“Hələ heç nə itirilməyib, “Qarabağ” toparlana bilər” - Mircavadov

“Qarabağ” qırmızı vərəqə alana qədər əla oynadı. Oyuna da çox yaxşı başlamışdılar. Meydanın eninə çox gözəl açılırdılar. Ötürmələr də yaxşı idi”.

Bu sözləri QOL.az-a açıqlamasında Azərbaycanın Əməkdar Məşqçisi Ağasəlim Mircavadov deyib.

“Qarabağ”ın ötən gün Avropa Liqasının Liqa mərhələsinin 3-cü turunda “Ayaks”a Bakıda uduzduğu (0:3) matç haqda danışan 77 yaşlı mütəxəssis bildirib ki, Ağdam klubu azlıqda qalmasa, rəqibi üstələyərdi: 

“Biz gözləyirdik ki, bu dəqiqə “Qarabağ” qol vuracaq, amma Romao elə səhv etdi ki, özünə yaraşmadı. Əfsuslar olsun ki, elə bir səhv etdi və qırmızı vərəqə aldı. Hakim də haqlı idi. Amma ilk qolda hakimlə mübahisə edə bilərəm. Çünki “Ayaks”ın futbolçusu Marko Yankoviçə qarşı kobud oynamışdı.  

Bunlara baxmayaraq, “Qarabağ” 10 nəfərlə də qol epizodu yaratdı. Mən düşünürəm ki, “Qarabağ” 11 nəfərlə oynasa idi, sözsüz ki, “Ayaks”ı üstələyərdi. Çünki “Qarabağ”ın oyununda yaxşı dinamika var idi, futbolçular tez-tez yerlərini dəyişirdilər. Cinah müdafiəçilərimiz hücumda çox aktiv idi. Bütün bunlara görə rəqibdən üstün idilər. Təəssüf ki, qırmızı vərəqəyə görə planlar pozuldu. Avrokubok oyunlarında 10 nəfərlə mübarizə aparmaq çox ağırdır". 

A.Mircavadov “Qarabağ”ın qarşıda 5 oyunu olduğunu xatırladıb və qeyd edib ki, hələ heç nə itirilməyib. “Evdə iki oyunumuz qalıb. Səfər matçlarında da xal qazanmalıyıq. Əgər pley-offa düşmək istəyiriksə, səfər matçlarında da sərfəli nəticə əldə olunmalıdır. Məncə, hələ heç nə itirilməyib. “Qarabağ” toparlana bilər. Bunu əvvəlki illərdə də görmüşük”.

A.Mircavadov “Qarabağ”ın Avropa Liqasındakı məğlubiyyətlərdən sonra çox tənqid olunmasına da münasibət bildirib: “Tənqid var ki, ağıllı formada olur. Bunların ziyanı yoxdur, əksinə lazımdır. Tənqid də var ki, ağızlarına gələni danışırlar. Hər nəticə baş məşqçinin adına yazılır. Tənqid də peşəkarcasına olmalıdır. Təbii ki, sağlam tənqiddən dərs çıxarmaq lazımdır. Gəlin açıq danışaq. Bizim çempionatımız zəifdir. “Qarabağ” il ərzində çempionatda cəmi 4-5 təzyiqli oyun oynayır. “Sabah”, “Neftçi” və “Zirə” ilə görüşləri nəzərdə tuturam. Digər klublar məndən inciməsin. “Qarabağ”a təzyiq edə bilmirlər. Oyunçular motivasiyanı yerli çempionatdan almalıdır. Azərbaycan çempionatının səviyyəsi də məlumdur. “Qarabağ” bu yerə gəlib çıxıbsa, böyük hünərdir. Burada komandanın, məşqçi korpusunun böyük əməyi var. “Qarabağ” adı Avropada tanınır. Ən əsası isə odur ki, “Qarabağ” indiyədək keçirdiyi 3 matçda oyunu ilə heç kimə uduzmayıb. Əsas məsələ budur. Qol vurmaqla və qırmızı vərəqələrlə bağlı problemləri var. Məşqçi korpusu bu haqda düşünməlidir. Bilirəm ki, bunun üzərində işləyirlər, orada böyük bir məşqçi korpusu var”.

Azərbaycan millisinin və “Qarabağ”ın sabiq çalışdırıcısı keçmiş komandasının yeni oyunçulara ehtiyacı olduğunu da vurğulayıb: “Hazırda əldə olan futbolçular bunlardır. Ümid edək ki, qışda yeni oyunçular gələcək. Çünki yeni gücə ehtiyac var. Ən əsasl yerli futbolçular inkişaf etməlidir. Əfsuslar olsun ki, hələ bunu görmürük. Mən bunu Musa Qurbanlıdan, Nəriman Axundzadədən gözləyirəm. Onlar artıq stabil oynamalı və öz sözlərini deməlidirlər. “Qarabağ”a əlavə güc lazımdır. Bunu deməyin mənası yoxdur, məşqçi korpusu yaxşı bilir”.

Ramiq Ağaməmmədov