Muarem Muarem: “Mənim yerimdə Reynaldo olsaydı...”

“Qarabağ” klubunun yarımmüdafiəçi Muarem Muarem Avroliqanın pley-off mərhələsində dünən “Ayntraxt”a qarşı keçirdikləri oyun (0:2) haqda Qol.Az saytına müsahibə verib.

- Dünənki qarşılaşma haqda fikirlərini bilmək istərdik.

-Oyuna tam hazır idik. Sərfəli nəticə qazanacağımıza inanırdıq. Ancaq təəssüf ki, qələbəni rəqib qazandı. Pis oynadığımızı deməzdim. Ancaq bundan da yaxşı oynaya bilərdik. Stadionun durumu çox pis idi. Ancaq bunu bəhanə etmək istəmirəm. Çünki bu vəziyyət rəqibə də təsir edirdi. Komandamız yerlə oynadığı üçün bizə daha çox mane oldu. Nəticəyə görə çox üzülürük. Ancaq qarşıda bizi ən azı 90 dəqiqəlik cavab oyunu gözləyir. Təkrar matçda bundan yaxşı çıxış edəcəyik.

- İlk dəqiqələrdən “Qarabağ” çox həyacanlı idi. Qolu da bu səbəbdən buraxdığınızı demək olar?

- Həyacanın olmağı normaldır. Çünki dördüncü təsnifat mərhələsinin oyununa çıxmışdıq, qrup mərhələsinin bir addımlığındayıq. Həm də rəqibdən o cür pressinq gözləmirdik. “Ayntraxt” bizi yaxşı analiz etmişdi. İlk dəqiqələrdən bu hiss olundu. İlk 10 dəqiqə dediyiniz kimi həyacanlı olduq, oyunumuz alınmadı. Beşinci dəqiqədə qol buraxmağımız isə oyunuma mənfi təsir etdi.

- Məğlubiyyətin əsas səbəbi kimi “Ayntraxt”ın “Qarabağ”dan güclü olmasını göstərmək olar?

- Komandalar arasında böyük bir fərq görmürəm. Düzdür, rəqibimiz keçən mövsüm Bundesliqanı altıncı yerdə bitirib, ancaq qalib gələ biləcəyimiz bir komandadır. Məncə, məğlubiyyətin əsas səbəbi təcrübəsizliyimiz oldu.

- Axı, “Qarabağ”ın da kifayət qədər Avropa təcrübəsi var.

- Təbii ki, var. O qədər də demirəm. Ancaq “Ayntraxt”la müqayisədə təcrübəmizin az olduğu göründü. Çünki biz qol epizodlarından yararlana bilmədik, onlar isə fürsətlərdən yaxşı istifadə edib iki qol vurdular. Yəni çox da asan olmayan epizodlardan fərqləndilər.

- Razısan ki, Reynaldonun yoxluğunda hücum xəttindəki boşluğu doldura bilmədiniz?

- Təbii ki, Reynaldo komanda üçün çox faydalı oyunçudur. Əgər o, oynasaydı, nəticə başqa cür olardı. Ancaq yenə də oyuna 11 nəfərlə çıxırıq. Buna çox da fikir vermək lazım deyil.

- “Qarabağ”ın əvvəlki illərdə daha çox oyunçusu qollar vurmaqla azarkeşləri sevindirirdi. Ancaq indi 1-2 futbolçusu komandanın qol ümididir. Yəni “Qarabağ”ın fərdi oyunçulardan asılı vəziyyətə düşdüyünü demək olar?

- Mən belə düşünmürəm. Düzdür, Reynaldo indi yaxşı formadadır, komandanın vacib qollarını vurur. Ancaq mən də daxil olmaqla bir neçə futbolçumuzun qol imkanları olur. Dünənki oyunda da qol vurmaq üçün yaxşı imkanım oldu. Bəlkə də mənim yerimdə Reynaldo olsaydı, həmin imkanlardan fərqlənə bilərdi. Ancaq “Qarabağ”da xeyli futbolçu var ki, qol vurmaq gücündədir. Məncə, komandamız hansısa futbolçudan asılı vəziyyətdə deyil.

- “Qarabağ” Ayntraxt”a tam gücünü göstərə bildi?

- Dediyim kimi ilk dəqiqələrdən ciddi pressinqlə üzləşdik. Ona görə də biraz sıxıntı keçirdik. Bu səbəbdən də erkən qol buraxdıq. Buna baxmayaraq 90 dəqiqə ərzində hesabı dəyişə bilərdik. Deməzdim ki, tam gücümüzü ortaya qoya bildik.

- Baş məşqçiniz Qurban Qurbanov “Qarabağ”ın mərhələni adlamasının çox çətin olacağını bildirib. Sən necə Almaniyada “Ayntraxt”a 2 qol vuracağınıza inanırsan?

- Ümidimiz tükənməyib. İsənilən nəticə qeydə alına bilər. Bakıdakı oyunda qol vəziyyətlərini dəyərləndirə bilmədiksə, inşallah cavab oyununda bu şanslardan istifadə edəcəyik. Başa düşürük ki, 2:0 qalibiyyətdən sonra “Ayntraxt”ın şansı daha çoxdur. Ancaq səfər meydanında daha yaxşı oynayacağımıza söz veririk. “Qarabağ” rəqib meydanlarında az qələbə qazanmayıb.

- Türkiyə klubundan təklif almağınla bağlı xəbərlər var.

- Bu haqda məlumatım yoxdur. Ola bilər ki, klublar arasında danışıq olub, ancaq mənə  heç nə deməyiblər.

Ramiq AĞAMƏMMƏDOV