"Belə xarakter hər komandaya nəsib olmur" - Kaxaber Sxadadze

"Belə xarakter hər komandaya nəsib olmur" - Kaxaber Sxadadze
ÖLKƏ FUTBOLU 5 Mart 2026 / 22:52 761
-  A +

Bu gün Azərbaycan kubokunda 1/4 final mərhələsinin cavab matçları çərçivəsində "Qəbələ" doğma meydanda"Sabah"a məğlub olub. Gərgin keçən matçın əsas və əlavə vaxtında qalib müəyyənləşməyib (3:3). Penaltilər seriyasında "Sabah" rəqibindən üstün olub (2:4).

QOL.az xəbər verir ki, meydan sahiblərinin baş məşqçisi Kaxaber Sxadadze matçdan sonra keçirilən mətbuat konfransında oyun barədə fikirlərini bölüşüb.

Mütəxəssis ilk növbədə oyunun yüksək səviyyədə keçdiyini və futbolçularının mübarizəsindən razı qaldığını bildirib:

"Çox maraqlı oyun oldu, azarkeşlər çoxlu qol epizodları və qollar gördülər. Rəqibi qələbə münasibətilə təbrik edirəm. Futbolçularım həm oyun, həm də xarakter baxımından əllərindən gələni etdilər. Bizə çempionatda mübarizə üçün belə oyunlar lazımdır. Bizim əsas məqsədimiz Premyer Liqada qalmaqdır. Qarşıdakı turda da yenidən 'Sabah'la qarşılaşacağıq".

Sxadadze qapıçı seçimi və penaltilər seriyasındakı məyusluğa belə aydınlıq gətirib:

"Səlahət Ağayevin son oyunları yaxşı alınmışdı, ona görə də bu gün ona şans verdik və çıxışından razı qaldım. Penaltilər seriyasına gəlincə, düzünü desəm, qalib gələcəyimizi düşünürdüm. Lakin penalti daha çox psixoloji məsələdir. Məsələn, Murad Musayev məşqlərdə həmişə fərqli küncə vururdu, amma bu gün onun icrasına özüm də təəccübləndim. Futbolçular məşqdə etdiklərini oyunun gərginliyi səbəbindən yerinə yetirə bilmədilər. Biz futbolçulardan öncədən soruşuruq ki, kim penaltini vurmaq istəyir".

Baş məşqçi həmçinin Adriel Ba Louanın qırmızı vərəqə alması və hakim idarəçiliyi ilə bağlı tənqidi fikirlərini səsləndirib:

"Ba Loua bizim üçün çox vacib oyunçudur, qış toplanışında bizimlə olsaydı, daha hazır olardı. Onun qırmızı vərəqə epizodundan öncə, mənə elə gəlir ki, qayda pozuntusu var idi. AFFA-nın bunu araşdırmasını istərdim. Həmçinin Akinadenin üzünə zərbə endirilən epizodda, şəxsi düşüncəmə görə, rəqibə qırmızı vərəqə verilməli idi. Hakimlərin yanaşması fərqli ola bilər, amma bu məqamlar araşdırılmalıdır".

Sonda oyundan sonra emosiyalarından danışan Sxadadze futbol həyatının ayrılmaz hissəsi olan adrenalinə toxunub:

"İstər futbolçu vaxtlarımda, istərsə də indi oyunlardan sonra yata bilmirəm (gülür). Bu, adrenalindir. Məğlub olmaq olar, amma belə oyun və xarakter nümayiş etdirmək hər komandaya nəsib olmur".

Daha çox


Son xəbərlər
05.03.26  19:18

Vitinya "Real"a gedir?

topaz banner