“Qalatasaray” zədələnib

“Qalatasaray” zədələnib
DÜNYA FUTBOLU 29 Oktyabr 2018 / 15:22 3223
-  A +

Superliqanın son turunda səfərdə “Yeni Malatyaspor”a 0:2 hesabı ilə uduzan “Qalatasaray” son 1 ayda təkcə sərgilədiyi futbolla deyil, həm də bir çox oyunçusunun zədələnməsinə görə gündəmə gəlir.

Qol.az Türkiyə mətbuatına istinadən xəbər verir ki, İstanbul klubunun 7-ci turda “Ərzurumspor”u 1:0 hesabı ilə məğlub etdikləri matçdan sonrakı 3 turda ümumilikdə, 8 oyunçu sıradan çıxıb. Bunlar Əmrə Akbaba, Ərən Dərdiyok, Henri Onyekuru, Sərdar Əziz, Sofian Fequli, Fernando, Yuto Naqatomo və Belhandadır. Komanda bu müddətdə keçirdiyi 6 görüşdə yalnız 2 qələbə qazanıb. Digər 4 qarşılaşmada isə 2 heç-heçə və 2 məğlubiyyət qeydə alınıb.

Heyətdə zədəli futbolçuların çoxluğu Superliqada bu həftə “Fənərbaxça”, Çempionlar Liqasının qrup mərhələsində isə gələn həftə “Şalke” ilə oyunlar öncəsi baş məşqçi Fatih Terimi narahat edir. Ancaq əməliyyat olunan Akbaba və Naqatomodan başqa, digər zədəlilərin sözügedən qarşılaşmalara qədər sıraya qayıda biləcəyi ehtimal olunur.

Qeyd edək ki, noyabrın 2-də evdə “Fənərbaxça”nı qonaq edəcək “Qalatasaray” 4 gün sonra səfərdə “Şalke” ilə qarşılaşacaq.


Son xəbərlər
21.12.25  18:54

PSV-dən yeni rekord

20.12.25  22:54

Yamal, Haaland, Keyn...