Kamal Quliyev: "Təəssüf ki, Foqts göndərilmədi"

"Neftçi" klubunun sabiq məşqçisi Kamal Quliyevin Qol.Az saytına müsahibəsi

- "Neftçi"dən ayrıldıqdan sonra nə işlə məşğulsunuz?

- Bekarçılıqdır. Övladlarımın təhsili ilə məşğulam. İşləyən dövrdə insan bir qədər ailədən uzaq olur. İndi isə sırf ailə qayğıları ilə məşğulam. Mütəmadi olaraq futbola, məşqçiliyə aid kitablar oxuyuram. İnternet vasitəsi ilə böyük klubların məşq prosesləri, taktiki sxemləri haqda maraqlanıram. Komandamızın hər bir oyununu izləyirəm. "Neftçi"ni nəzərdə tuturam. Çalışıram, digər oyunlara da vaxt ayırım.

- Bir müddət əvvəl "Neftçi"yə qayıdacağınızla bağlı xəbərlər dolaşırdı...

- Hazırda bu məsələ haqda danışmaq tezdir. İnşallah, real nəsə olarsa, onda danışarıq. Hələ ki, ortada dəqiq bir şey yoxdur. Bir vaxtlar "Neftçi"yə qayıdacağım gündəmdə idi. Ancaq hələ ki, məsələ açıq qalır.

- "Neftçi"nin sizin istefanızdan sonrakı çıxışlarını necə qiymətləndirirsiniz?

- Düzdü, "Neftçi" 1-2 oyunda məğlub oldu. Buna baxmayaraq, gücünü toplayıb "Qəbələ"yə qalib gəldi və liderliyə yüksəldi. Hər halda səhvsiz komanda olmur. Biz "Nefçi"də işləyəndə də bu səhvlər olub. "Neftçi"nin son iki məğlubiyyəti futbolçuların öz səviyyələrindən aşağı çıxış etməsi ilə bağlı idi. Bunun da günahı futbolçulardadır. Məncə, onlar rejimə əməl etmirlər. Futbol dünyanın hər bir yerində günbəgün inkişaf edir. Görürsünüz ki, "Real" və "Mançester Yunayted" kimi böyük klublar özlərindən aşağı səviyyədə olan komandalarla oyunda çətinlik çəkir. Çünki rəqiblər də inkişafdadır. "Neftçi"nin mənfi və müsbət cəhətlərini baş məşqçi Nazim Süleymanov məndən yaxşı bilir. Hazırda komanda birinci pillədədirsə, deməli, düzgün yoldadır. Hər bir işdə dəyişiklik etmək üçün vaxt lazımdır. Qısa bir müddətdə hansısa irəliləyişə nail olmaq mümkün deyil. Bunlar hamısı tədricən olmalıdır.

- Rəşad Sadıqovun ilin ən yaxşı futbolçusu seçilməsi ilə bağlı nə deyə bilərsiniz?

- Rəşad Sadıqov ən yaxşı futbolçularımızdan biridir. Onunla bərabər digər futbolçularımız da bu ada real namizəd idi. Məncə, seçim düzgündür. Çünki Rəşad bu il həm millidə, həm də Avroliqadakı oyunu ilə çox gözəl təsir bağışladı, bir daha gənc oyunçulara örnək oldu.

- Milli komandamızın baş  məşqçisi Berti Foqtsun postunda qalmasına münsabiətiniz necədir?

- Biz müzakirə edənlərik. Qərarı isə AFFA qəbul edir. Hər bir qərara da hörmətlə yanaşmaq lazımdır. Belə məsləhət biliblərsə, neyləmək olar? Gözləyək görək nə olur. Əvvəlki illərdən fərqli olaraq Azərbaycanda yaşayıb, çempionatı izləsə, bəlkə də yaxşı olar. Bizim istədiyimiz odur ki, baş məşqçinin kimliyindən asılı olmayaraq, futbolumuz inkişaf etsin. İstər Foqts olsun, istərsə də Əli ya Vəli, əsas odur ki, milli komandamız uğur qazansın. Bizə qalan gözləməkdir ki, görək, Foqts bundan sonra nə edəcək? 

- Daima Foqts əleyhdarlarından olmusunuz. Yəqin onun qalmağına sevinmədiniz.

- Həmişə Foqtsun getməyini arzulayan bir insan olmuşam. Bu gün də sözümdə qalıram. Ancaq qeyd etdiyim kimi qərarı biz qəbul etmirik. Yenə də Foqtsun geyməyinə ikiəlli razı olaram. Ancaq çox təəssüf ki, belə olmadı.

- Bildiyiniz kimi milli komandamızın məşqçiləri də təyin olundu. Berti Foqtsa köməkçi qismində namizədlər siyahısında da adınız olmadı. Bəlkə, bu, həmişə Foqtsun əleyhinə olmağınızla bağlıdır?

- Hər şey ola bilər. O siyahıda Kamal yox, başqası olmağının mənim üçün fərqi yoxdur. Yenə deyirəm, təki futbolumuz inkişaf etsin. Yerli məşqçilərimzin yetişməyi çox yaxşıdır. Mən adi bir kəndli balasıydım. Kənddən gəlib belə bir nüfuza sahib olmuşam. Oynadığım dövrdə mənə "daydaylıq" edən öz oyunum, məşqim və əziyyətim olub. Bir futbolçu oynamaq şansı qazana bilmirsə, həmin futbolçuya günahı özündə axtarmağı tapşırıram. Dəqiq deyə bilmərəm ki, Foqtsu tənqid etdiyim üçün dediyiniz siyahıda adım olmayıb. Nə edirlər etsinlər, təki futbolumuz yüksəlsin.

Ramiq AĞAMƏMMƏDOV