"Rauf Əliyev hücumçu kimi özünü göstərdi" - Arif Əsədov

“Neftçi” klubunun baş məşqçisi Arif Əsədov Türkiyənin Antalya şəhərində təlim-məşq toplanışı çərçivəsində Səudiyyə Ərəbistanın  “Hacer” klubu ilə keçirilən yoxlama oyunundan (3:1) sonra Qol.Az saytının suallarını cavablandırıb.
 
- Qış fasiləsində “Neftçi” ilk yoxlama oyununa çıxdı. Komandanız necə təsir bağışladı?

- Hazırlıq prosesi çox yaxşı və intensiv şəkildə gedir. Hətta bugünkü oyuna çıxmamışdan öncə də məşqimiz olmuşdu. Ona görə də komanda fiziki cəhətdən yorğun görünürdü. Bizim üçün belə qarşılaşmalarda əsas nəticə deyil. Çalışırıq ki, bütün futbolçulara şans verək.

- Keçirdiyiniz yoxlama oyununa iki hücumçu ilə meydana çıxdınız. Amma əksər hallarda biz “Nefçin”ni tək hücumçu ilə meydanda görürdük...

- Əsas məqsədimiz bütün hücumçuları sınaqdan keçirməkdir. Növbəti oyunlarda da çalışacağıq ki, onların hamsını yoxlayaq. Hələlik heç bir taktiki dəyişiklik yoxdur. Növbəti oyunlarda komandanın potensialını artırmaq üçün əlimizdən gələi edəcəyik. Bu təlim-məşq toplanışında müxtəlif taktikalardan istifadə edəcəyik ki, bütün mövqelərdə futbolçuların yerini yaxşı təyin edə bilək.

- Elnur Allahverdiyevin "Neftçi"dən getməsinin səbəbi nədir?

- Bruno Bertuççi bizdən ayrıldıqdan sonra sol cinah müdafiə xəttində boşluq var idi. Yerli futbolçu baxımından həmin mövqedə klubumuzda oyunçu az olduğundan Elnur Allahverdiyevi transfer etmişdik. Bir çox oyunda bizə yararlı olsa da, sonradan intizamsızlıq etdi. “Xəzər Lənkaran”la oyunda qırmızı vərəqə alması isə bizim üçün artıq hər şeyi aydınlaşdırdı və komandadan göndərildi. O, artıq azad transfer hüququna malikdir və istədiyi kluba gedə bilər. Antalyaya gəlməmişdən öncə ona bildirdik ki, artıq özü üçün komanda axtara bilər.

- Bu gün (dünən - red.) yoxladığınız oyunçulardan etimadınızı doğruldanlar oldumu?

- Hazırda daha çox gəncləri yoxlayırıq. Fəhmin, Rahil və Mirkamil bu gün ümidləri daha çox doğrultdu. Onları artıq növbəti oyunlarda da meydanda görə biləcəyik. Bu təlim-məşq toplanışında da əsas məqsədimiz komandaya yeni futbolçular qazanmaqdır.

- “Neftçi”nin çempionatdakı oyunlarında həmin futbolçuları meydanda görə biləcəyikmi?

- Çalışacağıq ki, burda olduğumuz müddətdə bütün oyunçuları sınaqdan keçirək. Növbəti yoxlama matçlarında onlara yenə də şans verəcəyik ki, artıq sonda əsas heyəti müəyyənləşdirək. Ola bilər ki, onlardan da kimsə əsas komandaya düşsün.

- Mirhüseyin Seyidovdan narazılıq edirdiz oyunda.

- Bəzi epizodlarda tez-tez top itirirdi. Bununla bağlı ona narazılıq edirdim. Digər matçlarda da bu cür hadisələrlə qarşılaşa bilərik. Çünki komanda yorğundur. Buna görə də yoxlama oyunlarında belə hallar normaldır. Əsas məqsədimiz komandamızı çempionatın növbəti oyunlarına yaxşı hazırlamaqdır.

- Baxışa futbolçu dəvət edəcəksiz?

- Bu haqda indidən heç nə deyə bilmərəm. Hazırlığa hələ təzə başlamışıq. Amma növbəti matçlard ada hansısa mövqədə problemlər görsək, yeni oyunçular dəvət edə bilərik.

- Rauf Əliyevin oyunu sizi qane etdi?

- Bəli, bu gün Rauf Əliyev bir hücumçu kimi özünü göstərə bildi. O,  “Xəzər Lənkaran” da az qol vurmuşdu. Biz onunla söhbət etdik ki, ilk oyunlardan yaxşı oynayıb özü barədə inam yaratmalıdır.

- Rəhman Hacıyevlə anlaşa bildinizmi?

- Rəhman Hacıyev artıq bizimlə müqavilə bağlayıb. Amma onun Türkiyədən deportasiya olunması təlim-məşq toplanışımıza qoşulmasına mane oldu. Biz də qərar verdik ki, Bakıya qayıdandan sonra “Neftçi”nin düşərgəsinə qoşulacaq.

- “Adanaspor”un menecerləri və baş məşqçisi də oyunu izləyirdi. Dediklərinə görə, “Neftçi”nin heyətində bəyəndikləri futbolçular var. Xüsusilə Samir Məsimovu çox bəyəniblər.

- Bizim qapımız hər kəsin üzünə açıqdı. Gənc futbolçulara yaxşı klublardan dəvət olarsa, onun yolunu kəsmərik. Bu məsələ ilə bağlı heç nə deyə bilmərəm. Çünki real bir şey yoxdur. Amma Samir Məsimov daha yaxşı komandalarda oynamağa layiqdir.

Ergün SEYİD,
Antalya