Nazim Süleymanov: «Əgər o, pul dalınca qaçacaqsa, yolu açıq olsun»

AZAL klubunun baş məşqçisi Nazim Süleymanovun Qol.Az saytına müsahibəsi

- İlk öncə mayın 24-də keçirilən Azərbaycan kubokunun finalında qarşılaşan “Xəzər Lənkəran” - “İnter” matçından başlayaq. Yəqin ki, oyunu izləmisiniz...
- Bəli, dünən bu matçı mən də canlı olaraq seyr edirdim. Əvvəlcədən hər iki komandanın ehtiyyatlı oynayacağını düşünürdüm. Belə də oldu. Ən əsası da bu oyunda “İnter”in taleyi həll olunurdu. Baxmayaraq ki, hesab əlavə vaxtda açıldı, ancaq yenə də cənub təmsilçisi əzmkar qələbə qazandı. Düzdü, penalti lotereya oyununa bənzəyir. Ancaq yenə də kimin güclü olduğu oyunun sonunda bilindi. Dünən deyirdilər ki, Kamran Ağayev AZAL-ı Avroliqaya apardı. Mən isə belə deməzdim. “Altılığ”da olan hər bir komanda Avropada oynamağa layiq idi. Əsas odur ki, dünən maraqlı və gərgin mübarizə izlədik. “Xəzər Lənkəran”ı təbrik edirəm.
- Dünən matçdan sonra sizin baş məşqçi postunuzdakı fəaliyyətinizə də aydınlıq gələcəkdi. Komandanı bu yerə gətirən məşqçi ilə işbirliyi davam etməlidi, yoxsa əksinə?
- Bu gün AZAL rəhbərliyi ilə kiçik söhbətim olub. Orda klubun gələcək planlarını da müzakirə etmişik. İndiyə kimi komanda müəyyən qədər “adaptasiya” dövrü keçib. Bilirsiz ki, komandalar üçün bu çox önəmlidi. Əgər bu yerə gəlib çıxmışıqsa bundan sonrakı fəaliyyətimiz də səmərəli olar. Rəhbərliklə görüşdə də hiss etdim ki, onlar mənimlə işləməkdə maraqlıdır. Ancaq bu haqda qəti qərar gələn həftə içində keçirilən klubdaxili toplantıdan sonra veriləcək. Həmçinin o görüşdə Avroliqaya hazırlığımızın nə vaxt və harada baş tutacağına aydınlıq gələcək. Digər komandalarımız kimi biz də ölkəmizi Avroliqa yarışlarında layiqli şəkildə təmsil etmək istəyirik.
- “İnter”lə kubok matçından sonra bildirmişdiz ki, bəzi oyunçularım oynamaq istəmir. Sanki çamadanlarını yığıb getməyə hazırlaşırlar. Necə düşünürsüz, bu gedişat yenə də davam edir?
- Düzdü, çempionatda, xüsusən də Premyer Liqanın sonlarına yaxın bəzi futbolçular həvəssiz oynayırdılar, elə bil onların fikirləri başqa yerdə idi. Ancaq bilməlidirlər ki, AZAL onlara məvacib ödəyir. Buna görə meydana çıxıb futbol oynamaqları daha vacibdi. Bəlkə bu cür işlər kimlərinsə maraq dairəsindədi. Bununla onlar komandada ruh düşgünlüyü yaratmaq istəyirlər. Son turda “Qarabağ”a qalib gəlməyimiz komandada müəyyən motivasiya yaradıb. Ümid edirəm ki, mötəbər turnir öncəsi bu daha da güclənəcək. Çempionatin təsnifat mərhələsində bəzi mütəxəssislər və jurnalistlər bizi “altılıq”da görmürdü. Həm də digər iddialı komandalara nisbətdə bizim büdcəmiz də elə də böyük deyildi. Buna rəğmən, ayağımızı yorğanımıza görə uzatdıq və öz gücümüzü ortaya qoyaraq bu yerə gəlib çıxdıq.
- Razılaşın ki, mütəxəssislər “İnter”i avroliqada daha şanslı görürdülər.
- “İnter”lə bizim bu turnirdə çıxış etmək baxımından təcrübəmizə baxsaq, AZAL da “Olimpik” adlanan vaxtı analoji turnirdə çıxış etmək şansı qazanmışdı. Baxmayaraq ki, mərhələ adlaya bilməmişdi, ancaq yenə də ölkəmizi təmsil etmiş komandalardan olub. Yəni, bu, komandamızın Avropadakı ilk çıxışı olmayacaq. Birdə ki, hər şey keçmişlə yox, bugünlə ölçülür. Bu baxımdan hər şeyin vaxtını gözləmək lazımdı. Matçın nəticəsi oyundan sonra bilinir. İkincisi də qarşıya məqsəd qoyulandan sonra bu haqda danışmaq olar. Bu mövsüm rəhbərlik mənim qarşıma qitəmiqsaylı turnirə vəsiqə qazanmaq vəzifəsi qoymuşdu ki, bunu da bacardım. Qalır bundan sonra komandanı Avroliqada uğurlu çıxışa hazırlamaq ki, indi ancaq bu haqda düşünürəm.
- Komandadan hansı oyunçular gedəcək?
- Artıq mövsümün sonlarına yaxın Draqan Mandiç, Eleandro Pema, Qvidas Yuşka, Mirko Bunyev ilə yollarımız ayrılmaq ərəfəsindədi. Yəqin ki, onların gedişi yaxın günlərdə rəsmiləşəcək. Nuqzar Kvirtiyanın müqaviləsi mayda bitir. Buna görə də onunla danışıqlar masasına oturacağıq. İkitərəfli razılıq olarsa, müqaviləni uzadacıq. Yerlilərdən Tərlan Xəlilov, Elvin Əliyev və Ruslan Poladov da düşərgəmizi tərk etmək istəyir. Onlarla hansı klubun maraqlandığı haqda məlumatım yoxdu. Ancaq getməkdə israrlıdırlar.
- Təsdiqlənməyən məlumata görə, mərakeşli legioner Zohair Benuoahi ilə “Xəzər Lənkəran” və “Qarabağ” maraqlanır.
- Bilirsiz Zohairə kim çox pul versə, o da həmin klubu seçəcək. Bu haqda konkret məlumatım yoxdu. Ancaq onun ürəyi komandamızda deyilsə, bizə lazım deyil. Azərbaycana gələndə heç kim onu tanımırdı. AZAL ona lazımı şərait yaratdı ki, özünü göstərsin. Bundan sonra pul dalınca qaçacaqsa, yolu açıq olsun.
- Yay fasiləsində komandanızdan xeyli oyunçu gedəcək. Belədə transfer çalışmaları gündəmə gəlir. İndidən bu yöndə iş gedirmi?
- Hazırda komandaya legioner futbolçuların cəlb olunması yönündə çalışmalara başlamışıq. Təbii ki, bir xeyli oyunçunun AZAL-dan gedişi fonunda bu işlərin indidən başlanması mütləqdi. İndidən konkret ad açıqlaya bilmərəm. Ancaq onu deyə bilərəm ki, maraq dairəmizə düşən oyunçular Çernoqoriya, Bosniya və Hersoqovina, Serbiya, Boliviya, Kosta-Rika, Makedoniya kimi ölkələrdəndir. Klubdan gedənlərin taleyinə aydınlıq gələndən sonra biz də onların yerini daha güclü oyunçularla dolduracağıq. Bütün bunlara əvvəldə qeyd etdiyim kimi, gələn həftə keçirəcəyimiz toplantıdan sonra aydınlıq gələcək.
Qeyd edim ki, maraq dairəmizdə olan futbolçular sırasında Boliviya və Kosta-Rikadan olanlar məni daha çox razı salır. Yaxın vaxtlarda həmin oyunçuların adını da açıqlayacağıq.