Topaz Premyer Liqanın ən gənc baş məşqçisi: “Mən öz dəsti-xəttimlə gedirəm"

O, Azərbaycan milli çempionatları tarixinin ən gənc baş məşqçidir. Söhbət Kamal Alispahiçin gedişindən sonra “Rəvan”a baş məşqçi təyin edilən Ramil Əliyevdən gedir. Məşqçiliyə necə gəlib? Onun üçün bu yaşda peşəkar bir komanda çalışdırmaq çətin deyil ki? Bu və digər suallarla Qol.Az saytının müxbiri R.Əliyevə müraciət edib.

- Ramil müəllim, neçə yaşınız var?

- 27.

- Azərbaycan Premyer Liqası tarixində ən gənc baş məşqçi olduğunuzu bilirdiniz?

- Düzü, fikir verməmişdim, sizdən eşitdim.

- Sizin barənizdə həm jurnalistlərdə, həm də azarkeşlərdə məlumat çox azdır. Bəlkə özünüz haqda bir qədər danışasınız.
 
- Doqquz yaşımdan Mərkəzi Ordu İdman Klubunun (MOİK – red.) uşaq-gənclər futbol məktəbində oynamışam. Sonra Yadigar Rəhimovun rəhbərliyi altında MOİK-in əsas heyətində çıxış etmişəm.  Futbolu tez buraxdım. 2005-2007 ci illərdə MOİK-in aşağı yaş qrupunda baş məşqçi olmuşam.  2007-ci ildə isə birinci divizionda çıxış edən  MOİK-in baş məşqçisi təyin olundum. İlk ilimdə komandamız uğurlu çıxış edərək güclülər dəstəsinə qoşuldu. Sonra rəhbərliyin qərarı ilə yeni baş məşqçi gəldi və mən əvəzedici heyəti çalışdırdımağa başladım. Elə oldu ki, MOİK yenidən birinci diviziona düşdü və yenə komanda mənə tapşırıldı. Yenidən Premyer Liqaya çıxdıq. Bundan sonra isə baş məşqçi kimi özüm işlədim.

- Belə deyək, sizə aid rekordu hələlik təkrarlayan olmayıb. MOİK-də işləyəndə də Premyer Liqada ən gənc baş məşqçi olmusunuz, “Rəvan”a keçəndə də..

- Elədir.

- Azərbaycan Premyer Liqasında təcrübəli mütəxəssislərlə mübarizə aparmaq sizə çətin deyil?

- Yox. Mən hansı işə qol qoyduğumu bilirdim. Məqsədimizə yavaş-yavaş nail olacağıq. Əsas komandamızın oyunudur. Kiminsə daha təcrübəli olması maraqlı deyil.  Bu,məni narahat etmir. Biz ancaq öz oyunumuzü fikirləşirik.

- Komandanızda bəzi futbolçular var ki, yaşda sizdən böyükdür. Onlarla işləmək necədir?

- Yaş burda elə də rol oynamır. Klub rəhbərliyi mənə böyük iş tapşırıb. İnşallah, öhdəsindən gələcəyik. Özümü bu işə hazır bilməsəm “Rəvan”I qəbul etməzdim.

- Hansısa Avropa ölkəsində məşqçi kursu keçmək fikriniz var?

- Biz klub rəhbərliyi bu barədə danışmışıq. Onlar bu fikri müsbət qarşıladı. Müxtəlif klublarla danışıqlar gedəcək. Hələlik klubların adı məlum deyil.  Ancaq fikrimiz var ki, bu yaxınlarda bunu həyata keçirək.

- Azərbaycan və dünyada bəyəndiyiniz məşqçi varmı ki, onlardan nəyisə öyrənməyə çalışırsınız?

- Günün yarısından çoxunu futbolda baş verən yenilikləri öyrənməklə məşğul oluram. Daim Avropa futbolundan nəyisə öyrənməyə çalışıram.  Ölkəmizdə kifayət qədər təcrübəli mütəxəssis var ki, onlardan nəyisə öyrənmək olar. Amma futbol elə bir oyundur ki, hansısa güclü mütəxəssisin komandasının oyununa baxıb onu təkrarlamaqla uğur qazanmaq olmaz. Baş məşqçinin öz yolu olmalıdır. Kimisə təkrarlamamalıdır. Ona görə də mən çalışıram öz dəsti-xəttimlə gedəm.

- “Rəvan”ın güclü futbolçuları, yaxşı oyun quruluşu var. Ancaq bu gün komandanız turnir cədvəlinin son pillələrində qərarlaşıb. Bunun səbəbini baş məşqçi kimi nədə görürsünüz?

- “Rəvan” 11-ci yerə layiq deyil. Bu gün biz əzmkar bir komanda yaratmışıq. Çalışırıq ki, baxımlı futbol oynayaq. Bununla bərabər nəticə də çox önəmlidir. 

- Azərbaycan kubokunun 1/4 final mərhələsinin cavab oyununda “Xəzər Lənkəran” a 1:4 hesabı ilə məğlub oldunuz.  Böyükhesablı məğlubiyyətin səbəbi nə oldu?

- Səbəb o idi ki, 14 gün ərzində 4-cü oyunumuza çıxırdıq. Hamısı da ağır keçirdi. Yorğunçuluq da sözünü dedi. Müdafiədə fərdi səhvlər etdik. Ancaq elə də pis oyun göstərmədik. Hesab 2:1 “Xəzər Lənkəran”ın xeyrinə olanda bir neçə qol imkanlarımız oldu ki, istifadə etsəydik, qalib gələrdik. Əsas istəyimiz qol vurmaq idi. Rəqib bizi iki dəfə əks hücumda yaxaladı. Oyunun müəyyən hissəsini çox yaxşı oynadıq. Gələcəkdə 90 dəqiqəni belə oynasaq yaxşı bir komandamız olacaq.

 
Ramiq AĞAMƏMMƏDOV