“Lüksemburqu da udmasaq, inkişafdan danışmaq olmaz”

“Qarabağ” klubunun yarımmüdafiəçisi Namiq Yusifovun Qol.Az saytına müsahibəsi

- Millimiz martın 22-də Lüksemburq, martın 26-da isə Portuqaliya yığması ilə qarşılaşacaq. Bu oyunlar haqda fikirlərin necədir?

- İnşallah, komandamız qalib gələr. Lüksemburqu da udmasaq, futbolumuzda inkişafından danışmaq olmaz. Bu rəqibin adı gələn kimi hamı fikirləşir ki, udmalıyıq. Lixtenşteyn kimi bir komandadır. Demirəm ki, qalib gəlmək asan olacaq. Asan rəqib yoxdur. Amma hər halda Lüksemburqdan qələbə ilə qayıtmaq lazımdır. Portuqaliya ilə oyun isə bəlkə də daha asan olacaq. Çünki evdə oynayacağıq, meydança amili var, ot örtüyünün o səviyyədə olmaması Portuqaliya yığmasının işini çətinləşdirəcək. Doğma azarkeşlər qarşısında millimiz yaxşı oynayır.

- Səncə, millimizin hazırkı heyəti buna qadirdir?

- Milliyə çağırılan futbolçularla bağlı heç nə demək istəmirəm. Baş məşqçi onlara inanıb. Onlar da gərək nəticə göstərsin. Bu gün qələbəyə də, məğlubiyyətə də Berti Foqts cavabdehdir.

- Komandanızın on futbolçusu milli komandaların düşərgəsindədir. Hər dəfə milli komandaların matçından sonra “Qarabağ”ın oyununuzda qeyri-stabillik olur, futbolçularda yorğunluq hiss olunur. Bu dəfə də belə olacağından qorxmursunuz?

- AFFA-nın qərarı belədir. Buna nəsə deyə bilmərik. Futbolçularımız özləri də millinin şərəfini qorumaqdan məmnundular. Ancaq dediyiniz faktlar var. Gərək futbolçularımız millidən qayıtdıqdan sonra özlərini tez bərpa etsinlər, oyuna hazır olsunlar. Bir məsələ də var ki, Foqts  “Qarabağ”dan yeddi futbolçu çağırsa da, hamısı oynamayacaq. Zədəsinə görə ola bilsin Maksim Medvedyev oynamadı. Bu halda uzağı üç futbolçu oynayacaq.

- “Qarabağ” keçən turda “Simurq”a məğlub oldu. Məğlubiyyətin səbəbi nə idi? Rəqibə hansı göstəricilərdə uduzdunuz?

- Demək olmaz ki, “Simurq” hardasa bizi üstələdi. Oyuna əvvəldən biz yaxşı başlamışdıq. İki qol imkanımız da oldu. Orta xəttə adi səhv etdik, oyunçuları tutmadıq. Buna görə də qapımızda qol gördük. Ondan sonra da “Simurq” müdafiəyə çəkildi və qol vurmağımıza imkan vermədi. Hamı bilir ki, “Simurq” a öz meydanında qol vurmaq çətindir. Yaxşı müdafiə olunurlar. Meydança amilini də özünü göstərdi. Oranın süni örtüyü bərbad vəziyyətdədir. Meydançanın vəziyyəti  ötürmələrə çox mane olurdu. “Simurq”la öz meydanımızda oynayanda demək olar ki, birinci hissə də rəqibin ayağına top dəyməmişdi. Çünki ideal ot örtüyündə oynayırdıq. Ola bilsin, Zaqataladakı matçda oyuna yaxşı köklənməmişdik. Ancaq əsas meydança amili işimizi çətinləşdirdi. Yenə deyirəm, “Simurq”un hesabdan başqa heç bir üstünlüyü olmadı. Vurulan qolda da bizim səhvimiz oldu. Demək istəyirəm ki, biz nəsə etmək istəyəndə, bu alınmayanda, rəqiblər bizə qol vurur.

- Bu məğlubiyyətdən sonra “Neftçi” ilə xal fərqiniz altıya endi. Çempionluğa inamınız azalmayıb?

- Altı xal elə də çox deyil. Ancaq bu fərqi aradan qaldırmaq üçün çox əziyyət çəkməli olacağıq. Çempionluğa oynayan komanda bundan sonra ancaq qalib gəlməlidir. Oturub kiminsə xal itirməyin gözləməkdən artıq keçib. Qarşıda doqquz oyunumuz var. Birdə görürsən üç oyuna altı xallıq fərqi aradan götürmək olur.

- Topaz Premyer Liqanın 24-cü turunda “Qəbələ” ilə qarşılaşacaqsınız. Komandanızda yorğunluğu nəzərə alsaq, şanslarınızı necə görürsən?

- Futbolçularımız millinin düşərgəsindən gələndən sonra görək nə vəziyyətdə olacaqlar. Həmişəki kimi qələbəyə oynayacağıq. Ancaq “Qəbələ”ni yaxşı tanıyırıq. Bilirik ki, müdafiəni də unutmaq olmaz. Təhlükəli hücumçuları var. Biz komanda şəklində oynasaq da, “Qəbələ” fərdi oyunçuların hesabına uğur qazanmaq istəyir. Ona görə də bu komanda ilə oyunumuz alınmır. “Qəbələ” ancaq bizim səhvimizi güdür ki, bundan istifadə etsin. Səhvsiz komanda olmur. Hardasa səhvə yol veririk. Biz irəli atılırıq, onlar müdafiədə oturur. Bizə qolun da çoxunu standart vəziyyətdən vurublar.

Ramiq AĞAMƏMMƏDOV