Fərhad Vəliyev: "Ən real çempionluq şansımız bu mövsümdür"

"Qarabağ" klubunun qapıçısı Fərhad Vəliyevin Qol.Az saytına müsahibəsi

- Topaz Premyer Liqada cari mövsümün yarısı arxada qaldı. Geridə qalan iki dövrəni necə qiymətləndirirsən?

- Çempionatın əvvəlindən bizim işimiz yaxşı getdi. Avroliqa oyunlarında da pley-off mərhələsinə qədər irəlilədik. Qrup mərhələsinə düşə bilməsək də, həmin Avropada yaxşı çıxışlarımızla yadda qaldıq. Çempionatda bir çox gərgin oyunlarımız oldu. Vacib xallar itirdiyimiz matçlar da oldu. Ancaq qış fasiləsinə lider yollanmağı bacardıq.

- Ən stabil çıxış edən komanda "Qarabağ" oldu. Lakin sizə də 4 oyundan artıq ardıcıl qələbə qazana bilmədiniz...

- Düzdü, mövsümün əvvəlində dörd oyun qalib gəlsək də, sonradan bizdə də eniş oldu. Bu, hər bir komandada müxtəlif vaxtlarda baş verir. Ümumən nəzərə alanda pis çıxış etmədik. Yaxşı hal odur ki, əsas rəqiblərimiz sayılan "Qəbələ"ni hər iki oyunda məğlub etdik. "Neftçi"dən isə 4 xal aldıq. Bundan başqa "İnter"i də hər iki oyunda məğlub etdik. Liderlər qrupunda olan komandalardan xal almaq çox əhəmiyyətlidir. Qeyri-stabil çıxışlarımızın sebeblerinden biri odur ki, çempionat gərgin keçir. Bundan başq Respublika stadionu təmirə dayandığından ev oyunlarımızı digər yerlərdə keçirirdik. Həmin stadionlarda sanki qonaq komanda kimi çıxış edirdik. Çalışacağıq ki, qış fasiləsindən sonra daha yaxşı və stabil oyun nümayiş etdirək.

- Hansı komandalarla oyun daha yaddaqalan oldu?

- "Qəbələ" ilə ev oyunumuzu qeyd edərdim. Həmin görüşdə 4:0 hesabı ilə qalib gəldiyimiz halda qapımızdan 3 qol buraxdıq. Hətta hesab 4:4 də ola bilərdi. Çox maraqlı və gərginliyi ilə yadda qalan oyun oldu. Həmçinin "Neftçi"ni 3:1 hesabı ilə məğlub etdiyimiz qarşılaşma xatirmizdə qalacaq.

- 2013-cü ili özün üçün uğurlu hesab edirsən?

- Özüm üçün götür-qoy edəndə düşünürəm ki, bu ili  normal hesab etməliyəm. Çempionat başlayanda ilk iki turda qapını Miro Varvodiç qorudu. Sonra isə baş məşqçi mənə etimad göstərdi və mən İbrahim Şehiç komandaya gələnə qədər bütün görüşlərdə qapıda durdum. Hesab edirəm ki, pis çıxış etməmişəm. Yadda qalan bir məqam da ondan ibarətdir ki, iki illik fasilədən sonra milli komandaya dəvət aldım.

- İbrahim Şehiçdən söz düşmüşkən, bu qapıçı gələndən ehtiyatda qalırsan. Təbii ki, ona şans verilməli idi, o da özünü göstərmək üçün oyunlara çıxmalı idi. Lakin belə görünür ki, bosniyalı qapıçı səni üstələyir.

- Şehiç kluba gələndən sonra baş məşqçi ona şans verdi, məni isə ehtiyatda saxladı. Tədricən Şehiçin çıxışları yaxşılaşdı, komandaya uyğunlaşdı. İlk oyunlarda onda bəzi çatışmazlıqlar hiss olunurdu. Bu da təbii idi, komandaya uyğunlaşmaq üçün vaxt lazımdır. Ancaq son turda "İnter"lə oyunda çox yüksək səviyyədə çıxış etdi. Buna baxmayaraq düşünürəm ki, qarşıdakı turlarda hər ikimizə ehtiyac duyulacaq. 

- Ola bilərmi baş məşqçi Qurban Qurbanov Şehiçin Bosniya və Hersoqovina millisinə çağırılması üçün daima ona əsas heyətdə şans verir?

- Ola bilər. Şehiç daha əvvəllər milli komandaya çağırılıb. Lakin sonradan klubsuz qaldığı üçün ona millidən dəvət gəlməyib. Əlbəttə, "Qarabağ"da stabil çıxış etdikdən sonra milliyə dəvət almalıdır. Ona bu işdə uğurlar arzulayıram.    

- "Qarabağ"ın çempionluq şanslarını necə görürsən? Çoxları "Qarabağ"ı çempionluğa ən real namizəd hesab edir.

- Biz də belə düşünürük. Əvvəlki illərdə də "Qarabağ" güclü olub. Ancaq bu il komandamız daha da stabilləşib. Bu mövsüm ən çox qol vuran və ən az qol buraxan komanda da bizik. Futbolçularla öz aramızda söhbət edirik ki, ən real çempionluq şansımız bu mövsümdür. Bunu əldən vermə kolmaz. Axıra qədər mübarizəmizi aparacağıq. Neçə illərdir "Qarabağ" çempionluq arzusundadır. Bu mövsüm həmin arzuya son qoymaq istəyirik.

Ramiq AĞAMƏMMƏDOV