"Klublarımız avrokuboklarda sözünü deməlidir" - Vaqif Sadıqov

ÖLKƏ FUTBOLU 23 Yanvar 2015 / 18:07 2411

- A +

AFFA-nın Məşqçilər Komitəsinin sədri Vaqif Sadıqov qurumun rəsmi saytına müsahibəsi

- Antalya səfəriniz yekunlaşmaq üzrədir. Səfər təəssüratlarınızı ümumiləşdirsək, hansı qənaətə gəldiyinizi deyə bilərsiniz?

- Burada olduğumuz müddəti səmərəli və işgüzar keçirdik. Klublarımızın, ən əsası isə aşağıyaşlı futbolçulardan ibarət yığmalarımızın oyunlarını, məşqlərini izlədik, baş məşqçiləri ilə söhbətləşdik. Görüşlərdən də hiss olunur ki, komitəyə inam böyükdür, gələcəkdə Azərbaycan futboluna xeyir verəcək addımlar gözləyirlər. Bütün sağlam qüvvələri birləşdirib, futbolumuz naminə işlər görmək istəyirik. Antalyada olduğumuz müddətdə maraqlı görüşlərimiz oldu. Həm U-17, həm də U-16-nın məşqçiləri ilə görüşdük. Futbolçulara çatdırdıq ki, gələcəkdə onlara böyük ümidlər bəslənilir. Öz üzərlərində işləməli, inkişaf etməli və futbolumuza xeyir verməlidirlər. Bu proseslər vacibdir. Klubların bizi dinləməsi, fikir mübadilələrinin qarşılıqlı anlaşma şəraitində keçməsi də xoş haldır. Bu işlərin bəhrəsini gələcəkdə mütləq görəcəyik.

- Klublarımızın çempionatın ikinci yarısına hazırlığı Məşqçilər Komitəsinin üzvləri tərəfindən necə dəyərləndirilir?

- Əgər Azərbaycan futbolunun inkişafından danışırıqsa, ilk növbədə klublara diqqət yetirməli, onlardan başlamalıyıq. Klublarımız çempionatda iddialı olmalı, yüksək yerlər uğrunda mübarizə aparmalı, avrokuboklarda da öz sözünü deməlidir. Hazırkı mənzərəyə diqqət yetirsək, klublarda işlərin peşəkar səviyyədə qurulduğunu görərik. Aparılan işlər tezliklə bəhrəsini verəcək. Klub-yığma sistemini bərpa etməklə, onların maraqlarını üst-üstə qoymaqla inkişafa nail olacağıq. Yenə deyirəm, səfər çox səmərəli, faydalı keçdi.

- Millinin futbolçuları toplanışlarda və yoxlama oyunlarında necə təsir bağışlayırlar?

- Milli komanda haqda çox danışmaq istəmirik. Çünki baş məşqçi də buradadır və köməkçiləri ilə birgə oyunları, məşqləri izləyir. Ehtiyac duyulsa, biz müəyyən tövsiyələr verə bilərik. Ancaq yığmanın üzvlərinin özlərini yaxşı tərəfədən göstərdiklərini deyə bilərəm.

- Diqqətinizi xüsusi cəlb edən futbolçular oldumu?

- Konkret adlar çəkmək istəmirəm. Amma belə futbolçular olub. Prosineçki və köməkçiləri bütün futbolçuları diqqətdə saxlayır.

- Klublarla, eləcə də yığma komandalarla görüşdüyünüzü dediniz. AFFA rəhbərliyinə təqdim etmək üçün hansı təklifləri hazırlayırsınız?

- Bunları sistem, layihə halına salmaq üçün müəyyən vaxt lazımdır. Biz indi tövsiyə xarakterli böyük layihə hazırlayırıq. Həmin təklifləri AFFA rəhbərliyinə təqdim edəcəyik.

Daha çox