"Fiziki tərbiyə dərslərinin keyfiyyəti müəllimlərdən asılıdır"

"Fiziki tərbiyə dərslərinin keyfiyyəti müəllimlərdən asılıdır"
MEDİA 16 İyun 2024 / 16:24 1163
-  A +

Medianın İnkişafı Agentliyinin layihəsi: Uşaq və gənclərin fiziki və mənəvi inkişafı

Uşaqlar, yeniyetmələr və gənclər arasında idmanın təbliği ilə bağlı layihəmiz çərçivəsində budəfəki həmsöhbətimiz Bakı şəhər N.Nərimanov rayonu Məktəb-Lisey Komplesinin fiziki tərbiyə müəllimi Vasif Musayevdir.

V.Musayev əvvəlcə bildirib ki, fiziki tərbiyə fənninin keyfiyyətli tədris olunması müəllimlərin savadlılıq göstəricisindən asılıdır: "Ümumtəhsil məktəblərində tədris olunan fiziki tərbiyə dərslərinin keyfiyətinə təsir edən ilk amil fiziki tərbiyə müəlliminin savadlılığı və yaradıcı yanaşmasıdır. Bu amillərin inkişafı üçün Elm və Təshil Nazirliyi son 10 ildə bir neçə layihələr həyata keçirilmişdir".

O, bildirib ki, TOPs layihəsi çərçivəsində aparılan təlimlər və görülən işlər sayəsində müəllimlər daha da inkişaf ediblər: "Son 10 ildə Elm və Təhsil Nazirliyinin həyata keçirdiyi müxtəlif layihələr nəticəsində fiziki tərbiyə dərslərinin tədrisində çox müsbət dəyişikliklər baş verir.  Belə layihələrdən biri də “TOPs proqramı – fiziki tərbiyə sahəsində müasir təhsil texnologiyalarının yaradılması” layihəsidir. Layihəyə demək olar ki, respublikamızın bütün ümumtəhsil məktəblərinin fiziki tərbiyə müəllimləri cəlb olunub, nəzəri və praktiki təlimlər keçiblər. Məhz bu təlimlərdən sonra  fiziki tərbiyədə müasir tədris metodikasına yiyələnən müəllimlərimiz proqramlarında nəzərdə tutulan təlim nəticələrinin reallaşdırılmasına yönəlmiş tədris prosesini uşaqların maraq və ehtiyacları çərçivəsində ustalıqla tədris edirlər". 

A.Musayev müəllimlərin müxtəlif metodlardan istifadə edərək dərslərə rəng qatdığını söyləyib: "Hal-hazırkı fiziki tərbiyə dərsləri şən təhlükəsiz və hamı üçün əlçatan formada qurulur. Bu metodika imkan verir ki, onlar dərslərini yerli şəraiti nəzərə alaraq istənilən şəraitsizlikdə belə daha maraqlı və rəngarəng formada dərslər tədris etsinlər.  Bundan başqa, fiziki tərbiyə müəllimləri inklüziv tədris üsullarına yiyələnərək bütün uşaqların təlim ehtiyaclarını ödəyə bilirlər. Layihə çərçivəsində bütün siniflər üzrə hazırlanmış Metodiki Tədris Kartları da müəllimlərin köməyinə çatan vəsaitlərdəndir.  Artıq müəllimlərimiz əvvəlki eyni formalı dərs üsullarından fərqli olaraq, daha kreativ, bir-birilərindən fərqlənən çox gözəl dərs prosesləri təşkil edirlər".  

O, həmçinin şagirdlər üçün yarışların da təşkil edildiyini deyib: "Müasir dövrdə fiziki tərbiyə dərsləri uşaqların təkcə fiziki inkişafına təsir etməklə deyil, daha çox həyat bacarıqlarına yiyələnməni həyata keçirir desək, yanılmarıq. Bu layihə çərçivəsində təlimləri keçən müəllimlərimizin hamısı öz məktəblərində fiziki tərbiyədən açıq dərslər və idman bayramları təşkil edirlər. İdman bayramları isə kütləvi xarakter daşıdığından bura çoxlu uşaqlar cəlb olunurlar. Belə bayramlar zamanı hətta valideynlər də bu yarışlara qatılaraq uşaqlarala birlikdə öz bacarıqlarını nümayiş etdirirlər. Bu da öz növbəsində təhsil alan uşaqların fiziki tərbiyə dərslərinə olan maraqlarının artmasına imkan yaradır".

Həmsöhbətimiz bunu da qeyd edib ki, yarışlar və idman bayramları sayəsində istedadlı uşaqların üzə çıxır və idman bölmələrinə cəlb olunur: "Sağlam rəqabət, rəqibə hörmət, liderlik qabiliyyətinin yaranması və bir çox başqa dəyərlər üzərində qurulan dərslər, idman bayramları uşaqların müxtəlif idman növləri üzrə istedadlarının aşkarlanmasına gətirib çıxarır. Belə tədris zamanı həm də uşaqların idmana olan bağlılığı  artır, onlar da dərslərdən sonra müxtəlif idman bölmələrinə yazılaraq daha aktiv və sağlam həyat tərzi sürməyə üstünlük verirlər. Təcrübəli müəllmlər belə uşaqlarla və onların valideynləri ilə söhbətlər apararaq onların müvafiq idman növləri üzrə daha böyük nəticələr əldə edə biləcəklərini bildirir. Bir məqamı da vurğulamaq istəyirəm ki, həm tədris zamanı, həm də idman bayramları zamanı gender bərabərliyi də qorunmaqdadır. Qızların  idman növləri üzrə nəticələri oğlanlardan heç də geri qalmır".

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub

Daha çox


Son xəbərlər