"Bu matçda qalib gələ bilərdik" - Samir Abasov

"Sumqayıt"ın baş məşqçisi Samir Abasov Azərbaycan kubokunun 1/4 final mərhələsində "Neftçi"yə qarşı keçirdikləri cavab oyunundan (1:1, ilk oyun - 2:3) sonra mətbuat konfransında iştirak edib.

QOL.az xəbər verir ki, o, turnirdə mübarizəni dayandırmaqlarına baxmayaraq, futbolçularından razı qaldığını bildirib: “Bu gün mərhələni keçə bilməsək də, futbolçularımın oyunundan zövq aldım. Komanda çox yaxşı oynadı. Futbolçularımızın bəziləri zədəli idi. Ona görə də sistemimizi də dəyişdik. Futbolçularımın qələbə qazanmaq istəyini gördüm. Rəqibi təbrik edirəm, qarşıdakı oyunlarda uğurlar arzulayıram”.

Baş məşqçi cəmi 9 gün ərzində "Neftçi" ilə 3 dəfə qarşılaşmaqlarının yorucu olmadığını söyləyib: "Zərrə qədər də yorucu olmadı. “Neftçi” digər oyunları da bu heyətlə oynamışdı. Oyun üslubu da eyni idi. Məşqçilər olaraq çətinlik çəkmədik. Uşaqların bu 3 oyunu eyni tonusda saxlaması çox xoş idi. Futbolçularım mərhələni keçmək istəyirdi. Amma bu vaxta qədər futbolçularımın göstərdiyi oyun  zövq verdi".

Mütəxəssis ölkə kubokunda mübarizəni dayandırmaqlarının Premyer Liqada rahat mübarizə aparmaqlarına səbəb olub-olmayacağı barədə suala bu cür cavab verib: "Yüngüllük olacaq. İki gün bərpaya getsə, cəmi bir günümüz qalacaq. Özü də vacib oyuna çıxacağıq. Hər şey bu oyunla bitməyəcək". 

S.Abbasov mərhələ adlamamaqlarının səbəbini belə izah edib: "Məğlubiyyəti heç nə ilə əlaqələndirmirik. Səmimi olmağa çalışıram. Deyim ki, bəzi vəziyyətlərdə rəqiblə bağlayım. Bununla da əlaqələndirməzdim. Rəqibi təbrik edirəm. Amma bunu rəqibə də bağlamazdım ki, ona görə uduzduq. Sadəcə, birinci oyundakı səhvlərimiz bu yerə çatdırdı. Bu oyunda da qalib gələ bilərdik. Başabaş oyun getdi. Bəzi vəziyyətlərdə daha üstün oyunumuz göründü. "Sumqayıt" bu yolu tutubsa, qələbə də, məğlubiyyət də olacaq. Yeni komanda üçün çətindir. Komandan bu cür oynamağa başlasa, ondan sonra rəqiblərə çətin olar".

S.Abasov "Bəzi epizodlarda hakim sizin əks-hücumlarınızın qarşısını aldı..." fikrinə münasibət bildirib: "Yanımda dayanan dördüncü hakimə təşəkkür edirəm. Bu gün məni anladı. Mən edən etirazlara razı idi. Etiraz etdiyim məqamlar var idi, 4-cü hakim haqlı olduğumu söyləyirdi, amma onların da öz kriteriyaları var".

Mütəxəssis bu qış transfer pəncərəsində oyunçu transfer etməməkləri haqda da danışıb. O, heyətə azad agent olan futbolçular cəlb edib-etməyəcəkləri ilə bağlı söyləyib: "Çox çətin durumdayıq. Bu suala mənə gəlir. Azad agent statusunda olan futbolçular hansı səviyyədədir? O qədər oyunçu təklif edilir ki. Skandinaviya ölkələrində liqa noyabrda bitib. Fiziki durumları bizə kömək edəcək? Axtarışdayıq. Bura gəlməmişdən qabaq da iki oyunçuya təklif etdilər, baxa bilməmişik. Amma yenə baxacağıq. Kasad heyətlə problemlər yaşaya bilərik. İlin bu problemlər gözə görünmürdü. Bu, rəqiblərlə bağlı ola bilərdi. Amma gözə görünəcək. Bütün komandalar oyunlarda mübarizə aparır. Problem yaşayacağıq. Yoxdursa, təslim olmayacağıq". 

S.Abasov sonda "Çempionat matçından sonra demişdiniz ki, futbolçular oyunda qalib gələcəklərinə dair mənə söz vermişdilər. Bəs həmin söz bu oyundan öncə də verilmişdi" sualını cavablandırıb: "Ad günü ərəfəsi idi. Uşaqlar da kubok oyununda 2 qol vurduqdan sonra motivasiyalı idi. Stadion təmirdən çıxmışdı, oyunumuza çox adam gələcəkdi, yükləmişdik onları. Onlar da bizə söz vermişdi. Həmin oyunu futbolçular çıxardı. Həmin oyunla əlaqəm yox idi. Amma məşqçi də oyunlarda ortaya çıxmalıdır. Əfsuslar ki, bunu edə bilmədim".