“Qarabağ”la oyun “Atletik” üçün həyati əhəmiyyət daşıyır” - İspaniya qəzeti

İspaniyanın nüfuzlu “Mundo Deportivo” nəşri UEFA Çempionlar Liqasının 3-cü turunda “Qarabağ”la oyun öncəsi “Atletik”ə yazı həsr edib. Oktyabrın 22-də Bilbao şəhərində keçiriləcək bu qarşılaşma Bakı vaxtı ilə saat 20:45-də başlanacaq.

QOL.az-ın xəbərinə görə, yazıda bildiirilir ki, “Atletik” milli komandaların oyunlarına görə yaranan fasilədən sonra həm La Liqada, həm də Avropada vacib oyunlara çıxacaq. Komanda bazar günü bu mövsümün sürpriz komandaları ilə qarşılaşacaq: La Liqada səfərdə “Elçe”nin qonağı olacaq, çərşənbə günü isə “San Mames”də Azərbaycan təmsilçisi “Qarabağ”la görüşəcək.

Qeyd edilir ki, “Malyorka” üzərində qazanılan qələbə “Atletik”də vəziyyəti bir qədər sabitləşdirsə də, indi yenidən gərgin təqvim başlayır. Ernesto Valverdenin komandası həm daxili çempionatda, həm də Çempionlar Liqasında inamlı nəticə üçün mübarizə aparacaq.

“Bilbaolular Avropa turnirinə uğursuz start veriblər – ilk iki oyundan sonra aktivlərində xal yoxdur. Bu səbəbdən “Qarabağ”la oyun komanda üçün həyati əhəmiyyət daşıyır. Uğursuz nəticə “Atletik”in “ilk 24-lük” şanslarını xeyli azaldacaq. Bununla belə, Valverdenin futbolçuları üçün bu, ev oyunudur və rəqib nisbətən zəif çempionat təmsilçisidir.

Azərbaycan klubu isə hazırda Çempionlar Liqasında möhtəşəm çıxış edir. Qurban Qurbanovun komandası iki turdan sonra maksimum – 6 xal toplayıb. “Qarabağ” ilk oyunda səfərdə “Benfika”nı 0:2 hesabı ilə geridə olduğu vəziyyətdə 3:2 məğlub edib, daha sonra isə evdə “Kopenhagen”ə 2:0 hesabı ilə qalib gəlib. Beləliklə, onlar pley-off mərhələsinə yüksəlmək yolunda böyük addım atıblar”.

Bildirilir ki, buna qədər “Atletik”i İspaniya çempionatında çətin səfər oyunu gözləyir. Yenidən La Liqaya yüksəlmiş “Elçe” baş məşqçi Eder Sarabianın rəhbərliyi altında gözəl oyun tərzi ilə diqqət çəkir. Komanda 13 xalla 7-ci yerdə qərarlaşıb və “Atletik”lə eyni xala malikdir. Fasilədən əvvəl “Elçe” “Alaves”ə uduzsa da, evdə keçirdiyi dörd oyunun üçündə qələbə qazanıb – “Levante” (2:0), “Real Oviedo” (1:0) və “Selta” (2:1).

“Malyorka” üzərində qələbə “Atletik”də psixoloji durumu yaxşılaşdırsa da, Valverde hələ də zədələr səbəbindən seçim baxımından məhdudiyyətlə üzləşir. Sanset, İnyaki Uilyams, Berenguer və Vesqa zədədən yeni qayıdıblar, Niko Uilyams və Paredes isə tam hazır deyil. Baş məşqçi fasilə dövründə yüklənməni tənzimləyib, lakin bu futbolçuların ardıcıl iki matçda oynaması ehtimalı azdır.

Milli komandalarla çıxış edən oyunçulardan yalnız qapıçı Unai Simon tam 180 dəqiqə oynayıb. Laporte cəmi 90, Vivian isə 19 dəqiqə meydanda olub”.

Qəzet diqqəti həm də ona çəkir ki, “Qarabağ” bu gün Azərbaycan Premyer Liqasında növbəti matçını keçirəcək. Komanda “Turan Tovuz”un qonağı olacaq. Bu səbəbdən onlar “San Mames”dəki oyuna “Atletik”dən təxminən 48 saat artıq hazırlıq vaxtına sahib olacaqlar.

Milli fasilədən sonra “Atletik”i sıx təqvim gözləyir. Komanda yeddi gün ərzində üç oyun keçirəcək: “Elçe” (19 oktyabr), “Qarabağ” (22 oktyabr) və “Getafe” (25 oktyabr). Növbəti matçlar isə “Real Sosyedad” (1 noyabr), “Nyukasl” (5 noyabr) və “Real Oviedo” (9 noyabr) ilə olacaq.