"Yunanıstanda oynamaq rahat olacaq" – Rəşad Sadiqov

"Qəbələ"nin yarımmüdafiəçisi Rəşad Sadiqov Avropa Liqasının pley-off mərhələsinin "Panatinaikos"la ilk oyunundan (0:0) sonra Qol.Az saytına müsahibə verib

- “Panatinaikos” kimi rəqiblə qolsuz heç-heçə sizi üçün necə nəticədir?

- Düşünürəm ki, başabaş mübarizə apardıq. Qol epizodlarımız da oldu, hətta qələbə qazana bilərdik. Qolsuz heç-heçəni də pis nəticə hesab etmirəm. Doğma meydanda qol buraxmadıq. Çalışacağıq səfərdəki oyunla mərhələni keçə bilək.

- Məğlub olmasanız da, “Qəbələ” komandanız elə də yaxşı təsir bağışlamadı.

- Düzdür, matçın sonlarına yaxın yorğunluq var idi. Amma ümumi götürdükdə, şanslarımız az deyildi. Bu cür təcrübəli, güclü rəqiblə oyunda 3-4 real qol epizodu yaratmaq asan deyil. Sadəcə, əlimizə düşən imkanlardan yararlana bilmədik.

- Cavid Hüseynovun yoxluğu yarımmüdafiə xəttində işinizi çətinləşdirirdi?

- Onun yoxluğu tək mənim yox, komandanın oyununu çətinləşdirirdi. Çünki Cavid topla oynamağı sevir, hər an təhlükəli hücumlar yaradırdı. Cavidin yoxluğu istər-istəməz komandanın oyununa təsir etdi.

- Artıq rəqibi daha yaxşı tanıdınız. Cavab oyununa hansı ümidlə yollanacaqsınız?

- Çalışacağıq ki, yaxşı nəticə qazanaq və Avropa Liqasının qrupuna düşək. Bunun üçün də əlimizdən gələni edəcəyik.

- Rəqibin əksər oyunçuları hündürboyludurlar. Bu amil hava mübarizələri zamanı çətinlik yaradırdımı?

- Belə hallaraq öyrəşmişik. "Çukariçki"nın futbolçuları bunlardan daha hündürboy idilər. Sadəcə, "Panatinaikos"un futbolçularının üstün tərəfi  topla daha yaxşı rəftar etmələri idi. Onsuz da Avropada hamı bizdən hündürboyludur. Oynamağa məcburuq.

- Oyundan sonra rəhbərlik futbolçularla görüşdü?

- Adətən rəhbərlik cavab matçından sonra paltardəyişmə otağına gəlir və futbolçularla görüşür. 

- Deyilənə görə, mərhələ keçəcəyiniz halda rəhbərlik komandaya 500 min mükafat vəd edib. Doğrudurmu?

- Xeyr. Bu haqda biz heç nə bilmirik. Çünki rəhbərlik oyundan əvvəl mükafatın məbləğini demir. Mərhələ adladıqdan sonra bu rəqəmi açıqlayırlar. İndiki halda yazılanlar həqiqətə uyğun deyil.

- Avqustun 23-də Azərbaycan Premyer Liqasında da matçınız var. Belə sıx qrafiklə  oynamaq çətinlik yaratmır?

- Avropada bütün klublar 2-3 gündən bir oynayır. Biz də inkişaf etmək üçün bu qrafiqə uyğunlaşmalıyıq.
 
- "Panatinaikos"un adı, tarixi var. “Qəbələ”nin futbolçuları belə bir rəqibi keçəcəyinə inanırmı?

- Komanda yoldaşlarımda qələbəyə inam var. İlk oyunda da inanaraq mübarizə apadıq.  Meydanın  durumunun yaxşı olmamağı ötürmələrdə dəqiq oynamağımıza mane olurdu. Yer palçıq idi. Bəlkə də suyu çox vermişdilər. Torpaq ayağımızın altından qaçırdı. Əvvəlki oyunlarla müqayisədə qazon yaxşı deyildi. Bütün bunlara baxmayaraq çalışdıq ki, qələbə qazanaq. Yəni rəqibin adından çəkinmirdik. 

- Çılğın yunan azarkeşlərinin qarşısında necə, oynamağa hazırsınız?

- Əlbəttə. Kiprdə o cür tərbiyəsiz azarkeşlər qarşısında oynadıq. Onları gördükdən sonra hər şeyə hazırıq. Amma "Panatinaikos" köklü komanda, azarkeşləri isə mədəniyyətlidirlər. Onlar oyuna sadəcə öz çılğılıqlarını qatacaq, tərbiyəsizlik etməyəcəklərinə inanıram. Ona görə də Yunanıstanda oynamaq rahat olacaq.

Ergün SEYİD