"Qəbələ" istənilən səviyyədə oynamır" – Ruslan Abışov

"Qəbələ" klubunun kapitanı Ruslan Abışov Qol.Az saytına müsahibə verib.

Premyer Liqanın son turunda AZAL-a qalib gəldikləri oyundan (4:0) və komandasının son dövrdəki uğurlu çıxışlarından danışan millimizin üzvü müqavilə ilə məxsus olduğu "Rubin"ə qayıtmaq məsələsinə də toxunub

- Səfərdə AZAL-a dörd cavabsız qol vuracağınızı gözləyirdin?

- Son oyunlar fiziki cəhətdən hazırlığımız yüksək səviyyədədir. Milli komandaların oyunları ilə əlaqədar yaranan fasilədən yaxşı istifadə etdik. AZAL-la görüşə də ən yaxşı şəkildə hazırlaşmışdıq. Bundan əvvəlki görüşlərin ikisində AZAL-a uduzumuşduq, bir oyunda isə heç-heçə qeydə alınmışdı. Məğlubiyyətlərin əvəzini çıxmaq istəyirdik. Oyuna əlavə motivasiyamız var idi. Dünənki qarşılaşma göstərdi ki, qələbəyə layiq biz idik.  Çünki bir neçə real qol imkanlarımız da oldu ki, yararlana bilsəydik, hesab daha böyül olardı. Ancaq etiraf etməliyəm ki, 4:0 hesablı qələbə qazanacağımızı gözləmirdik.

- Komandaları müqayisə edəndə bu qənaətə gəlmək olar, yoxsa AZAL-ın sıx müdafiə olunduğu üçün belə düşünürsən?

- AZAL həmişə müdafiədə etibarlı oynayıb. Fikir versək, görərik ki, AZAL-a böyük hesabla qalib gəlmək çətin məsələdir. Üstəlik rəqib öz meydanında çıxış edirdi. Bildiyiniz kimi, AZAL evdə daha yaxşı oynayır. 

- Ardıcıl beş oyundur ki, "Qəbələ" qalib gəlir. Uzun müddət uğursuz çıxışlardan sonra komandanızda inkişaf hiss olunur. Yeni baş məşqçi Roman Qriqorçukun oyun fəlsəfəsini qavraya bilmisiniz? Yəni artıq o uğursuz çıxışların arxada qaldığını demək olar?

- Düzdür, bizim vaxta ehtiyacımız var idi. Yeni baş məşqçinin həmişə zamana ehtiyacı olub. Bir müddətdən sonra komandaya yeni gələn futbolçular da bir-birini yaxşı başa düşəcək. Hələ ki, istənilən səviyyədə çıxış etmirik. Bundan sonra daha yaxşı oynayacağıq.

- Hansı çatışmazlıqlar davam edir?

- Bunu açıqlaya bilmərəm. Söhbət baş məşqçinin veriyi tapşırıqlardan gedir. Yəni hələ ki, onun istədiklərini tam edə bilmirik. Qarşıdakı oyunlarda məşqçimizin bizdən tələb etdiklərini tam yerinə yetirəcəyik. Bundan sonra hər şey daha yaxşı olacaq. Qarşımıza böyük məqsədlər qoymuşuqsa, məşqçinin bütün tapşırıqlarını yerinə yetirməliyik.

-  "Qəbələ" hazırkı durumda neçənci yerə iddialıdır?

- Biz qarşımıza məqsəd qoymuşuq ki, bundan sonrakı bütün oyunlarda qələbə qazanaq. Sırf bunun haqda düşünürük. Təbbi ki, rəqiblərimizin xal itirməsindən də çox şey asılı olacaq. Maksimum öz oyunlarımıza köklənirik. Çempionatın bitməsinə yeddi tur qalıb. Biz ən yaxşı nəticəni qazanmaq istərdik. Ancaq hər şeyə çempionatın sonunda ayınlıq gələcək. 

- Premyer Liqanın növbəti turunda son dövrlər "Qəbələ" üçün başağrısına çevrilən "Simurq"la qarşılaşacaqsınız.

- "Simurq"u doğma meydanda qəbul edəcəyik.Bəli, bundan əvvəlki iki görüşdə rəqibizə məğlub olmuşuq. Üstəlik bizi kubokdan da kənarlaşdırdılar. Çalışacağıq ki, kubokdakı məğlubiyyətin də əvəzini çıxaq.

- "Rubin"lə bağlı məsələ nə yerdədir?

- Ümumiyyətlə, bu barədə danışmaq istəmirəm. Hər şey keçmişdə qalıb.

- Gələcəkdən nə gözləmək olar?

- Hələ ki, bilmirəm. Qarşıdakı yeddi oyuna köklənmişəm. Mövsümün sonuna qədər "Qəbələ"nin şərəfini qoruyacam. Xeyirlisi nədirsə, o da olacaq.

Ramiq AĞAMƏMMƏDOV