“Yerli futbolçuların “ölüsü” Ufuq Budağın “dirisindən” yaxşıdır

DÇ-2014"ün seçmə mərhələsi çərçivəsində bu gün Rusiyaya qarşı keçiriləcək oyun barəsində millimizin keçmiş futbolçusu, 2009-cu ilin 28 martında Moskvadakı oyunun (0:2) iştirakçısı olmuş Samir Abbasovun Qol.Az saytına müsahibəsi.

- Samir, bu gün keçiriləcək Rusiyaya qarşı oyun barəsində nə deyə bilərsən?

- Rusiya millisinin Portuqaliyayla oyununu televiziyadan canlı olaraq izlədim. Həmin oyunda ruslar yaxşı təsir bağışladılar. Daimi hərəkətdə olan cavan futbolçulardan təkil olunmuş heyətə malikdilər. Düzdür, Portuqaliyaya erkən qol vurduqdan sonra müdafiəyə çəkilib əks-hücum taktikasıyla oynadılar. Ancaq fikrimcə, millimizə qarşı başqa taktikayla oynayacaqlar.  Portuqaliya üzərindəki qələbə bizimlə oyun öncəsi onlara müsbət təsir edib. Görünür, ruslar qurupda birinci yer uğrunda mübarizə aparırlar. Çətin olacaq. Belə baxanda onsuz da bizim üçün bütün oyunlar çətindir. İnanmıram Rusiyaya qarşı Portuqaliyaya qarşı oynanılan taktikayla oynayaq. İnşallah, bu dəfə daha yaxşı oynayarıq, mən buna çox ümid edirəm.

- Millimizdə legionerləşdirmə siyasəti birmənalı qarşılanmır. Çoxları bunun əleyhinədir. Sənin bu barədə fikirlərini bilmək maraqlı olardı...

- Bilirsiniz bu gün yığmanın heyətində elə legionerlər var ki,  onlar həqiqətən komandamıza xeyir verəcək futbolçulardır. Amma elələri də var ki, millidə oynamağa layiq deyilər. Məsələn, götürək Ufuk Budaqı. Bu oyunçunu gah müdafiənin sol cinahında, gah da dayaq yarımmüdafiəçisi kimi oynadırlar. Bu oyunçu bir mövqedə oynaya bilirsə, nəyə lazımdı hər dəfə başqa mövqedə oynatmaq? Elə bir şahmat oynayır. Ondansa onun yerinə başqa bir yerli futbolçu daha çox xeyir verərdi. Həmin mövqedə çıxış edən yerli futbolçunun “ölüsü” Ufuq Budağın “dirisindən” yaxşıdır.

- Bu gün milli komandada hücumçü problemi olduğunu söyləmək olar?

- Millidə çıxış edən hücumçular heç də zəif deyillər. Mənə görə ən böyük problemimiz qol vura bilməməkdir. Siz hücumçulardan şikayətlənirsiniz, onlar da şikayətlənir ki, ötürmə verən yoxdur.

- Portuqaliyayla oyundan öncə jurnalistlərə açıqlamasında milli komandanın baş məşqçisi Berti Foqts demişdi ki, “bura qələbə qazanmağa deyil,  təcrübə toplamağa gəlmişik”. Bir baş məşqçinin, özü də milli komandanın çalışdırıcısının bu cür açıqlama verməsi nə dərəcədə düzgündür?

- Ola bilsin, Foqts reallığı nəzərə alıb o cür açıqlama verir. Düzdür, buna münasibətim yaxşı deyil. Belə baxanda,  nə istəyir qoy, desin. Millidə forma geyinən futbolçular peşəkardı və gərək bu cür sözlərin təsiri altına düşməyələr.

- Foqts açıqlamalarının birində belə fikir də səsləndirib ki,  qarşıya qoyulan əsas hədəf Avro 2016-ya vəsiqə qazanmaqdır. Səncə, bu heyətlə, bu oyunla bu, nə dərəcədə real görünür?

- Sən özün jurnalist olaraq, konkret heyətdən narazısan, yoxsa oyundan?

- Mənə daha çox təcrübəli futbolçu kimi sənin fikrin maraqlıdır...

- Əgər hər şeyə real yanaşırıqsa, xeyr, bunun baş verəcəyinə qətiyyən inanmıram.

- Qrupumuzda daha çox hansı komandalardan xal almağa ümid edə bilərik?

- Rusiya və Portuqaliyadan evdə xal ala bilərik. Digər komandalardan isə həm evdə, həm də səfər oyunlarında xal almaq gücündəyik. Təbii ki, yaxşı oynasaq.

- Elə isə, sənə görə, bu seçmə mərhələni neçə xalla başa vura bilərik?

- Məncə, ən azı 10-12 xal toplaya bilərik.

Şükür CAVAD