"Litvada "Qarabağ"ı asan gəzinti gözləmir"

Hazırda Litvada yaşayaraq peşə fəaliyyətini davam etdirən azərbaycanlı jurnalist Rüstəm Mikayıllı "Banqa" klubu haqqında təəssüratlarını "Qarabağ"ın rəsmi saytına bölüşüb. Qol.Az "Qarabağ"ın Avropa Liqasının I təsnifat mərhələsindəki rəqibi haqda yazını təqdim edir:

"Banga" haqda danışsaq, onu qeyd etmək lazımdır ki, bu gün rəqibimiz çox yaxşı formadadır. Bildiyiniz kimi, Litvada çempionatın qızğın vaxtıdır və ikinci dövrə oynanılır. Son oyunlarda “Banga” xeyli "artırıb", bu da onun aldığı son nəticələrdə özünü göstərir. Garjdai təmsilçisi artıq 6 oyundur məğlub olmur və son beş oyunda 4 qələbə ve 1 heç-heçə ilə yadda qalıb.

"Banga"nın heyətini əsasən gənc oyunçular təşkil edir. Onlar yüksək atletik hazırlığı ilə diqqət çəkirlər. Komandanin liderlərindən biri 30 yaşlı Irmantas Zelmikasdır. Hansı ki, "Qarabağ"ın məşqçisi Zaur Tağızadəyə tanış gələ bilər. Çünki, "Neftçi" 2006-cı il Birlik Kubokunun finalında "Kaunas"a qarşı oynayanda Zelmikas məhz o heyətdə olub. Mərkəz müdafiəçisi legioner həyatı da yaşayıb. Oyun zamanı lazımlı tövsiyələr verə biləcək bir oyunçudur. Bir də Lipkis olduqca təhlükəlidir. Güclü, zərbələrlə hər an qapıçıları sınağa çəkir. Rəqibin müdafiəsini yarmaq "Qarabağ"a heç də asan olmayacaq.

Cox güman ki, "Banga" məhz doğma Garjdai şəhərində "Qarabağ"ı qəbul edəcək (artıq bu, dəqiqləşib). Klub ev oyununu doğma arenada keçirmək üçün çox çalışırdı. Meydan süni ot örtüyünə malikdir və "Banga" ilboyu orada məşq edir. Demək istəyirəm ki, meydança amili də litvalıların xeyrinə olacaq. Zənnimcə, tribunalar da tam dolu olacaq. Təxmini olaraq 1600-a yaxın  azarkeş gələcək. Çünki, bu il “Banga” Avropa arenasında debüt edir ve təbii ki, ozünü ən yaxşı tərəfdən göstərməyə çalışacaq. Hətta Litva klubunun futbolçuları da yerli mətbuata verdiyi açıqlamalarda yaxşı nəticə üçün hər şey edəcəklərini bildiriblər.
 
"Banga"nın baş məşqçisi tanınmış futbolçu Arminas Narbekovasdır. Litva futbolunun ən yaxşı oyunçularından hesab olunur ve SSRI çempionatinda "Jalgiris"in (Vilnus) liderlərindən olub. Məhz Narbekovas "Banga"nın əsas gücü sayılır. Çünki yetirmələri üçün əsl avtoritetdir və onunla çalışmaq litvalı futbolçular üçün ikiqat məsuliyyət deməkdir.

"Qarabağ" isə öz təcrübəsini ilk dəqiqələrdən göstərməlidir. Düşünürəm ki, hər şey Azərbaycan təmsilçisindən asılıdır. Əgər oyuna tam ciddi hazırlaşsa, rəqibi diqqətlə analiz etsə, o zaman komandamız vətənə sərfəli nəticə ilə dönə bilər. Orası dəqiqdi ki, Litva təmsilçisi "Qarabağ"a qarşı olduqca ciddi hazırlaşır. Onlar əllərinə düşən şansdan maksimum istifadə etmək istəyirlər. Litvalılar "Qarabağ"ın son 2 ildəki uğurlarını araşdırıblar və bilirlər ki, Bakıda onları çətin sınaq gözləyir. Amma "Qarabağ" öz texnikalı oyununu sərgiləyə bilsə, "Banqa"nın şansı azdır. Onu mütləq qeyd etməliyəm ki, "Banqa" sona qədər döyüşən komandadır. "Qarabağ"ı heç də deyildiyi kimi "asan gəzinti" gözləmir.