“Nəticəmiz göstərdiyimiz oyuna uyğun deyil” – Rəşad Abdullayev

AZAL klubunun kapitanı Rəşad Abdullayevin Qol.Az saytına müsahibəsi

- Premyer Liqamızın son turunda “İnter”ə uduzdunuz. Görüş haqda fikirlərini bilmək istərdik.

- Səfər oyunu olsa da, meydana yalnız qələbə üçün çıxmışdıq. Çünki artıq qış fasiləsinə az qalıb. Fasiləyə yuxarı pillələrdə getmək istəyirik. Oyunun çtin olacağını bilirdik. Çünki “İnter”in uzun müddət bir yerdə oynayan kollektivi var. Məğlub olsaq da, yaxşı oyun sərgilədik. Qalib gələ də bilərdik. Demək olar ki, bərabər səviyyəli qarşılaşma oldu. İkinci hissənin ortalarından oyunun sonuna qədər isə üstün tərəf biz idik. Təəssüf ki, künc zərbəsindən qol buraxdıq.

- Yəni uduzsanız da rəqibdən zəif oynamadınız?

- Bəli, demək olmaz ki, hansısa komanda üstün oldu. Ani diqqətsizliyimdən qol buraxdıq. Müdafiəçilərimiz rəqibin hücumçusu Franko Nildonu boş buraxdılar, o isə bu səhvi bağışlamadı.

- Etiraf etmək lazımıdr ki, son turlardakı oyununuzu nümayiş etdirə bilmədiniz.

- Razıyam, son turlar komandamızın oyununda irəliləyiş var. Artıq futbolçular bir-birini yaxşı başa düşür, meydanda mübariz keyfiyyətlərin göstərirlər. Həm “Qəbələ”, həm də “Neftçala” ilə kubok oyununda hesabda geri olmağımıza baxmayaraq qaıib gəlməyi bacardıq. Bu da komandanın əzmkarlığından xəbər verir. “İnter”lə görüşə də qələbə əzmi ilə çıxmışdıq. Minimum hədəf isə uduzmamaq idi. Lakin belə alındı.

- Bəlkə qeyd etdiyin son qələbələr komandada arxayınlıq yaradıb?

- Biz bütün oyuna çıxanda danışırıq ki, hər matçın öz dəyəri var. Arxayınlaşmaq yox, əksinə, daha da artırmaq lazımdır.ki, turnir cədvəlindəki mövqeyimizi düzəldək. Məncə, hər bir futbolçumuz bunu dərk edir.

- Komandanız doğma meydanda qələbə qazana bilmir. Burada azarkeş amili nə dərəcədə rol oynayır? Nəzərə alaq ki, ən az azarkeş dəstəyi olan komandalardan biri AZAL-dır.

- İstər-istəməz azarkeş amili də burada rol oynayır. Azarkeş dəstəyi olmayanda evdə oynadığını hiss etmirsən. Sanki hansısa səfər matçındasan. Qonaq komanda təzyiqi hiss etməlidir. Onu da bilirəm ki, azarkeşləri stadiona gətirmək bizdən asıldır. Yəqin yaxşı oynamamışq ki, onlar bizdən üz döndərib. İndi azarkeşləri stadiona biz qaytarmalıyıq. Bunu oyunumuzla, qələbələrimizlə edə bilərik.

- Qış fasiləsinə az qalıb. AZAL isə hazırda 8-ci pilədə qərarlaşıb. Bu nəticə göstərdiyiniz oyuna uygundur?

-Əminliklə deyə bilərəm ki, bugünkü nəticəmiz göstərdiyimiz oyuna uyğun deyil. Bir neçə tur əvvəl “Simurq”la oyunda qələbəyə yaxın idik. Matça əlavə edilən 3-cü dəqiqədə qol buraxıb, qələbəni əldən verdik. Daha sonra “Qəbələ” ilə oyunda hakim qələbəmizə mane oldu. Əgər həmin oyunlarda qalib gəlsəydik, indi liderlər qrupunda olan komandalarla mübarizə apara bilərdik. Qış fasiləsinə qədər iki oyunumuz var. Çalışacağıq ki, bu görüşlərdən altı xal qazanaq. Qış fasiləsinə AZAL-ın layiq olduğu yerdə yollanmalıyıq. Səmimi deyirəm, komandamızın oyunu var, görürsünüz ki, rəqib qapılarına xeyli qo vurmuşuq. Ancaq qapımızdan da çox qol buraxırıq. Gərək bunun üzərində işləyək ki, qapımızı toxunulmaz saxlayaq.

- Deməli, hələ də çatışmazlıqlar var?

- Bəli, çoxdur. Komandamız 3-4 aydır ki, qurulub. Futbolçuların əksəriyyəti yenidir. Qış fasiləsində çatışmazlıqların üzərində işləyəcəyik və inanıram ki, istədiyimiz pilləyə yüksələ biləcəyik. Komandanın durumunu nəzərə alsaq, mövsümü 5 və ya 6-cı sırada tamamlamaq bizim üçün qənaətbəxş sayıla bilər. Ancaq komandamızın potensialı imkan verir ki, növbəti illərdə medallar uğrunda mübarizə aparsın.

Ramiq AĞAMƏMMƏDOV