"Biz günahkar axtarmırıq, inkişaf etmək istəyirik" - Ayxan Abbasov

"Şamaxı" Misli Premyer Liqasının 22-ci turu çərçivəsində doğma meydanda "Neftçi"ni qəbul edib. Matç 2:2 hesablı bərabərliklə yekunlaşıb.

QOL.az xəbər verir ki, "Şamaxı"nın baş məşqçisi Ayxan Abbasov matçdan sonra keçirilən mətbuat konfransında oyun barədə fikirlərini bölüşüb.

Təcrübəli mütəxəssis ilk olaraq "Neftçi" ilə matçı dəyərləndirərək xala layiq olduqlarını bildirib:

"Azarkeşlər üçün maraqlı oyun oldu. Öz meydanımızda məğlub olmamağımız sevindiricidir. "Neftçi" hazırda yaxşı formadadır və böyük komandalara qarşı mübarizə aparmaq həmişə çətindir. Futbolçularım xarakter nümayiş etdirdilər və hesab edirəm ki, bu xala layiq idik. Son dəqiqələrdə ən çox qol buraxan komanda bəlkə də bizik. Amma bu mövsüm ilk dəfə məhz son dəqiqədə qol vura bildik".

Baş məşqçi rəqibin əks-hücum imkanlarından maksimum yararlandığını vurğulayıb:

"Təbii ki, qol buraxılırsa, orada müdafiə səhvi qaçılmazdır. Biz meydanın olduqca təhlükəli hissəsində top itirdik və rəqib bizi sürətli əks-hücumda yaxaladı. Həmin epizodda müdafiəçilərimiz lazımi şəkildə sıxlaşa bilmədilər. Əslində, qarşısını almaq və təhlükəni vaxtında neytrallaşdırmaq mümkün idi".

A.Abbasov qapıların standartlara uyğun olmaması ilə bağlı verdiyi açıqlamaya PFL-in göstərdiyi reaksiyaya sərt etirazını bildirib:

"PFL-in mənə cavab verməsi çox təəssüf doğurur. Məndən əvvəl həmin stadionda (Quba Olimpiya İdman Kompleksi) oynayan bütün məşqçilər etiraz etmişdi, hətta məndən də sərt danışanlar olmuşdu. Təəssüf ki, PFL-dən reaksiya gəlməmişdi. Səhv etmirəmsə etik normaları pozduğumu deyiblər. Amma neçə gündür axtarıram, harada etikadan kənar çıxdığımı tapa bilmirəm. Həmin matçda top iki dəfə qapı dirəyinə dəydi. Əgər bir problemi 12 sm torpaq tökməklə həll edirlərsə, biz hara gedirik? Biz günahkar axtarmırıq, sadəcə inkişaf etmək istəyirik".

Baş məşqçi həmçinin meydança şəraitinin futbolçuların sağlamlığına təsirindən və Bəhlul Mustafazadənin ağır zədəsindən danışıb:

"Bəhlul Mustafazadənin "Nyukasl"la oyunda aldığı zədənin kökü məhz Quba stadionundan başladı. İndi milli komandanın üzvü 6 ay futbol oynamayacaq. Hər şeyə fikir verməliyik. Mən də çox şey danışa bilərəm, çox arqumentlərim var. Meydançamızı təmizləməyə görə bizə minnət edirlər.  Nə vaxt PFL gəlib bizə meydança təmizləyib? Qarda da oynamışıq. Bizə deyiblər ki, bu gün oynamasaz, reqlamentə görə sabah oynamalısız. Amma başqaları sabah oynamadı. Belə şeylərə cavab verməsinlər. Biz nə demişik ki? Dərd orasındadır ki, Qubada oynayan bütün komandalar o qapıya etiraz ediblər. Biz günahkar axtarmırıq, istəyirik ki, düzələk. Özümüzə da deyirəm. İşıqlandırma olmalıdır, meydançanın ot örtüyü dəyişdirilməlidir. Bunu "Turan Tovuz"da işləyəndə də deyirdim. Yavaş-yavaş inkişaf etməliyik. Amma biz geriyə gedirik. Nə vaxt sözümüz olsa, deyərik, heç kimdən çəkinəcəyimiz bir şey yoxdur. PFL çıxıb cavab versin ki, etikanı harada pozmuşam? Məndən əvvəl danışan məşqçilərin sərt açıqlamalarına cavab verərdilər. Niyə vermədilər?

A.Abbasov qarşıda gələn "Qarabağ"la kubok matçına da toxunub:

"Bərpa olmaq çox çətindir. Futbolçuları inandırıram ki, sıx qrafikdə oynamalıyıq. Dünyanın hər yerində bu cür olur. Bizdə problem odur ki, süni örtüklü meydançada məşq edirik, oynayırıq."Qarabağ"ın gücü hamıya bəllidir. Amma bizim itirəcəyimiz bir şey yoxdur, o oyundan ancaq qazanclı çıxa bilərik". (sportal.az)