"Millimizin nəticələrindən razıyıq"

Medianın İnkişafı Agentliyinin layihəsi

Azərbaycan boks millisi Səudiyyə Ərəbistanının Ər-Riyad şəhərində keçirilən VI İslam Həmrəyliyi Oyunlarında uğurlu çıxış ilə yadda qaldı. 

Belə ki, yığmamız yarışı 1 qızıl, 3 gümüş və 2 bürünc medalla başa vurub. Bu medallardan 3-nü kişi, 3-nü isə qadın boksçularımız əldə ediblər.

Komandamızın heyətində Səidcəmşid Cəfərov (80 kq) çempion tituluna yiyələnib. Nərgiz Zeynalova (54 kq) və Aynur Mikayılova (57 kq) İslamiadada ikinci yeri tutublar. Məhəmmədəli Qasımzadə (60 kq) finalda Madiyar Daniyarovla (Özbəkistan) döyüşməli olsa da, zədə səbəbindən rinqə çıxmayıb və gümüş medala yiyələnib. Həmçinin Fatimə Mehdiyeva (65 kq) və Sərxan Əliyev (70 kq) bürünc mükafat qazanıblar.

Bugünkü həmsöhbətimiz isə boks üzrə Azərbaycan millisinin böyük məşqçisi Nəriman Abdullayevdir.

O, əvvəlcə kişi boksçularımızın mübarizəsindən danışıb: "İslamiadada üç nəfər kişi, dörd nəfər isə qadın boksçumuz iştirak edirdi. Əvvəlcə kişi boksçularımızdan danışaq. Pis döyüşmədilər. İki finalçımız var idi. Bilirsiniz ki, Məhəmmədəli Qasımzadə zədəli olduğuna görə final döyüşünə çıxmadı. Döyüşsəydi, o da qızıl medal qazana bilərdi. Sərxan Əliyev isə güclü bir rəqiblə qarşılaşdı. Çox yaxşı döyüşdü. Biz onun döyüşündən razı qaldıq. Amma rəqibi çox güclü idi. Səidcəmşid də çox parlaq çıxış etdi. Üç rəqibinin üçü də güclü idi. Rəqiblərinə elə qalib gəldi ki, hakimlər arasında söz-söhbət də ola bilmədi. Finalda Türkiyə təmsilçisi ilə qarşılaşdı. Səidcəmşid təmiz qələbə qazanaraq qızıl medal əldə etdi. Onu da təbrik edirik".

N.Abdullayev qadın boksçularımızın döyüşlərinə də toxunub: "Qızlarımız da gözəl çıxış etdilər. İki qadın boksçumuz gümüş, bir qadın boksçumuz isə bürünc medal qazandı. Böyük təcrübələri olmadığına görə, kənarda təlim-məşq toplanışları, beynəlxalq görüşləri çox keçirmədiklərinə görə onların da döyüşlərini parlaq hesab edirəm. Özləri də çox gəncdirlər. Biz millimizin çıxışından razıyıq. Məncə, nəticələrimiz yaxşıdır".

N.Abdullayev Azərbaycan boksunun hazırkı durumunu da qiymətləndirib. O, ölkəmizdə boksun inkişaf etməkdə olduğunu bildirib: "Hazırda Azərbaycan boksu inkişaf edir. Özbəkistandan gələn, hazırda ölkəmizdə çalışan Rövşən müəllimin köməkliyi ilə əl-ələ verib işləyirik. Çalışırıq ki, çempionluqlarımız daha artıq olsun. Çox şey dəyişib. Bəzən qızlarla məşq edirik, İlkin müəllim də bizə qatılır. Birgə məşqlərlə inkişaf gedir".

Mütəxəssis qarşıdakı hədəflərdən söz açıb: "Qarşıdan dünya çempionatı gəlir. Yarışa hazırlaşırıq. İnşallah, orada da uğurlu çıxış edərik".

Yığmamızın böyük məşqçisi perspektiv vəd edən gənc boksçuların da adlarını çəkib: "Qızlardan ibarət boksçularımızdan Aynur Mikayılovanı fərqləndirərəm. Çox gəncdir, az döyüş keçirib, amma perspektivi böyükdür. Ümid edirəm ki, yaxşı nətcə göstərəcək. Kişilərdən isə Sübhan Məmmədovun adını çəkərəm. O, bir tapıntıdır. Sübhan çox fərqli boksçudur. Dünya çempionatında da iştirak etdi. Gözəl döyüşdü. Güclü boksçu ilə qarşılaşdı. Biz onun məğlub olduğunu hesab etmirik. Çox gəncdir. İnşallah, yaxşı nəticələr qazanacaq. Yəni, perspektivli boksçularımız var. Biz də onların üzərində işləyirik". 

Nur Zeynalova

Yazı Azərbaycan Respublikasının Medianın İnkişafı Agentliyinin maliyyə dəstəyi ilə çap olunub