Arif Əsədov: “Millidə boşluqlar var, sabit heyət yoxdur”

Azərbaycanın U-19 millisinin baş məşqçisi Arif Əsədovun Qol.Az saytına müsahibəsi

- Milli komandamız DÇ-2014-ün seçmə mərhələsində doğma meydanda Lüksemburqa qalib gələ bilmədi. Oyun haqda fikirlərinizi bilmək istərdik.

- Hamımız millimizdən qələbə gözləyirdik. Hiss olunur ki, futbolçularda da istək çox idi. Amma ilk 10-15 dəqiqədə qol vursaydıq, onda istədiyimiz nəticəni qazana bilərdik. Hətta 2-3 qol da vura bilərdik. Ancaq vaxt uzandıqca rəqibdə də özünəinam yarandı. Ona görə də ikinci hissə başlayanda futbolçularımız oyunu itirmişdi. Vaxt sıxlığı yarananda oyunçular istənilən kimi çıxış edə bilmir. Qol vurandan sonra hesabı qoruya bilmədik. Nəticədə oyun 1:1 hesabı ilə başa çatdı. Əlbəttə, öz meydanımızda Lüksemburqa qalib gəlməli idik. Futbolçularımıza heç cür haqq qazandırmaq olmaz.   Çünki Lüksemburq elə bir rəqib idi ki, qələbə qazanmağa borclu idik.

- Ancaq Lüksemburq da bizi güclü saymır. Çünki 1:1 hesabına sevinmirdilər. Sanki Bakıdan qələbə ilə getmək istəyirdilər.

- Biz Lüksemburqu zəif hesab edirik. Ancaq onlar da bizim haqqımızda elə düşünür. Məncə, eyni səviyyəli komandalardır. Ona görə də onlar burdakı heç-heçəni minimum nəticə kimi qəbul edirlər. Həm də rəqib son dəqiqələrdə qol imkanlarından istifadə etsəydi, qalib də gələ bilərdi. Bu baxımdan da sevinməyə bilərlər.

- Bir mütəxəssis kimi komandamızın Lüksemburqa qalib gələ bilməməyinin səbəblərini nədə görürsünüz?

- Komandada boşluqlar hiss olunur. Hələ ki, sabit heyət yoxdur ki, futbolçular bir-birini yaxşı başa düşsün. Hər dəfə 2-3 yeni oyunçu ilə meydana çıxanda belə olmalıdır. Hiss olunur ki, futbolçular bir-birini anlamırdı. Qələbəni əldən verməyimizin əsas səbəbi isə qol imkanlarından istifadə etməməyimiz oldu.

- Artıq neçə oyundur ki, komandamız doğma meydanda da qalib gələ bilmir. Sizcə, bu uğursuzluğun günahı kimdədir?

- Məncə, təqsiri həm baş məşqçi, həm də futbolçularda axtarmaq lazımdır. Bunları bir-birindən ayırmaq olmaz.

- Çoxları hesab edir ki, Berti Foqtsun getmək vaxtıdır.

- Daha yaxşısını futbolu idarə edənlər bilər.

- Hər bir ev oyununda azarkeşlər Berti Foqtsu istefaya səsləyir. Buna münasibətiniz necədir?

- Bizdə bəzən istefa şüarının lazım olmayanda da səsləndirirlən. Mən “Neftçi”də baş məşqçi olanda komanda altı ildən sonra çempion olmuşdu. Amma Çempionlar Liqasında “Dinamo” (Zaqreb)  ilə öz meydanımızda qarşılaşmanın 60-cı dəqiqəsində, hesab açılmayan bir vaxtda bir qrup azarkeş istefa şüarı səsləndirməyə başladı. Təbii ki, öyrədilmiş azarkeş qrupu olur. Amma bütün azarkeşlərin “istefa” qışqırması başqa məsələdir.

- U-19 millimizdə işlər necə gedir?

- İyunun 21-də Bakıda toplanışımız olacaq. İki gündən sonra Avstriyaya növbəti təlim-məşq toplanışına gedəcəyik. Orada üç yoldaşlıq oyunu nəzərdə tutulub. U-19 liqasından milliyə cəlb etdiyim futbolçulara həmin oyunlarda da baxmaq istəyirəm. Hər ay təlim-məşq toplanışı keçiririk. Avstriyada olacaq toplanışımız isə Avropa Çempionatına hazırlıq xarakteri daşıyır. Ona görə futbolçuları bir daha yoxlamalıyam ki, oktyabrda ilk seçmə oyunumuzda yaxşı oyunçular qıraqda qalmasın.

- Klubundan ayrıla bilməyən bəzi futbolçular var idi. Onların problemini həll edə bildiniz?

- Mirkamil Həşimliyə dəvət göndərmişik. Özü ilə danışmışam. “Fənərbaxça”ya faks göndərmişik. O, artıq Bakıdadır. Onunla artıq problem həll olunub. Digər futbolçuların klubları ilə danışqlar gedir. Həll edə bilsək, yaxşı olacaq.

Ramiq AĞAMƏMMƏDOV