"Qarabağ”ın qarşısını almağa çalışacaqlar"

"Neftçi" klubunun yarımmüdafiəçisi Mirhüseyn Seyidov Azərbaycan kubokunun 1/4 final mərhələsinin AZAL-la ilk oyunundan (0:0) sonra Qol.Az saytının suallarını cavablandırıb.

- Matçın yekun nəticəsini nəzərə alsaq, AZAL-ın sizə çətin anlar yaşatdığını deyə bilərik?

- AZAL bizə qarşı çox yaxşı mübarizə apardı. Rəqib çox qapalı oynadığı üçün qol vura bilmədik. Eyni zamanda qol da buraxmadıq. Kubok oyunları iki matçdan ibarət olsa da, istəyirdik ki, turun taleyini ikinci oyuna saxlamayaq. Amma alınmadı. Artıq hər şey geridə qaldı. “İnter”lə Premyer Liqada qarşılaşacağımız matçdan sonra bu oyuna yaxşı hazırlaşacağıq. Əsas məqsədimiz cavab qarşılaşmasında qalib gəlib, növbəti tura vəsiqə qazanmaqdır.

- Səncə, niyə bu matçda AZAL-ın müqavimətini qıra bilmədiniz? Oyununuz alınmırdı, yoxsa rəqib təslim olmadı?

- AZAL ancaq müdafiə futbolu oynadı. Onlar bu matça elə bunun üçün gəlmişdilər. Bizim elə də böyük səhvlərimiz olmadı. Amma özümüzü çətinə saldıq. Çünki hər şeyi cavab oyununa saxladıq. İnanıram ki, səfərdə qələbə bizim olacaq.

- Növbəti mərhələyə keçəcəyinizə bu qədər əminsən?

- AZAL-la son iki ayda üç dəfə qarşılaşmışıq. Ola bilsin ki, çətinliklər də elə buna görə yaranır. Çünki rəqib artıq bizim oyun stilimizi öyrənib. Cavab qarşılaşmasına bizdə tam əminlik var. İnanıram ki, heç bir problem olmayacaq.

- Bəzi əsas heyət oyunçularının meydana sonradan daxil olması sizə çətinlik yaratmadı?

- Bu dəyişiklik məşqçinin qərarıdır. Biz də bu qərara hörmətlə yanaşırıq. Kimin oynamağının fərqi yoxdur. Əsas odur ki, məğlub olmadıq və növbəti mərhələ şansımızı saxladıq.

- Çempionluq şansınız çoxdur, yoxsa kuboku qazanmaq?

- Bizim üçün çempionatda hər şeyin bitdiyini demək olmaz. Şansımız az olsa da, demək olmaz ki, lider “Qarabağ” qarşıdan gələn bütün oyunlarda qalib gələcək. Ona görə də nəyisə indidən demək tezdir. Yenə də düşünürəm ki, kubokda işimiz daha asandır. Ona görə də kubok oyunlarına ciddi hazırlaşmaq lazımdır.

- Demək istəyirsən ki, çempionluqdan az da olsa, əlinizi üzmüsünüz?

- “Qarabağ”ın öz meydanında “Qəbələ”yə məğlub olması çempionluq yolunda bizim şansımızı bir qədər artırdı. Onların xal itirməsi yaxşı oldu. Çünki fərq azaldıqca ilk pillələr uğrunda mübarizə aparan komandaların da həvəsləri qalır. “Qarabağ” turnir cədvəlində böyük xal fərqi ilə irəli olan vaxtlarda çempionat maraqsız idi. Amma ilk üçlükdə qərarlaşan komandalar arasında xal fərqi azaldığı üçün çempionatda maraqlı mübarizə yarandı. Komandalar çalışacaqlar ki, “Qarabağ”ın qarşısını alsınlar.

- Növbəti turlarda “Qarabağ”ın xal itirməsini arzulayırsınız?

- Biz qarşıdan gələn bütün oyunlara yaxşı hazırlaşıb xal toplamalıyıq və sonda “Qarabağ”ın xal itirməsini gözləməliyik.

- Çoxdandır klub prezidenti Sadıq Sadıqovu oyunlarınızda görmürük...

- Sadıq Sadıqov hər məşq zamanı bazada bizi izləməyə gəlir. Sadəcə AZAL-la oyun canlı yayımlandığından yəqin ki, televiziya vasitəsi ilə bizi izləyib.

Ergün SEYİD