Asif Məmmədov: “... “Neftçi" və “Qarabağ”dan fərqimiz budur"

"İnter" klubunun futbolçusu Asif Məmmədov Qol.Az saytına müsahibə verib. Topaz Premyer Liqanın XI turunda AZAL-la oyunda (2:0) qol vuran və məhsuldar ötürmə ilə yadda qalan yarımmüdafiəçi oyun haqda və digr sualları cavablandırıb

- Əvvəlcə AZAL-la oyunu dəyərləndirərdin.

- Həmin görüşdə qələbə bizə çox vacib lazım idi. Çünki məğlub olsaydıq, komandamız pis vəziyyətə düşəcəkdi. Ona görə heç-heçəni ağlımızdan keçirmirdik. Oyuna yaxşı hazırlaşmışıdq. Matçın gedişindən də bunu görmək olardı. Tək hesabda yox, oyunumuzla da AZAL-ı üstələdik. İnşallah bu qələbələrin ardı gələcək.

- Baxımlı qola imza atdın və məhsuldar ötürmə ilə yadda qaldın. Bu qələbəni fərdi ustalıq sayəsində qazandığınızı demək olar?

- Xeyr. Həmin oyunda rəqibi hər cəhətdən üstələdik. AZAL mübariz bir komandadır, yaxşı çıxış edirlər. Ancaq bu görüşdə biz daha yaxşı oynadıq.

- Rəqibin baş məşqçisi Vaqif Sadıqov komanda şəklində AZAL-ın daha yaxşı çıxış etdiyini bildirib.

- Vaqif Sadıqovun fikrinə hörmətlə yanaşıram. Ancaq komanda şəklində də biz güclü olduq. "İnter" elə bir komandadır ki, oyunu bir nəfər həll etmir, kollektiv şəkildə uğur qazanırıq. Qol vurdumsa, qol ötürməsi verdimsə, burada bütün komandanın zəhməti var. Yaxşı müdafiə olunduq, orta xəttə yaxşı mübarizə apardıq. Heç AZAL-ın real qol imkanı da olmadı. Bu da o deməkdir ki, bütün mövqelərdə yaxşı oynamışıq. Buna görə rəqibə bir şans belə vermədik.

- "İnter"in uğursuz çıxışları və bunun səbəbləri haqda danışmışıq. Artıq həmin problemlər aradan qalxıb?

- Artıq 4-5 oyundur ki, "İnter"in özünə gəldiyi hiss olunur. "Bakı" ilə matçdan sonra komandada özünəinam yaranıb. Komandamızın oyununda irəliləyiş görünür. "Bakı" ilə heç-heçədən sonra uğurlu seriya başladı. "Sumqayıt"a və "Xəzər Lənkəran"a qalib gəldik. Son dörd oyunda təkcə "Qəbələ"yə uduzduq. Həmin görüşdə də yaxşı çıxış etmişdik. Yəni artıq yeni gələn futbolçuların da komandanın sisteminə uyğunlaşdığını görürük. Bizə vaxt lazım idi ki, komanda əvvəlki oyun sisteminə otursun. Məncə, getdikcə daha yaxşı olacaq.

- Ancaq komandanız hələ "Qarabağ" və "Neftçi" kimi stabil çıxış edə bilmir.

- Dediyiniz komandalarda çox dəyişiklik olmadı. Bizdə isə, birdən-birə 12 futbolçu komandanı tərk etdi. Hansı ki, onlar əsas heyət oyunçuları idi. Diqqət yetirsəniz, görərsiniz ki, hazırda  "İnter"də keçən mövsümkü heyətdən cəmi 2-3 nəfər oynayır. Bunlar hamısı öz təsirini göstərir. Ancaq liderlər qrupunda olan komandalarda ən uzağı 4-5 oyunçu dəyişikliyi olub.

- "Qəbələ"də də xeyli dəyişiklik oldu. Ancaq "Qəbələ" ötən mövsümlə müqayisədə daha yaxşı çıxış edir.

- "Qəbələ" bizdən Vladimir Levini, Niasseni və Nizami Hacıyevi aldı. Onları yeni futbolçu adlandırmaq olmaz. Çünki yerli çempionata yaxşı bələd olan futbolçulardır. Yəni "Qarabağ" və "Neftçi" ilə bizim fərqimiz budur. 

- Növbəti turda "Rəvan"la qarşılaşcaqsınız. Bu oyun haqda düşüncələrin necədir?

- Şahin Diniyev "Rəvan"a gəldikdən sonra komandada böyük dəyişiklik olub. Ona görə də çətin oyun olacağını gözləyirik. Ancaq qələbələrin vaxtı çatıb. Yalnız üç xal üçün meydana çıxacağıq.

- Maraqlıdır ki, "İnter" bu mövsüm öz meydanında qələbə qazanmayıb. Bu sindroma son qoya biləcəksiniz?

- "İnter" nadir hallarda öz meydanında uduzan komandalardan idi. Keçən mövsüm təkcə "Neftçi"yə öz meydanımızda məğlub olmuşduq. Ancaq bu mövsüm ev qələbəmiz yoxdur.  Ona görə də mütləq azarkeşlərimizi sevindirməliyik.

Ramiq AĞAMƏMMƏDOV