Katalizator, tiran - Katalin Tira

Katalizator, tiran - Katalin Tira
XƏBƏR 27 Oktyabr 2016 / 17:17 10815
-  A +

Buna qədər Rumıniyadan kənarda, demək olar ki, heç kimin tanımadığı 22 yaşlı hücumçu artıq bir çox ölkəyə səs salıb. Təəssüf ki, futbolçu qabiliyyəti ilə yox, başqa məsələyə görə...
 
İndiyə kimi meydana çıxan azarkeşlərin stüardlarla "qaçdı-tutdu” oyununu dünyada çox görmüşük. Belə hallarda idmançılar azarkeşləri qucaqlayır, ən azı stüardları daha nəzakətli davranmağa çağırırlar. İndiyədək hansısa oyunçunun meydana girən azarkeşi vurduğu yadıma gəlmir. Amma bu hadisə Azərbaycan çempionatında baş verdi.
 
“Neftçi”nin rumıniyalı forvardı Katalin Tira "Qarabağ"a uduzduqları oyunun sonunda meydana çıxan azarkeşi yumruqladı. Maraqlıdı ki, yanında olan komanda yoldaşı Rəhman Hacıyev də onun qarşısını almağa çalışmadı. Gənc azarkeşi azğınlaşan rumının əlindən "Qarabağ"ın futbolçuları aldı. Nurlan adlı bu azarkeşi “Neftçi”sevərlər yaxşı tanıyırlar. Ötən mövsüm "İnter"lə görüş bitdikdən sonra onu Araz Abdullayevlə Rahil Məmmədov döyüb. Amma nə onda, nə də indi Nurlan futbolçuları vurmaq fikrində olub. Ötən il futbolçulara "bu formanın dəyərini verə bilmirsizsə, çıxın gedin" deyib. Bu dəfə isə nə dediyini bilmirəm. Əslində, heç deməyə macal da tapmadı. Meydana çıxan kimi, Tira yumruğu ilişdirdi...
 
Televiziyadan gördüyüm qədərilə o, heç nə demədi və ya Tiraya yaxınlaşıb hansısa aqressivlik etmədi. Nurlan sevimli komandasının uğursuzluğuna etirazını meydana çıxmaqla bildirirdi. Əlbəttə, bu düzgün iş deyil. Amma Tiranın fanatı niyə vurduğu hələ də hamıya qaranlıqdı. Rumın futbolçu oyundan sonra Nurlanın "Qarabağ" azarkeşi olduğunu zənn etdiyini və buna görə onu vurduğunu bildirir. Əlbəttə, tiranlıq edən Tira daşıdığı formanın və nömrənin vaxtilə Anatoli Banişevski kimi əfsanəyə məxsus olduğunu bilmir, aranı qatdıqdan sonra ağlına və ağzına gələni danışır. Komanda yoldaşına bəraət qazandıran Rəhman Hacıyev isə özü də azarkeşi vurmaq fikrində olduğunu deyir...
 
Qeyd etdiyim kimi, ötən il Araz Abdullayevlə Rahil Məmmədov da “Neftçi” azarkeşini döymüşdülər. Həmin vaxt futbolçular layiq olduqları cəzanı almadıqlarından özbaşınalıqlar davam edir. Düzdü, matçdan sonra baş məşqçi Elxan Abdullayev Tiranın komandadan qovulacağını bildirdi. Lakin dünən açıqlanan rəsmi bəyanatda rumın legionerin yalnız məşqlərdən kənarlaşdırıldığı bildirilir. Təkcə bu məqam komandada baş məşqçinin söz sahibi olmadığını göstərir. Əslində, bu, aldığı pulun qarşılığını verə bilməyən legionerlə müqaviləni birtərəfli qaydada pozmaq üçün əla fürsətdi. Tira çempionatda keçirdiyi 8 oyunda cəmi 1 qol vurub. Onu da "Kəpəz"in qapıçısı Tadas Simaitisin kobud səhvindən sonra boş qapıya. Bir vaxtlar "Udineze"nin yeniyetmə, "Latsio"nun gənclər komandasının şərəfini qoruyan, perspektivli sayılan forvard böyük futbola uygunlaşa bilmir. Təsadüfi deyil ki, çıxış etdiyi 3 mövsümdə cəmi 2 qol vura bilib. Bu da 2014-15 mövsümündə Rumıniya "Braşov"unda olub. Bundan əvvəl çıxış etdiyi Hollandiya "Den Haaq"ında və daha sonra vətənində şərəfini qoruduğu "Konkordiya" ilə Buxarest "Rapid"ində qol hesabını aça bilməyib.
 
Görəsən, belə "qolçunu" "Neftçi"yə hansı ağılla götürüblər?! Ziyanın yarısından qayıtmaq üçün indi gözəl şans yaransa da, başını itirən klub rəhbərliyi yenə də nə edəcəyini bilmir. Halbuki rumın legioneri nəinki klubdan qovmaq, hətta cinayət məsuliyyətinə cəlb etmək üçün də yetərincə hüquqi əsas var. Bu an "Neftçi" rəhbərliyi ya Tiranı göndərməli, ya da özü istefaya getməlidi! Daha real variant isə Katalinin katalizatorluğunun həm özünün, həm də klub rəhbərliyinin "Neftçi"dən qovulmasıyla nəticələnməsidi...


Anar ŞABANOĞLU

P.S. Tira Banişevskini tanımasa da, həmyerlisi Adrian Nyaqanı bəlkə tanıya. Nyaqa "Neftçi" tarixinin ən yaxşı legionerlərindən biri kimi azarkeşlərin ürəyində taxt qurub. Tira isə yadda qalsa-qalsa, bu rüsvayçı olaya görə qalacaq.

MÜƏLLİFİN DİGƏR YAZILARI

05.02.15

Son xəbərlər