"Heç olmasa, səhvlərini etiraf edəydilər" – Muarem

ÖLKƏ FUTBOLU 9 Fevral 2015 / 11:23 4806

- A +

"Qarabağ"ın futbolçusu Muarem Muarem Qol.Az saytına müsahibə verib. O, müsahibədə Premyer Liqada “Bakı” ilə oyun, Türkiyə superliqasına keçidinin alınmaması və digər məsələlər barədə danışıb

- Qış fasiləsindən sonra ilk rəqibiniz “Bakı”ya 4:1 hesabı ilə qalib gəldiniz. Bu matç barədə nə deyə bilərsən?

- Oyun yaxşı alındı. "Bakı" gənclərdən təşkil olunmuş komandadır. Bilirdik ki, bizə qarşı yaxşı mübarizə aparacaqlar. Antalya toplanışından sonra ilk rəsmi oyunumuz olduğu üçün tam hazır deyildik. Buna baxmayaraq, qarşılaşmada qalib gəldik. Qazanılan hər xal çempionluq yolunda bizi daha bir addım irəli atır.

- Böyük hesabla qalib gəlsəniz də, rəqib sonacan mübarizə apardı.

- Bu komanda bizə qarşı həmişə yaxşı oynayıb. Bu mövsüm ilk oyunumuz heç-heçə (2:2 – red.) bitmişdi. İkinci matçda qalib gəlsək də, bu, asan olmamışdı. Ona görə də “Bakı” ilə son oyuna yaxşı hazırlaşmışdıq.

- Yəqin ki, əsas rəqiblərinizdən olan “Neftçi”nin bu turda xal itirməsi sizi sevindirdi.

- Onların xal itirməsi bizim lehimizədir. Amma bu o demək deyil ki, bu iki komandanın nəticələrinə ümid etməliyik. Çempionatın sonuna hələ çox var və hər an turnir cədvəlində dəyişiklik ola bilər. Ona görə də bizim üçün əsas olan öz oyunlarımızdır. Başqalarının nəticələrinə ümid etmirik. Qarşımızda duran əsas vəzifə çıxdığımız hər oyundan maksimum xal toplamaqdır. Çünki bu mövsüm də çempion olmaq istəyirik.

- Nəvbəti turda AZAL-la qarşılaşacaqsınız. AZAL son iki turda iki güclü komandanı - “Neftçi” və “Qəbələ”ni məğlub etdi.

- AZAL üçüncü dövrədə bəlkə də ən yaxşı oyun göstərən komandadır. Hər iki rəqibi də son dəqiqədə vurduğu qollarla məğlub etdi. Bizi də çox çətin oyun gözləyir. Həm də səfər qarşılaşmasını süni meydançada oynayacağıq. Bu da bizə əlavə çətinlik yaradacaq.

- Qış fasiləsində Türkiyənin “Eskişehirspor” klubuna transferinin alınmaması səndə ruh düşkünlüyü yaratmayıb?

- Yox, hər şey qaydasındadır. Mən artıq o mövzunu bağlamışam . Hazırda “Qarabağ”da oynayıram və düşündüyüm tək şey komandamın uğur qazanmasıdır.

- Amma etiraf edək ki, Türkiyədə oynamağı çox istəyirdin...

- Təbii, Türkiyə superliqasında oynamağı kim istəməz ki? Mən hələ də bu istəyimdən vaz keçməmişəm. Amma klublar arasında razılıq əldə olunmadı. Bu qərara hörmətlə yanaşdım. Klubumla da əvvəlcədən danışmışdım. Əgər “Qarabağ”ın istədiyi kimi alınsa gedəcəm, əks təqdirdə qalacam.

- “Qarabağ”ın İtaliya “İnter”ilə Avropa liqasının son oyununda təmiz qolunun qeydə alınmamasıyla bağlı UEFA-ya etdiyi şikayət nəticəsiz qaldı. Bu barədə nə deyə bilərsən?

- Başqalarını bilmirəm, amma mən qərarın dəyişəcəyinə ümüd etmirdim. Çünki bu günə kimi hakim səhvlərindən verilən qərarların dəyişdiyini görməmişəm. Hakimlər yəqin o epizodu təkrar izləyiblər. Heç olmasa səhvlərini etiraf edəydilər.

Ergün SEYİD

Daha çox