“Panatinaikos”u da keçib qrup mərhələsində oynamalıyıq” – Rəşad Sadiqov

 “Qəbələ” klubunun yarımmüdafiəçisi Rəşad Sadiqovun Qol.Az saytına müsahibəsi

- Sabah Avropa Liqasının pley-off mərhələsinin ilk oyununda adlı-sanlı “Panatinaikos”la qarşılaşacqsınız. Komandanız bu görüşə nə dərəcdə hazırdır, kollektivdə ab-hava necədir?

- Məncə, tam hazırıq. Komanda stressdən uzaqdır. Sabah meydana sırf qələbə üçün çıxacağıq. Bunun üçün hər bir futbolçumuzun maksimum güc sərf edəcəyinə inanıram. Rəqibimiz doğrudan da güclüdür. Əvvəl qarşılaşdığımız hər üç komandadan daha üstündür. “Panatinaikos” 18 dəfə Yunanıstan çempionu olub. Bu, çox şeydən xəbər verir. Ancaq rəqibin adı bizi qorxutmur.

- Yəqin ki, “Apolllon”la qarşılaşmadakı məlum qalmaqaldan sonra yenidən yunan klubu ilə düşməyiniz arzuolunmaz oldu.

- Bizim üçün fərqi yoxdur. Onsuz da rəqiblərin hər biri güclü idi. Düzdür, məlum qalmaqalda sonra ajiotaj böyük ola bilər. Amma inanmıram ki, yenidən qalmaqal baş versin. Çünki “Panatinaikos” adlı-sanlı, elit klubdur. Yəni “Apollon” kimi qələbə üçün nəyə gəldi əl atan deyil. Düşünürəm ki, maraqlı oyunlar olacaq.

- “Panatinaikos”u  keçmək üçün "Apollon"una qarşı sərgilədiyiniz oyunlar yetərli deyil. Razısan?

- Əlbəttə, bu komandaları  tərəzinin eyni gözünə qoymaq olmaz. “Panatinaikos”un gücü göz qabağındadır. Meydanda bacardığımızın ən yaxşısını etməliyik. Doğrudan da bizim üçün çox vacib oyundur.

- Rəqibin adlı-sanlı olması üzərinizdə təzyiqi azaldacaq? Ümumiyyətlə, “Qəbələ” “pley-off”da dayansa, bunu sizin üçün uğurlu nəticə hesab etmək olar, yoxsa hədəf daha böyükdür?

- “Pley-off”a qədər gəlmək də yaxşı nəticədir. Amma bu o demək deyil ki, silahları yerə qoymalıyıq. Nə məşqçimizin, nə də bizim təslim olmaq fikrimiz var. Qarşımıza məqsəd qoymuşuq ki, “Panatinaikos”u da keçib qrup mərhələsinə yüksələk. Futboldur, mərhələni adlaya bilərik. Bizim fikrimiz birdir – mərhələ adlamaq.

- Cavid Hüseynov olayı ilə bağlı nə düşünürsən?

- Əvvəlcə mərhum jurnalistimizə Allahdan rəhmət diləyirəm. Heç kim belə olmağını istəməzdi.  Cavidi futbolda 15 ilə yaxındır ki, tanıyıram. Onun belə bir iş görməyinə inanmıram. Fikir verin, Cavidi jurnalistin döyülməyində ittiham etmirlər. Sadəcə, nəyisə gizlətməyində onu günahlandırırlar. Hazırda istintaq gedir. Yəqin ki, ədalətli qərar qəbul olunar. Məncə, Cavidin günahsız olduğu sübut olunacaq və o, yenidən Azərbaycan futboluna töhvəsini verəcək. Bir daha qeyd edirəm ki, Cavidin hansısa pis əməl törətdiyinə inanmıram.

- Komandanın kapitanı, aparıcı üzvü olan Cavid Hüseynov sabah meydanda olmayacaq. Bu, nə dərəcədə işinizi çətinləşdirəcək?

- Doğrudan da Cavidin yoxluğu böyük itkidir. O, hücumda çox işlər görürdü. Hər oyunda liderlik bacarığını göstərirdi. Biz də çalışacağıq ki, onun yoxluğunu hiss etdirməyək.

- Sabah komandanız psixoloji baxımdan da çətinlik çəkə bilər?

- Ola bilər. Ancaq çalışacağıq ki, üzərimizdən təzyiqi ataq. Həyatda hər bir insanın başına belə bir iş gələ bilər. Onsuz da Cavid sarı vərəqə limitinə görə, “pley-off”un ilk oyununu buraxmalı idi. Yəni biz buna hazır idik. Məşqçimiz bizi oyuna yaxşı kökləyib. 

Ramiq AĞAMƏMMƏDOV