“Şamaxı”nın legioneri: “Mikels və Simakala məndən öndədir, lakin…”

ÖLKƏ FUTBOLU 16 Dekabr 2025 / 19:03 503

- A +

“Şamaxı” futbol klubunun hücumçusu Karim Rossi Misli Premyer Liqasının 15-ci turunda “Zirə” üzərində qazanılan 2:1 hesablı qələbədən sonra QOL.az saytına müsahibə verib. Təcrübəli forvard oyunun gedişi, komandanın geridönüşü, penaltidən vurduğu qol və mövsümlə bağlı hədəflər barədə fikirlərini bölüşüb.

- Misli Premyer Liqasının 15-ci turunda “Zirə”ni 2:1 hesabı ilə məğlub etdiniz. Qəbələni necə şərh edərdiniz?

- “Zirə” matça erkən qolla başladı. Buna görə də ilk hissə bizim üçün çox çətin keçdi. Lakin panikaya düşmədik. Bunun da nəticəsində ikinci hissəyə qolla başladıq. Xarakter nümayiş etdirdik. Qələbəyə layiq idik. Azarkeşlərimiz önündə bu cür əzmkar qələbə qazanmağımız sevindiricidir. Göstərdik ki, əvvəlki oyunlardakı səhvlərimizdən nəticə çıxarmışıq. “Sumqayıt”la oyunda hesabda öndə olsaq da, yekunda uduzmuşduq. Lakin bu dəfə eyni səhvləri təkrarlamadıq.

- Fasilədə nə dəyişdi ki, komandanız geridönüş edə bildi?

- Baş məşqçimiz dedi ki, səbirli olaq, panikaya düşməyək. Hücumlarımızı davam etdirək. Biz də deyilən tapşırıqları yerinə yetirdik və bəhrəsini gördük.

- Penaltidən fərqləndiniz. “Zirə”nin qapıçısı Tiaqo Silva 11 metrlik zərbələr zamanı inamlı çıxışı ilə seçilir. Bunu nəzərə alaraq bir qədər təhlükəli, düz küncə zərbə endirdiniz?

- Əvvəla onu deyim ki, ilk hissədə də penalti vura bilərdik. Lakin hakim fərqli qərar qəbul etdi. Bununla belə, penalti olduğu fikrindəyəm. Zərbəmə gəldikdə isə, rəqib qapıçını analiz etmişdik. Bilirdik ki, yerlə vurulan zərbələri zamanı bir qədər çətinlik yaşayır. Buna görə də məhz yerlə küncə zərbə endirdim.

- Üçüncü yerdən “Şamaxı”nı 7 xal ayırır. Komandanız turnir cədvəlində daha üst pillələrə iddia edə bilər?

- Futbolda hər şey mümkündür. Lakin biz bu barədə düşünmürük. Gənc komandamız var. Yalnız hər növbəti matçı fikirləşirik. Məqsədimiz daha yaxşı olmaqdır. Nə qədər xal topladığımızı isə mövsümün sonunda biləcəyik.

- Artıq hesabınızda 6 qol var. Çempionatın bombardiri olmağı hədəfləyirsiniz? -

Mən hər matça inamla çıxıram. Meydanda bacardığımın ən yaxşısını etməyə çalışıram. Məqsədim komandaya kömək etməkdir. Qol vurmaq üçün əlimdən gələni edirəm. İnşallah, növbəti matçlarda da fərqlənmək üçün şanslarım olar.

- Bombardirlər yarışında kimi əsas rəqib kimi görürsünüz?

- Bombardirlər siyahısında Mikels və Simakala məndən öndədir. Lakin bombardirlər cədvəlində sıxlıqdır. Gələcəkdə hər şey baş verə bilər. Dediyim kimi, əsas öz oyunumuza fokuslanıram.

- Növbəti turda, ilin son matçında “Araz-Naxçıvan”la səfərdə qarşılaşacaqsınız. Həmin oyundan gözləntiləriniz nədir?

- Biz düşünürük ki, hər komandaya qarşı oynaya bilərik. Baş məşqçimiz də bizi bütün matçlara yaxşı hazırlaşdırır. “Araz-Naxçıvan” da güclü komandadır. Odur ki, bizi qarşıda çətin görüş gözləyir. Buna baxmayaraq, məqsədimiz uğurlu nəticə qazanmaqdır.

Daha çox