“Çox güman ki, baş məşqçimiz elə Yuri Syomin olacaq”

“Qəbələ” klubunun vitse-prezidenti Fariz Nəcəfovun Qol.Az saytına müsahibəsi

- Bu gün klubunuz prezidenti Tale Heydərovla “Qəbələ”nin baş məşqçi vəzifəsinə əsas namizəd Yuri Syomin arasında görüş keçirilib. Danışıqlara əsasən hansı razılığa gəlinib?

 - Bəli, bu gün klub prezidenti Tale Heydərov Yuri Syominlə görüşüb. Hər iki tərəf şərtlərini və məqsədlərini bildirib. Demək olar ki, ilkin razılığa gəlinib. Ancaq ikitərəfli razılaşmaya əsasən məsələyə bir həftədən sonra aydınlıq gələcək. Mayın 20-nə qədər isə bu iş tam həll olunacaq.

- O vaxta qədər Syominlə təkrar görüş nəzərdə tutulub?

- Bu gün Syomin Qəbələyə gedəcək. O stadionlara, məşq keçdiyimiz meydançalara şəxsən baxmaq istəyir. Orada klubla daha yaxından tanış olmaq fikrindədir. “Qəbələ” haqda özündə fikir formalaşdırmaq istəyir. Axşam isə Bakıya qayıdıb, klub haqda təəssüratlarını bildirmək üçün mənimlə görüşəcək.

- Sizcə bu mütəxəssis “Qəbələ”nin bu uğursuz çıxışlarına son qoya bilər?

- Bizim məqsədimiz də odur ki, “Qəbələ”ni bu çətin vəziyyətdən qurtaraq. Ona görə çalışırıq ki, təcrübəli mütəxəssislə müqavilə imzalayaq. Axtarışda olan məşqçilərin hamısı təcrübəlidir. Bunların içərisində Yuri Syomin də var. Çox güman ki, baş məşqçimiz elə Yuri Syomin olacaq.

- Sizə də elə gəlirmi tez-tez baş məşqçi dəyişikliyi komandanın oyununa mənfi təsir edir, uğursuz çıxışların bir səbəbi də budur?

- Əlbəttə, bunu bilirik. Futbolçuların qeyri-sabit oynamsının səbəbi də budur. Amma dəyişikliyə məcbur olanda bunu etməlisən. Etməyəndə, daha pis nəticə ola bilər. Luis Araqonu saymasaq, bu il “Qəbələ”də iki baş məşqçi dəyişib. Fatih Kavlak və Ramiz Məmmədov baş məşqçi postuna təyin olundular. Deyərdim ki, ümidləri doğrultmadılar. Ramiz müəllim özü istefa versə də, istənilən halda nəticə yox idi. Yəqin ki, Ramiz müəllim də bunu nəzərə alıb istefa verdi. Əgər baş məşqçi dəyişikliyi labüddürsə, bunu vaxtında etmək lazımdır.

- “Bakı” ilə oyun haqda nə deyə bilərsiniz? Komandanız səkkiz oyunluq qalibiyyətsizlik seriyasına son qoydu.

- Komanda yaxşı çıxış etdi. Məni sevindirən əsas Tərzin Cahangirovun oyunu idi. Bidiyiniz kimi Tərzin “Qəbələ” Futbol Akademiyasının yetirməsidir. Onun oyunu məni çox sevindirdi. Həqiqətən onun dünənki  çıxışından zövq aldım.

- “Qəbələ”nin qışda etdiyi transferlər özünü doğrultdu?

- Onların içərisində bəziləri var ki, yaxşı çıxışı ilə yadda qalır. Yəqin ki, komandada qalacaqlar. Mənə elə gəlir ki, yeni gələcək baş məşqçi onlara şans verəcək. Fikrimcə onlar müəyyən mənada baş məşqçinin etimadını doğrulda bilərlər. Amma bəziləri də var ki, hələ bir illik müqaviləsi olmağına baxmayaraq, komandadan göndəriləcək. Bunlara yeni baş məşqçi təyin olunandan sonra aydınlıq gələcək.

- Gələn mövsüm üçün indidən hansısa səviyyəli oyunçunun transferi  nəzərdə tutulub?

- Hər şey yeni baş məşqçidən asılı olacaq. Baş məşqçinin fikri çox önəmlidir. O, komandanı nə cür görmək istəsə, bizdə ona o cür kömək etməyə çalışacağıq. Sözsüz ki, hər şey bizim nəzarətimizdə olacaq.

- Yeni gələcək baş məşqçi ilə “Qəbələ” hansı məqsədlər üçün çalışacaq?

- Məqsədimiz təbii ki, avrokuboklara vəsiqə qazanmaqdır. Cari mövsüm də bunun üçün çalışırdıq, ancaq alınmadı. Komanda çempion olarsa, lap yaxşı. Minumum avrokuboklara vəsiqə qazanmaq istəyirik.

Ramiq AĞAMƏMMƏDOV