Qurban Qurbanovun: “Rəşadın getməsinə mane olmarıq”

“Qarabağ”ın baş məşqçisi Qurban Qurbanov Premyer Liqanın 15-ci turunda “Neftçi”yə qarşı keçiriləcək oyunöncəsi Qol.Az saytının suallarını cavablandırıb

- “Neftçi” ilə oyuna hazırlıq necə gedir?

- Normal qaydada. Belə oyunlar nə qədər çox olsa, bir o qədər yaxşıdır. Maraqlı və yaxşı bir qarşılaşma olacaq. Hər iki komandanın öz oyun üslubu var. Biz bazar günü çempionatda və Avroliqada çox böyük təcrübəsi olan “Neftçi”yə qarşı oynayacağıq. Rəqibimizin hər bir futbolçusu yüksək potensiala malikdir. Yerli futbolçuları isə gənc olmasına baxmayaraq, kifayət qədər Avropa təcrübəsi qazanıblar. İstənilən halda bu oyun bizim üçün çox vacibdir.

- “Neftçi”də Nikolas Kanales və Vobay bu mövsüm xeyli qol vurub. Onların hazırda yüksək formada olması sizin üçün nə dərəcədə çətinlik yarada bilər?

- Biz “Neftçi”nin gücünə yaxşı bələdik. Futbolçularının nəyə qadir olduqlarından da xəbərimiz var. Onların bu çempionatda heç-heçəsi yoxdur. Keçirdikləri görüşlərdə ya qalib gəliblər, ya da məğlub olublar. Biz bilirik ki, Vobay və Flavinyo daim öz oyun üslublarını dəyişməyi bacaran futbolçulardır. Ona görə də “Qarabağ” həddindən artıq diqqətli olmalıdır. Bundan əlavə Rəşad Sadiqov kimi təcrübəli futbolçunun olduğunu da unutmaq lazım deyil. Mən xüsusilə  çempionatın bombardiri Kanalesi də vurğulamaq istərdim.

- Komandanızın belə bir vacib qarşılaşma öncəsi nə kimi problemləri var?
 
- Problem yoxdur. Sadəcə, bu gün Rəşad Sadıqov və Əfran İsmayılov tam olaraq formalarını bərpa edə bilməyiblər. Lakin onlar öz üzərlərində işləyirlər. Qalan futbolçularla hər şey öz qaydasındadır.
 
- Komandanızın bu oyunda məqsədi nədir?

- Bu oyuna biz qələbə qazanmaq üçün çıxacağıq.  Lakin mən hər iki komandanın şanslarını bərabər hesab edirəm. Çünki rəqibimiz də meydana üç xal üçün çıxacaq.

- Hazırda turnir cədvəlinin dördüncü pilləsində qərarlaşmısınız. Liderdən yalnız iki xal geri qalırsınız. Necə düşünürsünüz, qış fasiləsinə qədər ən azı öz mövqeyinizi qoruya biləcəksiniz?

- İndi bunu dəqiq demək çox çətindir.  Çünki  rəqiblərimizdən biri “Neftçi”nin ehtiyatda hələ üç oyunu var. Bundan əlavə AZAL və “Xəzər Lənkəran” da hərəyə bir oyun az keçiriblər. Ümumi götürsək, bəlkə də biz indi heç dördüncü pillədə də olmalı deyildik. Hazırda çempionatın oyunlarına proqnoz vermək çətindir. Bilinmir ki, hansı klubların oyununda hansı nəticə qeydə alınacaq. Proqnozlaşdırılmayan xal itkisi çox olur. Məhz bu amili nəzərə alaraq biz bütün oyunlarda maksimum güc sərf etməliyik ki, yaxşı nəticələr əldə edə bilək.

- Son günlər Türkiyə birinci liqasında yarışan “Dənizlispor”un komandanızın kapitanı Rəşad Sadıqovla maraqlanması haqda xəbərlərə yayılıb.

- Düzü, buna o qədər önəm vermədim.  Birincisi, Rəşada bu klub tərəfindən heç bir təklif gəlməyib.  Digər tərəfdən, səhv etmirəmsə, onları bizim Rəşadı yox, “Neftçi”dəki Rəşad Sadiqovu heyətlərinə qatmaq istəyirlər. Amma əgər futbolçuya təklif gəlirsə, bunu normal qarşılamaq lazımdır.

- Rəşad Sadıqov özü qeyd edib ki, Türkiyədə oynamaq istəyir. Onun bu fikrinə necə yanaşırsınız?

- Əgər futbolçu üçün sərfəli təklif gəlirsə, normal çempionat varsa, biz heç bir oyunçunun gedişinə mane olmarıq. Çünki başqa ölkədə çıxış edən yerli futbolçularımızın sayı həddindən artıq azdır.

Əli HƏYATİ