“Futbolçuların yanında olmalıyıq, psixoloji təzyiq çoxdur” - Qurban Qurbanov

Misli Premyer Liqasının 13-cü turunda "Qarabağ" "Karvan-Yevlax"a 2:0 hesabı ilə qalib gəlib.

QOL.az xəbər verir ki, Ağdam klubunun baş məşqçisi Qurban Qurbanov matçdan sonra keçirilmiş mətbuat konfransında oyun barədə fikirlərini bölüşüb.

- Füzuli Məmmədova uğurlar arzulayıram. Uzun fasilədən sonra baş məşqçi kimi Premyer Liqaya qayıtması sevindiricidir, ona qarşıdakı matçlarda uğur diləyirəm. Futbolçularımı vacib qələbə və qazanılan üç xal münasibətilə təbrik edirəm. Oyun bizim üçün heç də asan keçmədi. Avrokubok görüşlərindən sonra komandanın hazırlıq səviyyəsi adətən 30-40 faiz aşağı düşür, bərpa üçün vaxt və imkanımız məhdud olur. Heyətə nəzər salsaq, bir neçə futbolçu ideal formasından uzaqdır. Məsələn, Ramil Şeydayev, Musa Qurbanlı və Bədavi Hüseynov uzun müddətdir oynamırdılar. Onların ilk dəqiqələrdən meydana çıxması çətin məsələdir. Ritmi tutmaq və güclərini düzgün bölüşdürmək üçün onlara ən azı 3-4 oyun lazımdır. Risklərə getmək istəmirik. Oyunlar vacib olsa da, futbolçuları qorumaq bizim üçün prioritetdir. Oyunçu itirməkdənsə, məğlub olmağa razıyıq. İtaliyadakı oyunda Mateus Silva və Leandro Andrade əzələ ağrısı hiss etdilər, Kevin Medinanın vəziyyəti məlumdur, Bəhlulda isə yorğunluq var idi. Bu səbəbdən üç oyunçunun adını protokola daxil etmədik. Əsas heyət üzvləri yorğun olsalar da, oyun ritmindən düşmürlər. Digərləri isə həm məşqdən, həm də oyun praktikasından uzaq qaldıqları üçün problemlər yaranır. Kənardan heyətimizin geniş olduğu görünə bilər, amma futbolçular lazımi formada olmayanda çətinlik çəkirik. Şükürlər olsun, vəziyyəti balanslaşdırmağa çalışırıq. İlin sonuna doğru zədəlilərin sayı artır, qarşıda isə bizi həm kubok, həm də çempionat oyunları gözləyir. Bu matçlara hazırlaşmaq üçün futbolçuların üzərinə böyük məsuliyyət düşür. Çempionatın gedişatı da dəyişib, rəqiblər fərqli oynayır, əvvəlki kimi müdafiədə çox səhv buraxmırlar.

- İcraiyyə Komitəsinin iclası keçirildi. Neçənci dəfədir ki, siz olmayan vaxtda vacib iclaslar salınır...

- İclasın tarixi əvvəlcədən bütün üzvlərlə razılaşdırılır. Komitə üzvlərinin hər biri iş başında olan insanlardır, ona görə də hamını bir araya gətirmək üçün uyğun zaman seçilməlidir. Bəzən tək mən yox, bir neçə üzv Bakıda olmur. Belə vəziyyətdə iclasın keçirilməsi üçün əksəriyyətin iştirakı əsas götürülür ki, bu da normal haldır. Vaxt uyğunsuzluğu bir-iki dəfə təkrarlansa da, qəbul edilən qərarlar İK-nın bütün üzvlərinə göndərilir. Bu səbəbdən prosesdə hər hansı ciddi problem görmürəm.

- Marko Yankoviç və Mateus Silva arasında “Napoli” ilə görüşdə baş verən mübahisə haqda fikriniz necədir? 

- Futbol emosional oyundur. Biz bu cür, hətta bundan daha sərt halların dəfələrlə şahidi olmuşuq. Buna baxmayaraq, belə gərgin oyunlarda futbolçular emosiyalarını cilovlamağı bacarmalıdırlar. Çünki bu, matçın gedişatına birbaşa təsir edə bilər. Mən bu barədə ümumi fikirlərimi artıq bildirmişəm və bu mövzuya çox ciddi diqqət ayırıram.

- “Ayaks”la oyun pley-offa çıxmaq baxımdan sizin üçün çox vacibdir. Bu fikirlə razısınız? Belə yanaşma komandanın üzərində əlavə təzyiq yaratmır?

- Bu oyuna adi bir matç kimi yanaşmaq olmaz, qarşılaşma çox vacibdir. Ola bilsin ki, azarkeşlər turnir cədvəlinə məndən daha çox baxır və oyunları daha dərindən analiz edirlər. Bəlkə mən bəzi detallara toxunmuram, amma fanatlar bunları görür. Biz isə diqqətimizi tam oyuna yönəltməliyik, bunun futbolçulara da müsbət təsiri olar. Çempionat matçına hazırlaşmaqla yanaşı, fikrimizdə həmin görüşü də tuturuq. "Ayaks"ın özünəməxsus oyun fəlsəfəsi var, bir neçə oyunlarını izləmişəm. “Benfika” ilə matçda daha çox qol epizodları oldu, nəinki onların. Məni ən çox narahat edən indiki yanaşmadır: sanki rəqib sonuncu pillədədir deyə, qələbə indidən bizimdir. Bu arxayınlıqdan uzaqlaşmaq lazımdır. "Ayaks" da qarşıdakı oyunlara, xüsusilə də bizimlə matça köklənib. Çox ciddi və diqqətli olmalıyıq. Ötən mövsüm Avropa Liqasında qrupda sonuncu olsaq da, 3-4 oyunda rəqibdən üstün idik. Sadəcə qismət olmadı. Bəlkə də daxildə nələrisə səhv etmişdik, ya da kollektivdə lazımi səmimiyyət və dostluq atmosferi yox idi.

- Mateuş Koxalski ilə bağlı “Qarabağ”a rəsmi təklif olub?

- Hər xətdə oyunçu axtarıram. Bu an ehtiyacımız var. Daha sağlam olmağa ehtiyacımız var. Juninyo yaxşı futbolçu idi, yaxşı qolları oldu. Amma onun stabilliyindən narazı idim. Amma onun özəlliklərindən bir cür istifadə edirdim, indi əlimdə olanlardan başqa cür edirəm. O cür futbolçunun komandamızda olmasına yox deməzdim. Hər halda, axtarırıq, baxırıq, işlər gedir. İmkan olsa, 2-3 oyunçu götürəcəyik. Koxalskiyə görə, rəsmi təklif yoxdur. Tələsmək lazım deyil. Qapıçı indi-indi inkişaf etməyə başlayırsa, potensialını üzə çıxarmağa başlayırsa, tələsməmək lazımdır. Belə şansdan daha çox istifadə etmək lazımdır. Rəsmi təklif yoxdur. 

- İcraiyyə Komitəsndə çıxan qərarlara fikriniz necədir?

- Burada fikir bildirməyin düzgün olmaz.

- Toral Bayramova oyundan sonra müsahibə üçün yaxınlaşan jurnalistlər olsa da, o, bildirdi ki, uşaqlarına daha çox vaxt ayırmaq istəyir. Maraqlıdır, həqiqətən Bayramov bazada daha çox vaxt keçirir?

- Bəzən "Qarabağ"ın futbolçularının iş rejiminə baxanda, bəlkə bir az ağır səslənəcək, amma adamın onlara yazığı gəlir. Bəzən istəyirəm ki, onları buraxım, deyim gedin 1 ay futboldan uzaq qalın, dincəlin. Amma bu mümkün deyil, biz istənilən turnirdə nəticə verməliyik. Komanda elə bir səviyyəyə çatıb ki, futbolçuların normal istirahətə vaxtı qalmır. Bu tempə tab gətirmək üçün təkcə fiziki güc yox, həm də psixoloji dözüm lazımdır, bəzən bu da çatmır. Baş məşqçi kimi mənə də asan deyil. Futbolçuları başa düşmək lazımdır. Onlar kimin üçün oynayırlar? Bizim üçün, xalq üçün, ailələri üçün. Çox adam övladının futbolçu olmasını arzulayır. Ancaq inanın ki, onlar sanki seçilmiş insanlardır. Döyülən də onlardır, söyülən də. Nəsə bir uğursuzluq olan kimi media, rəhbərlik, azarkeş, məşqçi, hətta valideyn tərəfindən böyük təzyiqlə üzləşirlər. Biz futbolçuların, xüsusilə də yerli oyunçularımızın yanında olmalıyıq. Ramil Şeydayev, Nəriman Axundzadə, Musa Qurbanlı kimi oyunçular oynamadıqca, istər-istəməz idman formasından uzaqlaşırlar, psixoloji gərginlik yaranır. Ola bilər ki, onlar bəzən sizinlə kobud danışsınlar, amma onları anlayışla qarşılamaq lazımdır. Əsəbləri hər zaman yerində olmur. Allah qoysa, mən özüm tapşıraram, gələn dəfə vaxt ayırıb müsahibə verərlər. (sportal.az)