Franko Nildo: “Dedilər, Azərbaycanda yaxşı pul var, mən də gəldim”

AZAL klubunun brazilyalı hücumçusu Franko Nildonu cari Azərbaycan Premyer Liqasının tapıntısı da adlandırmaq olar. O, xüsusilə “Qarabağ”a 6:2 hesabı ilə qalib gəldikləri oyunda vurduğu dörd qolla yadda qalıb.

Nildo Qol.Az saytına müsahibəsində Azərbaycana gəlişinin tarixçəsindən, ölkəmizdə futbolu durumundan və s. danışır.



- AZAL-a transferin necə baş tutdu?

- Komandamızın baş məşqçisi Vaqif Sadıqov mənim oyunlarımın videoyazısını izləyib bəyənmişdi. Menecerimlə əlaqə saxlayıb dəvət etdi. Komandaya yaradılaş şərait və şərtlər məni qane etdiyindən razılıq AZAL-da oynamağa başladım.

- Bura gələnə qədər Azərbaycan haqda nə kimi məlumatın vardı?

- Düzü, heç bir məlumatım yox idi. Ancaq Polşa çempionatında çıxış etdiyim vaxtda orada vaxtilə Azərbaycan çempionatında çıxış etmiş dostlarımdan məlumat aldım. Onlar sizin ölkənizi və çempionatın səviyyəsinin yaxşı olduğunu, həmçinin futbolçulara yaxşı pul verildiyini bildirdilər. Ona görə dəvəti qəbul etdim.

- İlk gəldiyin vaxt Azərbaycan, Bakı barəsində təəssüratların necə oldu?

- Çox yaxşı ölkəniz var. Bakı da yaxşı şəhərdi, ancaq yollarınızda tıxacların çox olduğunu söyləyə bilərəm (gülür).

- Bəs insanlarımızın sənə münasibətlərindən razısan?

- Ölkənizə gəldiyim ilk gündən heç kimlə problemim olmayıb. Burada hər kəs mənimlə ünsiyyət qurmağa, çətinliyim olanda kömək etməyə çalışır. Burdan əvvəl yaşadığım Polşa ilə müqayisədə sizin insanlar yaxşı mənada çox fərqlidir. Polşalılar bir az irqçi xalqdır.

- Yeməklərimizə öyrəşə bilirsən?

- Bəzi yeməkləriniz Brazilya yeməklərinə çox oxşayır. Əsasən də düyü ilə olan yeməkləriniz. Ümumiyyətlə, mənim mətbəxlə bağlı  problemim yoxdur.

- Azərbaycan dilində sözləri başa düşürsən?

- Çox yox. Amma “necəsən”, “yaxşı”, “sağ ol” kimi rahat sözləri başa düşürəm. Sizin dilinizi öyrənməyi  çox istəyirəm. Polşada oynadığıma görə az da olsa rus dilini başa düşürəm. Komandamızda rus dilindən çox istifadə olunduğundan daha da çox öyrənirəm.

- Bizim çempionatda çıxış edən hansı futbolçularla dostluq edirsən?

- Öz komandamda Junior, “Qarabağ”dan Riçard Almeyda, həmçinin “Neftçi”də oynayan Brunno Bertuçi ilə yaxşı münasibətlərim var.
 
- Bakıda ailənlə birlikdə yaşayırsıan?

- Hazırda burada tək qalıram. Ancaq növbəti il ailəmi yanıma gətirəcəyəm.

- Deməli, ölkəmizdə hələ uzun müddət oynamaq fikrin var?

- Hazırda bu haqda heç bir söz deyə bilmərəm. Müqaviləm başa çatana kimi burdayam. Əgər sonra yenidən təklif olsa, niyə də Azərbaycanda qalmayım?

- Sənin Azərbaycan millisinə dəvət olunmağını istəyənlər də var. Belə bir təklif gəlsə, necə qarşılayarsan?

- Çox xoşbəxt olaram. Mənim zəhmətimi qiymətləndirib  buna layiq bilən insanlara minnətdarlğımı bildirirəm. Əslində Azərbaycan millisində oynamaq mənim üçün çox yaxşı olar. Brazilya yığmasında oynamaq şənsım demək olar ki, yoxdur. Mənim mövqeyimdə oynayan çox böyük futbolçular var. Brazilya yığmasına düşmək hər futbolçuya nəsib olmur. Ancaq mən bu haqda heç vaxt fikirləşməmişəm. İndi də fikirləşmirəm. Mənim tək fikirləşdiyim öz klubumdakı oyunumdur.

- Kumirin kimdir?

- Braziliyalı Ronaldo və fransalı Tyerri Anri

- Azərbaycan çempionatını Brazilyanın hansı seriyasıyla müqayisə edə bilərsən?

- Sözsüz ki, A seriyası Azərbaycan çempionatından çox yüksəkdi. Orda çox səviyyəli futbolçular çıxış edir. Azərbaycanda isə daha çox komanda oyununa üstünlük verilir. Ona görə fərdi keyfiyyətlərinə görə seçilən futbolçularə çox deyil. Bu mənada, Azərbaycan Premyer Liqasını Braziliyanın B seriyası ilə  eyni saymaq olar.

- Hazırda yeddi qolla çempionatımızda bombardirlər sırasındasan. Səni bu ilin tapıntısı sayanlar da var.

- Mən hücumçuyam, işim qol vurmaqdır. Özüm də daha çox qol vurmaq istiyirəm. Başqa komandalarda da yaxşı hücumçular oynayır. Hər gün öz üzərimdə işləyirəm. Çalışıram ki, daha yaxşı oyun nümayiş etdirim.

- Bombardirlik yarışında özünə daha çox hansı futbolçunu rəqib hesab edirsən?

- “Xəzər Lənkəran”dan Branimir Sübaşiç,  “Qəbələ”də Dodo, “Bakı”dan isə Parksı qeyd edə bilərəm.

- Növbəti turda “Turan”la səfər oyununuz var. Həmin görüş barəsində nə deyə bilərsən?

- Hazırda “Turan” turnir cədvəlində aşağı yerlərdədir. Amma buna baxmayaraq, yaxşı komandadır. Onlarla oynamaq bizə çətin olacaq. İlk dəqiqələrdən oyuna nəzarət edə bilsək, qalib gələrik.

                                                             
Şükür CAVAD