Şahin Diniyev: “İkinci “altılıq” mənasız olacaq”

Milli komandamızın sabiq baş məşqçisi Şahin Diniyevin Qol.Az saytına müsahibəsi

- Topaz Premyer Liqanın hazırkı gedişatı ilə bağlı fikirləriniz necədir?

- Sevindirici haldır ki, çempionluq üçün dörd komanda mübarizə aparır. Bundan başqa medallar uğrunda səkkiz komanda yarışır. Bunlar ilk “altılıq”da olan komandalar,  “Bakı” və AZAL-dır. Çempionatda maraqlı mübarizə gedir. Klubların maddi vəziyyətinin yaxşı olması imkan verir ki, istədikləri legionerləri komandaya cəlb etsinlər.

-  İki turdan sonra çempionatın final mərhələsi başlayır. Bu zaman diqqət əsasən ilk “altılığ”ın oyunlarına yönələcək, ikinci “altılığ”a isə çox maraq olmayacaq. Bu baxımdan “altılıq” sistemini necə qiymətləndirirsiniz?

- Sizinlə tamamilə razıyam. Burda ikili standart var. İlk “altılıq” oyunları çox vacib və maraqlı olsa da, ikinci “altılıq” oyunları əhəmiyyətsizdir. Ardıcıl iki ildir ki, sonuncu pillədə yerləşən iki komandanın güclülər dəstəsini tərk etməməsi ikinci “altılıq” oyunlarını daha da mənasız edib. Bu dəfə də belə olacaq. Oyunçularda motivasiya olmur. Burda əsas zərbə futbolçulara, komandaya dəyir. Çünki oyunların əhəmiyyəti olmayanda  klub rəhbərliyi də komandaya çox diqqət ayırmır.

- Siz təcrübəli mütəxəssis kimi hansı sistemi uyğun bilirsiniz?

- Yaxşı olardı ki, oyunların sayı artsın. Yəni bütün  komandalar iki dəfə yox, dörd dəfə qarşılaşsınlar. Belə olsa, axıra qədər bütün oyunlar maraqlı və əhəmiyyətli olardı. Oyunların sayı nə qədər çox olarsa futbolçularda o qədər inkişaf olar. Avropa ölkələri də bu sistemlə oynayır.  Ancaq hər bir sistemin yaxşı və pis tərəfləri var. Oyunalrın sayının artması milli komandamıza mane ola bilər. Buna görə də millinin təli-məşq toplanışlarını azaltmaq olar. Avropa bu sistemlə oynaya bilirsə, deməli, biz də də bunu tədbiq etmək olar. İnkişafa Avropa ilə getmək olar. Gez-tez Avropaya uyğunlaşmalıyıq. Ona görə də klub və federasiya rəhbərləri bunu müzakirə edib uyğun bir sistemə keçməlidir.

- Sizcə, çempionluğa daha layiq oyun göstərən komanda hansıdır?

- Hazırda ilk “altılıq”da bir-birindən açıq şəkildə üstün oynayan komanda yoxdur. Hər biri çempion olmağa layiqdir. Sadəcə, komandaların qalxan və enən dövrləri olur.

- “Qəbələ”, “Xəzər Lənkəran” və “Bakı”dan hansının ilk “altılıq” şanslarını daha çox görürsünüz?

- Bu siyahıdan AZAL-ı silmək olmaz. Futbol gözlənilməz bir oyundur. Ona görə də AZAL cüzi şansından istifadə edə bilər. AZAL-dan başqa digər üç komandanın şansı öz əlindədir. AZAL isə iki oyunu udsa belə, taleyi digər oyunlardan asılıdır.

- Premyer Liqanın 21-ci turunda “Neftçi” “İnter”i qəbul edəcək.  Bu oyun haqda nə düşünürsünüz?

- Oyunun gərgin keçəcəyi gözlənilir. Çünki komandalar turnir cədvəlində birinci və ikinci yerlərdədir. Həm də bu oyun yaxşı hücum edən komanda ilə inamlı müdafiə olunan komandanın oyunu olacaq. Oyunda məşqçilərin seçdiyi taktikadan çox şey asılı olacaq. Daha çox etiyatlı oynayan komanda qalib gələcək.

-“İnter”də son vaxtlar hücum futboluna keçib.

- “İnter”in üstünlüyü stabil heyətinin olmasıdır. Belə olanda oyunda stabil olur. Artıq “İnter”in oyunçuları neçə ildir ki, bir yerdə oynayırlar. Baş məşqçinin oyun sistemi komandaya oturub. Buna görə “İnter” istədiyi oyunu göstərə bilər.

Ramiq AĞAMƏMMƏDOV