Artim Şakiri: "Qarabağ"da işləmək istərəm, ancaq..."

Makedoniya millisinin və “Qarabağ” klubunun sabiq futbolçusu Artim Şakirinin Qol.Az saytına müsahibəsi

- Artim, hazırda nə işlə məşğulsunuz?

- Makedoniyanın "Skendiya" klubunu çalışdırırdım. Ancaq cümə axşamı komanda ilə yollarımı ayırdım. Hazırda işsizəm.

- Ayrılığa səbəb nə oldu?

- Komanda ilə 1 illik müqaviləm var idi. Ancaq çox işləyə bilmədim. Səbəb isə komandanın büdcəsinin olmaması idi. Sponsor da tapmaq mümkün deyildi. Hədəfi olmayan komandada işləmək çətindir. Ona görə ayrıldım.

- Gələcək planların haqda nə deyə bilərsən?

- Hələ ki, evdəyəm. Bir-iki həftə ailəmlə birgə istirahət edəcəyəm. Daha sonra isə özümə yeni klub axtaracağam. Ancaq işləyəcəyim komanda Makedoniyada olmayacaq. Artıq ölkədən kənarda işləmək istəyirəm.

- Azərbaycan klublarından təklif alsanız, qəbul edərsiniz?

- Əlbəttə, edərəm. Azərbaycanda xoş xatirələrim var. Mənim üçün də maraqlı olar.

- Hansı komandada işləmək istərdiniz?

- Təbii ki, "Qarabağ"da. Çünki bu komanda mənə çox doğmadır. Ancaq "Qarabağ"ın hazırda çox yaxşı baş məşqçisi var. Qurban Qurbanov uzun müddətdir ki, "Qarabağ"ı çalışdırır. Ona görə də düşünürəm ki, "Qarabağ"ın yeni baş məşqçiyə ehtiyacı yoxdur.
  
- Digər klublarımızda necə, işləyə bilərsiniz?

- Yüksək yerlər uğrunda mübarizə aparan komandada işləyə bilərəm. Görək də, necə olur. 

- Avropa Liqasının I təsnifat mərhələsinin ilk oyunu çərçivəsində Makedoniyada keçirilən "Metallurq" - "Qarabağ" oyununu izlədiniz?

- İzlədim. "Qarabağ" aşkar üstün idi. Layiqli qələbə qazandılar. Düşünürəm ki, "Qarabağ" Bakıda da qalib gələcək.

- Ümumilikdə sabiq komandanın Avroliqada şanslarını necə dəyərləndirirsən. "Qarabağ"ın hansı mərhələyə qədər irəliləyəcəyini düşünürsən?

- Bu, daha çox "Qarabağ"a düşəcək rəqiblərdən asılı olacaq. Ümid edirəm ki, "Qarabağ" bu mövsüm qrup mərhələsinə düşə biləcək.

- Azərbaycanın Avroliqadakı digər iki təmsilçisi - "İnter" və "Xəzər Lənkəran" da ilk oyunlarını keçirdilər. Bu komandaların şanslarını necə dəyərləndirirsiniz?

- Hər iki komanda ilk oyunda 1:1 oynamasına baxmayaraq, mərhələni keçəcəklərini düşünürəm. Nəinki "İnter" və "Xəzər Lənkəran", "Qarabağ" və "Neftçi"nin də ilk mərhələni uğurla keçəcəyini düşünürəm.

- Bu mövsüm Azərbaycanı Çempionlar Liqasında "Neftçi" klubu təmsil edəcək. Rəqib isə Albaniya "Skenderbeu"sudur. Bu cütlükdə kimi daha şanslı görürsünüz?

- Təbii ki, "Neftçi" bu cütün aşkar favoritidir. Ancaq "Skenderbeu"nu da kiçiltmək olmaz. İstənilən halda "Neftçi" bu səddi keçəcək.

- Azərbaycan futbolunu izləyirsinizmi?

- Bəli. İzləyirəm. Ancaq internet üzərindən oyunların nəticələri ilə maraqlanıram. Bəzən də "Qarabağ"ın oyunlarının videoyazılarını izləyirdim.

- Hansı komandanın oyunu bəyənirsiniz?

- "Qarabağ". Çünki ən çox "Qarabağ"ın oyunlarını izləyirdim.

- Azərbaycan Premyer Liqasının ötən illərlə müqayisədə inkişaf etdiyini söyləmək olarmı?

- Əlbəttə. Premyer Liqanızda artıq çempionluğa oynayan komandaların sayı çoxalıb. Rəqabət də artıb. İnkişaf hiss olunur.

- "Xəzər Lənkəran" klubunun hazırki baş məşqçisi Con Benjamin Toşak 2011-2012-ci illərdə Makedoniya millisini çalışdırıb. Bu mütəxəssis haqda fikirlərinizi öyrənək...

- Çox təcrübəli mütəxəssisdir. Onun karyerası genişdir. Avropada özünü sübut etmiş biridir. İnanıram ki, Toşak "Xəzər Lənkəran"da uğur qazana biləcək.

- Sizcə, Toşak Makedoniya millisində niyə uğur qazana bilmədi?

- Bunun səbəblərini biz deyə bilmərik. Çünki çox şeydən xəbərimiz yoxdur. Futbolda hər bir uğursuzluqda müxtəlif səbəblər olur. Ən doğrusunu elə Toşakın özü bilir.

Vüsal HÜSEYN