“Bu qərar mənim üçün müəmmalı qalır”

“Qəbələ” klubunun kapitanı Rəşad Abdullayevin Qol.Az saytına müsahibəsi

- Premyer Liqanın 14-cü turunda səfərdə “Rəvan”la qarşılaşdınız və 3:1 hesablı qələbə qazandınız.  Matç barədə fikirlərin necədir?

- Bu oyuna çox yaxşı köklənmişdik. Fikrimiz Bakıdan qələbəylə dönmək idi. İlk dövrədə “Rəvan” bizi məğlub etmişdi. Bu görüşdə revanş almalıydıq.  Həmçinin qələbələrimizin ardıcılığını davam etdirmək istəyirdik. Şükürlər olsun ki, bunu bacardıq. Matç istədiyimiz kimi başladı və tez bir zamanda hesabı açdıq. Düzdü, bir az sonra komandamız qapısında qol gördü. Bundan sonra oyunda gərginlik artdı.

- İlk qolunuz mübahisə yaratdı, “Rəvan”ın etirazına səbəb oldu. Həmin epizoda yaxın idin. Top qapı xəttini keçmişdi?

- O epizoda ən yaxın futbolçu mən idim. Zərbə anında topun qapı xəttini necə keçdiyini gördüm. Ona görə də rəqib müdafiəçi topu qapının içindən çıxaranda irəli qaçmadım. Lakin baş hakim meydanın mərkəzini göstərmədi. Sonra gördüm ki, yan hakim meydanın mərkəzinə tərəf qaçaraq qol olmasına işarə etdi. Mən isə bu olayı baş hakimin nəzərinə çatdırdım. Bundan sonra qol qeydə alındı. Mən tribunada oturanda da hər kəs topun qapı xəttinin keçdiyini söyləyirdi. Videoyazını izləyəndə də buna əmin oldum.
 
- Amma hesabı açdıqdan 11 dəqiqə sonra qapınızda cavab topu gördünüz. Deyəsən, sizdə bir az arxayınçılıq yaranmışdı.

- Xeyr, arxayınçılıqdan söz gedə bilməz. Bu, onların pressinq etməsi, hücumda çoxluq yaratmasıyla əlaqəli oldu. Çünki çox gərgin bir oyun idi. Sadəcə, həmin anda top onların futbolçusunun önünə düşdü. Bu futbolçuda fürsəti boşa vermədi.

- Komandanın ikinci qolunu 27-ci dəqiqədə cərimə zərbəsindən sən vurdun. Məsafə kifayət qədər uzaq idi.

- “Qəbələ”yə gəldikdən sonra azarkeşlər də mənim cərimə zərbələrimi görmək istədiklərini bildirmişdilər. Əslində düz deyirsiniz ki, bu dəfə məsafə mənim üçün çox olmuşdu. Hardasa 35 metrə yaxın idi. Mənim cərimə zərbələrindən qol vurduğum məsafələr 25-28 metr aralığında olurdu. Ancaq topa yaxınlaşanda hiss etdim ki, qol vuracağam. Çünki qapını  bu mövqedən yaxşı görürdüm. Düzdü, zərbə zamanı top rəqib futbolçuya toxundu. Bu da qol olmağa kömək etdi.

- 44-cü dəqiqədə qırmızı vərəqə aldın. Sən hakimi bu qərarıyla razısanmı?

- Mən rəqibin ayağına deyil,  sürüşmə fəndiylə topa oynamışdım. Hətta ayağım da topa dəydi. Sadəcə, həmin anda topla bərabər ayağa da toxunuş oldu. Ancaq bunu bilərəkdən etmədim. Mən gözləyirdim ki, hakim sarı vərəqə göstərsin. Qırmızı vərəqə alacağım heç ağlımdan da keçmirdi. Baş hakim heç bir vərəqə göstərmək fikrində deyildi. Yan hakim ona nə dedisə, qırmızı vərəqə göstərdi. Bu qərar mənim üçün müəmmalı qalır. Mən “Qəbələ”yə gəldikdən sonra hesabımda heç bir sarı vərəqəm yox idi. Çalışıram ki, hisslərimi cilovlayım. Ümumiyyətlə, mən intizamlı oynayan futbolçuyam. Heç bir zaman hakimlərlə mübahisəyə girməmişəm. Bu yaxınlarda Qəbələdə komandanın toplanışı zamanı hakimlərlə görüşümüz olmuşdu. Orda da vurğuladılar ki, Rəşadın davranışı xoşumuza gəlir. Lakin artıq olan olub. Hakimlərin qərarına hər zaman hörmətlə yanaşmışam.

- Qırmızı vərəqə aldıqdan sonra nə hisslər keçirdin. Məğlub ola biləcəyinizi düşündün?

- Komandanın fiziki durumu və  taktiki  gedişi  göstərdi ki, “Qəbələ” on nəfərlə də qalib gələ bilər.  Bəli, hardasa narahat olmuşdum. Çünki komanda belə vəziyyətdə heç-heçə və məğlub da ola bilərdi. Sağ olsun uşaqlar ki, ikinci yarıda əsl döyüşkənlik nümayiş etdirdilər.

Əli HƏYATİ