“Vaqif Sadıqovla aramızda nə soyuqluq ola bilər ki?”

“Turan”ın yeni baş məşqçisi Əfqan Talıbov Premyer Liqanın doqquzuncu turunda AZAL üzərindəki qələbədən (1:0) sonra Qol.Az-a müsahibə verib.

- “Turan”dakı ilk qələbəniz münasibətiylə sizi təbrik edirik. Nəticə sizin üçün gözlənilməz olmadı? Çünki çoxları AZAL-ı favorit sayırdı...

- Təbrik üçün çox sağ olun. İlk öncə onu deyim ki, Əsgər Abdullayevdən sonra bu komanda da işləmək o qədər çətin deyil. Çünki Əsgər müəllim elə gözəl kollektiv formalaşdırıb ki, yeni gələn məşqçi üçün də işləmək rahatdı. Bu mənada həmkarıma öz minnətdarlığımı bildirirəm. Biz də gələndən sonra komandanın daxilində çaxnaşma yaradan, nə bilim “maaş yoxdu”, “vəziyyət pisdir” deyib klub haqqında mənfi fikirlər formalaşdıran çürük fikirli bəzi insanları buradan uzaqlaşdırdıq. Konkret sualınıza gəlincə, bəli, təbii ki, gözlənilməz oldu. Çünki AZAL-ın heyətinə baxın görün, necə futbolçular oynayır. Rəqib çempionatın liderlərindəndir və bizi də məğlub etməklə liderlər qrupunda qalmağı hədəfləyirdi. Odur ki, planlaşdırırdıq ki, ilk hissədə qol vursaq, daha yaxşı olar. Meydançaya da iki hücumçu ilə çıxmışdıq. Açığını deyim, əgər oyuna bir hücumçu ilə çıxsaydıq, “batardıq”.

 
- İlk növbədə nəyin hesabına AZAL-a qalib gəldiniz?

- Əzmkar oyunun. Etiraf edim ki, bəxtimiz də gətirdi. Çünki rəqib üstün oynayırdı. Düzdür, AZAL-dan təzyiq gözləyirdik, amma bu dərəcədə də yox. 2-3 epizodda bəxtimiz gətirdi. Bir neçə epizodda isə Popoviç komandamızı real qoldan xilas etdi. Nildo, Benuahi, Veliçko kimi futbolçuların qabağını almaq heç də asan deyil. Yaxşı ki, bir epizodda Ender Günlü fürsəti boşa verməyərək, qol vurdu və qələbə qazandıq.

- Yeri gəlmişkən, bu oyunda Ender –Ballo cütlüyü çox yaxşı təsir bağışladı. Necə düşünürsünüz, onlar digər oyunlarda da rəqiblərinə başağrısı ola bilər?

- Niyə də yox? Bu futbolçular bir-birlərini çox yaxşı başa düşürlər, hər ikisi fransız dilini bildiyindən öz aralarında bu dildə danışırlar, bir otaqda qalırlar, bir yerdə yeyib-içirlər. Bu mənada, dediyim kimi meydançada da bir-birini gözüyumulu başa düşürlər.

- Çoxları matçı sizin üçün prinsipial hesab edirdi. Səbəb kimi Vaqif Sadıqovla bir vaxtlar aranızda yaranmış soyuq münasibət göstərilirdi...

- Yox, nə prinsipiallıq ola bilər ki? Prinsipiallıq var idi. Ancaq sırf idman prinsipiallığı idi. O istəyirdi ki, komandası qalib gəlib liderlər qrupunda qərarlaşsın, mən də istəyirdim ki, debüt matçımda üç xal götürüm. Soyuqluq söhbətinə gəlincə, xeyr, Vaqif Sadıqov mənim böyük qardaşımdı, onunla çiyin-çiyinə futbol oynamışam, mənim məşqçim də olub, aramızda nə soyuqlqu ola bilər?

- “Gənclərbirliyi”ndə işlədiyiniz dönəmi nəzərdə tutub bu fikri deyirlər...

- Xeyr, orada problem Vaqif müəllimlə bağlı deyildi, rəhbərliklə bağlı idi. Çünki elə vəziyyət yarandı ki, gördüm qalmağım mümkün deyil. Bildiyiniz kimi, həmin vaxt Vaqif müəllim “Gənclərbirliyində vitse-prezident postunda çalışırdı. Mən də özüm gedib ona demişdim ki, bu vəziyyətdə işləyə bilmərəm. Bununla da komandadan ayrılmışdım.

- Adətən yeni gələn məşqçilər özündən əvvəlki məşqçilər haqqında daha çox tənqidi fikirlər səsləndirirlər. Ancaq çox maraqlıdır ki, siz, Əsgər Abdullayevə təşəkkür edirsiniz...

- Bəli. Bayaq dediyim kimi, Əsgər müəllim doğrudan da elə mehriban kollektiv formalaşdırıb ki, ona ancaq təşəkkür etmək düşür. Mən özüm 15 ildi məşqçilik edirəm, hələ belə mehriban kollektiv görməmişəm. Çalışırıq ki, müəyyən çatışmazlıqları da biz aradan qaldıraq və bu işi davam etdirək.  Əsgər müəllimə də arzum budur ki, tezliklə yeni iş tapsın və fəaliyyətini davam etdirsin.

Anar XANLAROV