq səviyyədə deyiləm. Mənimlə dialoqa girmək istəmədi. İrad bildirdi ki, futbol oynamaq lazımdır. Cavabımda da dedim ki, futbol oynamağımız üçün imkan verməlisən. Hər dəqiqə matçı saxlayırdı, çoxlu səhvlər edirdi. Penalti qərarını verəndə heç epizodu görməmişdi. Hakim penaltini göstərdikdə ən azı 50 faiz qərarına əmin olmalıdır. Həmin epizoda görə bizi 4-5 dəqiqə saxladılar. Görüşün əsas vaxtına da cəmi 4 dəqiqə artırıldı. Həmin vaxtın da dəqiqə yarımında “Qəbələ”nin qapıçısı öz komanda yoldaşını vurdu, o da yerdə qaldı”.

"Neftçi"nin çalışdırıcısı qol imkanlarını dəyərləndirə bilmədiklərini söyləyib: “Yaratdığımız şanslara daha ciddi yanaşmalı və sadə oynamalıyıq. Belədə bizə daha yaxşı ola bilər. Hava şəraitinə görə meydança yaxşı vəziyyətdə idi. Ot bir az hündür idi, amma bunu normal hesab edirəm. Komandam futbol oynamağı xoşlayır. Futbolçular tez oynamaq istəyirlər. Bu cür şəriatdə belə hakimliklə oynamaq asan deyil. Hər iki komanda futbol göstərməyə çalışdı. Referinin epizodlarda lazımı yerdə olmadığını düşünürəm”.

Regekampf bildirib ki, komandası hücumda daha keyfiyyətli oynamalıdır: “Daha çox qol vurmalıyıq. Kifayət qədər də şanslarımız olur. Oyunçuların bacarığından söhbət getmir. Hər yaratdığımız şansı yüz faizli qol kimi yanaşmırıq. Topa sahib olma bizdə olur, matça nəzarət edirik. Ancaq sonda qol vurmalıyıq. Bu gün də ikinci hissədə 3-4 epizodda daha sadə və tez oynasaydıq, asanlıqla qola yaxınlaşardıq”.

48 yaşlı mütəxəssis əlavə edib ki, qarşılaşmaya hazırlıqlarının əsas taktikası rəqibi irəlidə sıxmaq idi: “İlk hissədə bunu bacardıq. Rəqib müdafiədən uzun ötürmə ilə çıxırdılar. Ancaq “Qəbələ”yə topu verdikdə təhlükəli olurdular. Bu gün bizim günümüz deyildi. Əminəm ki, bir qol vursaydıq, rəqib açıq oyuna keçəcəkdi və bizim üçün daha asan olacaqdı”.

O, transfer çalışmaları barədə də sualı cavablandırıb: “Mən oyunçu gətirən şəxs deyiləm. Komandanı məşq etdirmək üçün buradayam. Komandamızın skautları var, onlar bu yöndə çalışırlar. Onlar mənə hansısa yaxşı rumıniyalı futbolçunu təklif etsələr, niyə qəbul etməyim? Skautlarla bərabər oyunçunu mən seçirəm”.

Yeniliklərdən daha tez xəbər tutmaq üçün bizi Feysbukda da izləyin

Daha çox