“Qarabağ”la çempionluq uğrunda mübarizə aparmaq istəyirik" - Murad Musayev

ÖLKƏ FUTBOLU 1 Fevral 2023 / 17:30 3640

- A +

“Çətin oyun alındı. Komandalardan heç biri uduzmaq istəmirdi. Ona görə də fərdi mübarizələrin sayı çox idi. Şadam ki, 90 dəqiqə ərzində komandamız dayanmadı. Sona kimi mübarizə apardı və ikinci hissədə vurduğumuz qollarla vacib qələbə qazandıq”.

Qol.az xəbər verir ki, bu sözləri “Sabah”ın baş məşqçisi Murad Musayev Misli Premyer Liqasının 20-ci turunda “Qəbələ”ni məğlub etdikləri oyundan (3:0) sonra mətbuat konfransında deyib.

Rusiyalı mütəxəssis fasilədə iki dəyişiklik etməsinin səbəbini belə izah edib: “Fasilədə Elvin Camalovla Amin Seydiyevi əvəzlədik. Onların ikinci sarı vərəqə almaq təhlükəsi var idi. Yəni əvəzetmələr oyunları ilə bağlı deyil”.

Musayev zədədən qayıdan Namik Ələskərov və Zurab Oçiqava haqda da danışıb: “Zurab yarım il meydandan kənarda qaldı. Antalyadakı hazırlıq oyunlarında da forma geyinmədi. Komanda ilə birgə məşq edir. Zamanla ona da şans verəcəyik. Çünki Zurab bizim üçün vacib futbolçudur. Düşünürəm ki, tezliklə 100 faiz hazır olacaq. Amma komandamızda mərkəz müdafiəçisi mövqeyində rəqabətin güclü olduğunu da unutmamalıyıq. Namik Ələskərov da dekabrda əməliyyat olunmuşdu. Antalyadakı yoldaşlıq görüşlərdində o da meydana çıxmadı. Baxmayaraq ki, Zurabla müqayisədə Namikin zədəsi ciddi deyildi. Son günlər addım-addım formasını bərpa edir”.

“Sabah”ın çalışdırıcısı turnir cədvəlində üçüncü pillədə olan “Neftçi”dən uzaqlaşmaları və əsas rəqiblərinin “Qarabağ” olması barədə sualı belə cavablandırıb: “20 turdur eyni sualı eşidirəm, eyni cür də cavab verirəm. Başa düşürəm, jurnalistlər çempionatda intriqa olmasında maraqlıdırlar. Lakin unutmayaq ki, “Sabah” yeni, “Qarabağ” isə çox təcrübəli komandadır. Əla transferlər edirlər, əla oyun göstərirlər. Üstəlik, bizdən 7 xal da irəlidədirlər. Biz hər oyundan oyuna daha yaxşı çıxış etməyə çalışırıq. “Neftçi” də yaxşı transferlər edib. Əminəm ki, onların da çıxışı yaxşılaşacaq”.

Murad Musayev məqsədlərinin avrokuboklara vəsiqə qazanmaq olduğunu söyləyib: “Bizim məqsədimiz mövsümün sonunda avrokuboklara vəsiqə əldə etməkdir. Bəli, yekunda hazırkı mövqedə olmağımızı istərdik. Lakin qarşıda hələ 16 tur var. Ona görə də arxayınlaşmaq olmaz”.

“İctimaiyyətin “Sabah”ı çempionluq uğrunda mübarizədə “Qarabağ”a rəqib görməsinin nəyi pisdir ki” sualını mütəxəssis belə cavablandırıb: “Mənim üçün bu sözləri eşitmək xoşdur. Bunda pis nəsə yoxdur. Lakin siz hər oyundan sonra mənə eyni sualı verirsiniz. Biz hər oyunda qələbə qazanmaq, avrokuboklara vəsiqə qazanmaq, “Qarabağ”la çempionluq uğrunda mübarizə aparmaq istəyirik. Bunu danmıram. Ancaq reallıq var. İndiki məqamda biz daha yaxşı işləməliyik. Futbolda hər şey tez dəyişir. “Qarabağ”la mübarizə aparmaq üçün üzərimizə düşən hər şeyi edəcəyik. Amma yalandan söz verməyim düz deyil”.

Daha çox