“Rəhbərliklə razılığa gələ bilmirik”

AZAL klubunun yarımmüdafiəçisi Viktor İqbekoyinin Qol.Az saytına müsahibəsi

- Son zamanlar AZAL-dan ayrılacağınla bağlı xəbərlər yayılıb. Bu, nə dəcərədə doğru məlumatdır?

- Xeyr. AZAL-dan ayrılmamışam. Rəhbərliklə söhbətimiz olub. Ancaq hələ ki, razılığa gələ bilmirik.

- Belə çıxır ki, razılıq əldə olunmasa, komandadan gedəcəksən...

- Bəli. Bunu hər kəs bilir ki, AZAL-da maliyyə problemləri var. Bu səbəbdən də anlaşa bilmirik.

- Digər klublardan təklif almısanmı?

- Əlbəttə. Təkliflər almışam. Lakin hələlik komandalar istirahətdə olduğundan düşünmək üçün vaxtım var.

- Həmin komandaların adlarını çəkə bilərsən?

- Yox. Qoy sirr qalsın. Həm də ortada dəqiq bir şey yoxdur. Üstəlik, ola bilsin ki, elə AZAL-da qaldım.

- Bildiyimiz kimi, komandanız müəyyən müddətə istirahətə buraxılıb. Sənin istirahətin necə gedir?

- Mən Bakıdayam. Həm istirahət edir, həm də əylənirəm. Ancaq məşqlərimə də ara vermirəm.
 
- Mövsümün sonunda bir sıra aparıcı futbolçular - Junior Nildo, Zohair Benouahi və Usim Nduka AZAL-ı tərk etdi. Bunu necə qarşıladın?

- Onlar peşəkar futbolçulardır. Azərbaycanın digər klublarından sərfəli təkliflər aldılar və getdilər. Bunu normal qarşıladım. Hər kəsin qərarına hörmətlə yanaşıram.

- AZAL-ın ötən mövsümkü çıxışını necə dəyərləndirirsən?

- AZAL çox yaxşı komandadır. Yüksək səvityyəli oyunçulara sahib idi. Ancaq AZAL ötən mövsüm turnir cədvəlində layiqli pillədə qərarlaşmamışdı. Bununla belə, futbolda istənilən nəticəyə hazır olmalısan. Ola bilsin növbəti mövsüm AZAL daha yaxşı çıxış etsin. Lakin təəssüf ki, AZAL artıq bir neçə aparıcı futbolçusunu itirib.

- Artıq 4 ildir ki, Azərbaycan çempionatında oynayırsan. Ötən illərlə müqayisədə hansısa fərq hiss olunurmu?

- Təbii ki, inkişaf nəzərə çarpır. Azərbaycan klubları futbola böyük maliyyə vəsaiti ayırır, yeni futbolçular transfer edir və təcrübəli mütəxəssisləri ölkəyə gətirirlər. Artıq klublarınız avrokuboklarda daha inamlı təsir bağışlayır.

- Azərbaycanın ən güclü komandası kimi hansı klubun adını çəkə bilərsən?

- Bu gün üçün "Neftçi"ni fərqləndirərdim. Çünki onlar həm Azərbaycan Premyer Liqasının, həm də ölkə kubokunun qalibi oldular.

- Hansı komandanın oyununu daha çox bəyənirsən?

- Fərq qoymaq istəməzdim. Hər klubun özünəməxsus oyun üslubu var. Eləcə də AZAL-ın.

- Bu mövsüm Azərbaycanı Avrokuboklarda təmsil edəcək 4 komandanın hansından daha böyük uğur gözləyirən?

- Dediyim kimi, Azərbaycan futbolu inkişaf mərhələsindədir. Klublar Avrokuboklarda ildən-ilə daha yaxşı çıxış edirlər. Ümid edirəm ki, bu mövsüm Azərbaycan futbolu üçün daha uğurlu olacaq. Bütün komandalar uğurlar arzulayıram.

- AZAL haqda nə deyərdin? Komandanın növbəti mövsüm avrokuboklara vəsiqə qazanacağına ümid etmək olar?

- AZAL daha öncə də Avrokuboklarda çıxış edib. Ancaq bu mövsüm bizdə alınmadı. Növbəti mövsüm nə olacağını Allah bilir. Futbolda hər şey ola bilər. Ancaq bunun üçün komanda yaxşı futbolçulara sahib olmalıdır. Çünki uğur yalnız yüksək səviyyəli futbolçularla qazanılır.

- Sonda AZAL azarkeşlərinə nə deyərdin?

- İlk öncə bütün azarkeşlərimizə mövsüm boyu bizi dəstəklədikləri üçün təşəkkür edirəm. Növbəti mövsüm onları uğurlarımızla sevindirməyə çalışacağıq.



Vüsal HÜSEYN