"Montielə qarşı ayıq-sayıq olmalıyıq" - "Nyukasl"ın futbolçusu

"Nyukasl"ın futbolçusu Ceykob Merfi UEFA Çempionlar Liqasının pley-off mərhələsi çərçivəsində "Qarabağ"a qarşı keçiriləcək cavab qarşılaşmasından əvvəl təşkil olunan mətbuat konfransında iştirak edib.

QOL.az xəbər verir ki, futbolçu gərgin oyun qrafikinə və "Qarabağ"a qarşı ilk matçdakı böyük hesablı qələbəyə (6:1) baxmayaraq cavab görüşünə ciddi yanaşdıqlarını qeyd edib:

"İlk növbədə yenidən evə qayıtmaq çox xoşdur. Ardıcıl dörd çətin səfər matçından sonra sanki öz doğma evimizə qayıdırıq. Bütün komanda bunu səbirsizliklə gözləyirdi. Azarkeşlərimizin qarşısında, öz stadionumuzda oynamaq bizə əlavə güc verir. Sabah bizi çətin bir oyunun gözlədiyini bilirik".

Futbolçu Bakıda qazanılan qələbə fonunda komandasının həmin matçdakı performansına heyran qaldığını gizlətməyib:

"Hesab edirəm ki, Bakıdakı başlanğıcımızı izləyən hər kəs şoka düşmüşdü. Ehtiyat oyunçular skamyasında mən özüm də oyunumuzu izləyərkən heyran qalırdım. "Nyukasl" öz aqressiv və hücumameyilli futbolunu oynayanda nələrə qadir olduğunu hamıya göstərir. Premyer Liqada bunu artıq hər kəs bilir, Çempionlar Liqasında da özümüzü ən yaxşı tərəfdən tanıtdıq. Bakıdakı matç hər şeyin bizim üçün mükəmməl alındığı və performansımızı ən yüksək səviyyədə təqdim etdiyimiz bir oyun idi".

Futbolçu "Qarabağ"ın heyətində xüsusilə Montielin sürətinə diqqət yetirməli olduqlarını bildirib:

"Rəqibin sol cinah oyunçusunun çox yaxşı sürətə malik olduğunu görmüşük. Bu, sabahkı oyunda diqqət yetirməli olduğumuz əsas məqamlardan biridir. Ümumiyyətlə, "Qarabağ" çətin rəqibdir. Joni Montiel müdafiənin arxasına sızmağı çox yaxşı bacarır, buna görə də ayıq-sayıq olmalıyıq. Lakin evdə oynadığımız üçün əsas diqqətimiz öz prinsiplərimizə və həyata keçirmək istədiyimiz plana yönəlib. Əgər ən yaxşı oyunumuzu nümayiş etdirə bilsək, istənilən rəqib üçün bizimlə qarşılaşmaq olduqca çətin olacaq".

Gənc oyunçu qitənin önəmli klub turnirində fərqlənməyindən danışıb:

"Bu, möhtəşəm bir hiss olmaqla yanaşı, həm də bir növ ağır yükdən qurtulmaq kimi idi. Bir neçə il əvvəl Çempionlar Liqasında oynamaq mənim ən böyük hədəfim idi və "San Siro"da debüt etməklə buna nail oldum. Bundan sonra isə ancaq ilk qolum və ilk məhsuldar ötürməm barədə düşünməyə başladım. Bir neçə məhsuldar ötürmə etsəm də, qol vurmaq bir az çətin alınır, sanki şans məndən qaçırdı. Nəhayət, bir az bəxtin də köməyi ilə o ilk qola imza ata bildim".

Merfi komandanın son illərdəki inkişafını və Çempionlar Liqasında 1/8 finala yüksəlməyin önəmini belə ifadə edib:

"Bu, möhtəşəm bir nailiyyət olardı. Son dörd mövsüm ərzində biz mütəmadi olaraq yeni zirvələr fəth etmişik və bu, növbəti böyük mərhələdir. Əgər 1/8 finala adlaya bilsək, bu bizi inanılmaz dərəcədə xoşbəxt edəcək. Ötən illərdə çox yaxşı işlər görmüşük, bu uğur isə onların sırasına ən vaciblərindən biri kimi əlavə olunacaq".

Merfi Çempionlar Liqasının himni səslənərkən keçirdiyi hissləri və futbola olan sevgisini belə ifadə edib:

"Turnirin himni səslənəndə mən də stadiondakı azarkeşlərlə eyni hissləri yaşayıram. Himnin sonunda "The Champions" sədaları yüksələndə mən də onlara qoşulub bağırıram. Bu anları heç vaxt adi qarşılamıram. İşimi çox ciddi şəkildə yerinə yetirsəm də, günün sonunda dünyanın ən yaxşı peşəsi ilə məşğul olduğumu bilirəm. Belə böyük anlarda və oyunlarda meydana çıxanda hələ də içimdə o uşaqcasına həyəcanı və sevinci hiss edirəm".

Bizi İnstaqramda da izlə

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от Qol.az (@qolaz)