"Ən azı bir futbolçu transfer edəcəyik" - Qurban Qurbanov

“Qarabağ”ın baş məşqçisi Qurban Qurbanov Türkiyənin Antalya şəhərində təlim-məşq toplanışı çərçivəsində Xorvatiyanın “RNK Split” komandası ilə keçirilən yoldaşlıq görüşü (1:3) haqda fikirlərini bildirib.

Qol.Az-ın məlumatına görə, o, oyundan sonra jurnalistlərin suallarını cavablandırıb.

- İlk öncə oyunla bağlı fikirlərinizi öyrənək...

- Hazırlıq prosesi qısa vaxt çərçivəsində olduğu üçün yoxlama oyununa istədiyimiz formada çıxa bilmirik.  Bu oyun ilk sınaq qarşılaşmamız idi. Matçdan razı qaldım. Sözün açığı qarşılaşmanın belə sürətli olacağını düşünmürdüm. İlk hissə bizim üçün bir az çətin keçdi. Amma ikinci hissədə topa nəzarət edən tərəf demək olar ki, biz idik. Belə bir nəticə gözləmirdik. Bütün futbolçularımız da meydanda çox həvəsli idilər. Məğlub olmağımıza baxmayaraq çox maraqlı oyun oldu. Həm yaxşı mübarizə, həm də çoxlu qol epizodları var idi. Sadəcə ilk iki qolda komandamız biraz diqqətsizlik etdi. Bu da normal bir şeydir. Çünki rəqibi tam yaxşı tanımırıq.Oyunçularımız belə komandalara qarşı diqqətli olmalıdırlar. Çünki təcrübəli komandaya qarşı mübarizə aparırdıq.

- “RNK Split” klubu U-17 millimizlə də yoxlama matçı keçirdi. Ancaq komanda bu dəfə fərqli futbolçularla meydana çıxmışdı.

- Sözün düzü “RNK Split” klubunun oyunçularını elə də tanımıram. Klub haqqında yaxından məlumatım olmadığı üçün dəqiq heçnə deyə bilmərəm. Amma xüsusilə ilk hissədə tamamilə əsas heyyətin oyunçuları ilə mübarizə apardılar. İkinci hissədə də rəqibin əsas aparıcı futbolçularının bəzilər dəyişilmədi. “RNK Split” ümumilikdə çox yaxşı kollektivə malik olan komandadır. Çox təcrübəli futbolçulara sahibdirlər.

- Komandanız Antalyadakı təlim-məşq toplanışına qoşulmadan öncə kifayət qədədər uzun fasilədə oldu. Futbolçular istirahətdən necə dönüblər?

- Futbolçuların çoxu fasiləni öz ailələrinin yanında  oldular. İstirahəti harda və necə keçirmələri bizim üçün o qədər də önəmli deyildi. Bizə maraqlı olan onların hansı vəziyyətdə dönmələri idi. Tapşırılan proqramı futbolçuların böyük əksəriyyəti yerinə yetirib və normal vəziyyətdə sıralarımıza qoşulublar. Onların hazırlıqlarının testini götürdük. Əksəriyyətinin göstəriciləri yaxşı idi. Amma aşağı nəticələri olanlar da oldu. Ümumi nəticədə gördük ki, həm yaxşı istirahət ediblər, həm də yaxşı hazırlaşıblar.

- Muarem Muaremin transferində son vəziyyət nə yerdədir?

-Muaremlə bağlı son iki gündür ki, danışıqlar müvəqqəti dayanıb. “Eskişehirspor” son təkliflərini göndərməlidir. Amma hal hazırda ciddi bir təklif yoxdur.

- Transfer danışıqları müvəqqəti dayanıb, yoxsa birdəfəlik?

- Bu məsələ ilə bağlı son nəticələr iki günə tam dəqiq bilinəcək.

- Razılıq əldə olunmamasının əsas səbəbi futbolçu üçün “Eskişihərspor”un aşağı məbləğ təklif etməsidir?

- Təklif olunan məbləğın az olması məsələsi də daxil olmaqla bəzi problemlər var ki, buna görə klublar arasında razılıq əldə olunmur. Biz də istərdik ki, futbolçumuz Türkiyə superliqasinda oynasın və klubla əməkdaşlığımız başlasın. Amma biz ilk öncə futbolçunu düşünməliyik. Oyunçumuzun özüdə bilməlidir ki, hara gedir. Bu məsələdə maraqlarımız önəmlidir. Biz futbolçumuzun gələcəyini düşünməliyik. Muarem Muarem bizim lazımlı oyunçularımızdandır. Qarşıda çempionatda bizi ağır oyunlar gözləyir. Buna görə də çempionatın 3-cü dövrəsinin başlamasına az qalmış əsas heyət oyunçularımızdan birini itirməyi istəmərik.Amma hər iki tərəfi qane edən razılıq olsa, futbolçunun qarşısını kəsmərik. Hər bir futbolçumuzun yaxşı kluba transfer olunması önəmlidir.

- Komandaya yeni futbolçular  dəvət edəcəksiniz?

- Bir neçə oyunçu var ki, onlarla maraqlanırıq. Klublar arasında razılıq əldə olunsa, ən az bir futbolçu transfer edəcəyik.

Ergün SEYİD
Antalya