"Qarabağ"la oyuna 3 xal üçün çıxacağıq" - Emin Mahmudov

“Neftçi”nin yarımmüdafiəçisi Emin Mahmudov dünən "Zirə"yə qarşı keçirilən Misli Premyer Liqasıın 22-ci turunun oyunundan (2:1) sonra jurnalistlərə müsahibə verib. 

 QOL.az müsahibəni təqdim edir.

- Dramatik keçən oyunda “Zirə”ni məğlub etdiniz. 2:1 hesablı qələbəni necə şərh edərdiniz?

- Maraqlı oyun oldu. Meydanda mübarizə çox idi. Ola bilər, azarkeşlər 90 dəqiqə boyunca gözəl oyuna şahidlik etmədilər. Lakin sonluq çox gözəl alındı.

- Hər şey qolsuz heç-heçəyə doğru getdiyi anda nə baş verdi ki, 5 dəqiqə ərzində ardıcıl 3 qol izlədik?

- Hər iki komanda qələbə qazanmaq istəyirdi. Biz də istəkli idik, "Zirə" də. Sona qədər heç bir komanda dayanmırdı, qalıb gəlmək, 3 xal qazanmaq istəyirdi. Ola bilər buna görə sonluq belə dramatik alındı. Çox şadam ki, yekunda 3 xal qazanan tərəf biz olduq.

- Qələbəyə baxmayaraq, razısınız ki, oyun baxımından "Neftçi" o qədər də inamlı deyildi?

- Məncə, hər iki komanda daha yaxşı oyun sərgiləyə bilərdi. Düzdür, qol epizodları çox deyildi. Lakin meydanda mübarizə var idi. Biz daha yaxşı oynaya bilərik. Zamanla bundan da inamlı təsir bağışlayacağımıza inanıram. Belə qələbələr komandaya güvən verir.

- Artıq ardıcıl üç oyundur "Neftçi" qələbə qazanır...

- Təbii ki, buna görə sevinirik. Dediyim kimi, ardıcıl qələbələr komandaya inam verir. İnam olan yerdə isə nəticələr də yaxşılaşır.

- Növbəti turda "Qarabağ"la qarşılaşacaqsınız. Qələbə seriyasını davam etdirmək mümkün olacaq? “Qarabağ”ın hazırda yaxşı formada olmaması 3 xal şansınızı artırır?

- Bizim üçün rəqibin hansı formada olmasının önəmi yoxdur. Hər matça olduğu kimi, "Qarabağ"la görüşə də 3 xal üçün çıxacağıq. Ola bilər çempionatda şansımız o qədər də çox deyil. Lakin "Neftçi" olaraq hər matçda hədəfimiz qalib gəlməkdir. Azarkeşlərimizə borcluyuq. Çünki turnir cədvəlində aşağı pillələrdə qərarlaşdaq da, fanatlarımız hər zaman yanımızdadırlar, bizi dəstəkləyirlər. Onlar üçün qələbə qazanmalıyıq.

- Yəni “Neftçi” üçün əsas hədəf kubokdur?

- Hazırda o barədə çox düşünmək lazım deyil. Real yanaşsaq, bəli, çempionatda yuxarı pillələrdən xeyli aralı düşmüşük. Mövsümün ilk yarısında çox xal itirmişik. Buna görə də ilk növbədə oyunumuzu yaxşılaşdırmalıyıq. Avrokuboklara vəsiqə qazanmaq baxımından kubokda şansımız daha çoxdur.

- “Zirə” ilə matçda hesabı açdınız. Bu qol özünəinamınızı artıracaq?

- Emin Səfərov çox yaxşı keçid etdi, gözəl də ötürmə verdi. Zərbəm də alındı. Qollar vurduğum üçün sevinirəm. Bu, mənim üçün vacibdir. Komandaya kömək etmək istəyirəm. Buna görə də çox qol vurmaq, assist etmək lazımdır. Komandamızın buna ehtiyacı var.

- Demək olar ki, Emin Mahmudov əvvəlki formasını bərpa edir?

- Komandamız mənə kömək edir. Əvvəl nisbətən arxada oynayırdım. İndi isə komanda yoldaşlarım kömək edirlər, daha çox irəlidə oynayıram. Bu baxımdan ola bilər ki, oyunum yaxşılaşıb. Üstəlik, məşqçinin güvəni də vacib rol oynayır. Samir müəllimin etimadı mənim üçün mühüm əhəmiyyət kəsb edir.

- Son günlər ən çox müzakirə olunan mövzulardan biri legioner limitinin ləğvidir. Millinin aparıcı üzvü kimi siz bu barədə hansı fikirdəsiniz?

- Artıq qərar verilib, ona görə də danışmağımız heç nəyi dəyişməyəcək.

- Bəs komanda sayının artması?

- Komanda sayının artması yaxşıdır. Növbəti mövsümlərdə də say artsa, çempionatımız daha da maraqlı keçər. Düzdür, hələlik format məlum deyil. Baxaq görək, nə olur. Ümid edirəm ki, hamımız üçün xeyirlisi olar.