"Bu stadionda bizə 3 qol vuran 2 klub olub: "Real" və "Neftçi"

APOEL-n çox ambisiyalı prezidenti var idi.  Kiprdən tutmuş Rusiyanın Uralına kimi biznesi, böyük maliyyəsi, imkanları geniş idi. Buna baxmayaraq sadəliyi, istiqanlılığı ilə seçilirdi. Heç kimə yuxarıdan aşağı baxmırdı.

Futbol baxımından isə həddindən artıq məğrur, özünəinamlı, arxayın görünürdü. Başadüşülən idi. Fantastik uğurlar qazanmışdılar. Qrupda "Zenit", "Şaxtyor", "Porto", 1/8-də "Lion" kimi klublarla baş-başa oynayaraq xallar qazanmış, mərhələlər keçərək bizdən 5 ay öncə Çempionlar Liqasının 1/4 finalında nəhəng "Real"la qarşılaşmışdılar...

Bakıya rahat gəlmişdilər. Hava çox isti idi. UEFA-nın rəsmi nahar yeməyini razılaşdıraraq axşama saxlamışdıq. Açıq məkanda, milli yeməklərimiz, musiqi sədalarımız altında qonaqlar çox razı görünürdülər.

Mətbəximizi çox bəyənmişdilər. Əsasən də lavaşlı lülə-kabablardan doymaq bilmirdilər.
Məşqçilər korpusundan da yer alanlar var idi.

Vəziyyətdən istifadə edib, "biz sizdən çəkinirik" adıyla psixoloji "yastıq əməliyyatı" söhbətləri, kəşfiyyat da aparırdıq.

Prezidentləri Firos Erotokritu rus dilini, region tarixini də gözəl bilirdi. Yaşı, təcrübəsi, qabiliyyəti, həssaslığı açıq sezilirdi. Göstərdiyimiz münasibətdən çox məmnun qalmışdı və təamlarımızdan, musiqimizdən məst olduğunu dönə-dönə vurğulayırdı.

İlk görüş heç-heçə (1:1) başa çatdı və daha da arxayın evə qayıtdılar. "Neftçi" isə cavab qarşılaşmasına tam səfərbər olmuşdu. Bakıdakı matç bərabərə bitsə də, rəqibə, göstərilən oyuna görə komandanın, hər birimizin özünəinamı artmışdı.

Oyun ətrafında siyasi, milli çalarlar, fanat-azarkeş, qızışdırıcı amillər yer alsa, çoxluq təşkıl etsə də, ciddiliyimizi, təmkinimizi qoruyur, tədbirimizi görür, bütün diqqətimizi oyuna kökləmişdik.

Görüşdən bir gün öncə cavab rəsmi yeməyi təşkil edildi. Prezidentləri təmtəraqla bizi qarşıladı. Qarşı-qarşıya əyləşmişdik. Xüsusi, böyük bir qabda iri "ustritsa"larla
dolu yemək gətizdirdi. İsrarla dadına baxmağımı istəyirdi.

İlk olaraq birtəhər, diplomatik başını qatır, "pası" digər nümayəndələrimizə ötürürdüm. Çox diqqətli idi. Bir qədər keçdikdən sonra yenə bizə yad olan yeməyin dadına baxmağı təklif etdi. Ürəyimdə "Biz ilan-qurbağa, malyuska, ustritsalar yemirik" düşüncəsilə mədəni, bu dəfə də yola verdim.

Uşaqlar da bir az dadına baxdıqdan sonra digər yeməklərə üstünlük verirdilər. Hörmətli Firos əl çəkmirdi. Axırı söz aldı: "Bizi Bakıda necə xoş qarşılamışdınızsa, mən bu görüşə xüsusi hazırlaşmışam, bunun dadına mütləq baxmalısız".

Axırı xoş münasibətlə: "Üzürlü sayın, mən belə həşəratlardan uzağam". Stolda olan xüsusi "ustritsa"ların üstün cəhətlərindən, orqanizmə xeyirli olmasından bəhs etsə də, xeyri olmadı. Qabın yarıdan çoxu qalmışdı hələ.

Bir az da keçdi. Tədbir yekunlaşmaq üzrəydi.
Prezident etikasını qoruyub ilk olaraq qiymətini açıqlamadığı "həşərat"ın tarixçəsini danışdı və iri boşqabı qabağına çəkdi:

- Bilsəydim başqa addım atardım, fərqli hazırlıq  görərdim. Bakıdakı görüş mənə necə təsir etmişdisə, istədim xüsusi yemək sifariş edim sizə. "Ustritsa"ları məxsusi olaraq bu masa üçün Fransadan gətizdirmişəm. Qiyməti də... Məni üzürlü sayın, 15-20 min dolları stolun üstündə saxlaya bilmərəm.

Zarafat edərək, bir qədər də yanğı ilə "paçkalar" ödədiyi xüsusi yeməyi özü vurdu bədənə. "Ustritsa-malyuska"lar da nə "malyuska"lar...
Böyük balıqqulağı, "rakuşka"ların içindən boylanan başlar içəridə üzürlər özləri üçün.

Prezidentin hələ xəbəri yox idi ki, sabah komandası yaşıl meydanda "ustritsa"lar kimi diri-diri yeyiləcək. "Neftçi" tarixin bu günü Kiprdə Fransadan 15-20 minə xüsusi gətirilmiş yeməklər üçün yox, tarix yazmaq üçün getmişdi.

Oyundan sonra böyük qalmaqallar yaşansa da, APOEL prezidenti Firos Erotokritu öz alicənablığını, məğrurluğunu sona kimi qorudu: "Bu stadionda qapımızdan 3 top keçirən iki klub olub, biri "Real", indi də "Neftçi". Siz də böyük klubsuz" deyərək bizi təbrik etdi və qrupda uğurlar dilədi.

"Neftçi"yə qarşıdakı Avroliqa matçında uğurlar arzusu ilə...

Tahir SÜLEYMANOV