Azər Bağırov: "Qarabağ" bizdən qat-qat üstün idi, amma..."

"Qarabağ" böyük komandadır. Onlara qarşı oynamaq zövq verir".

QOL.az xəbər verir ki, bu sözləri "Araz-Naxçıvan"ın baş məşqçisi Azər Bağırov Misli Premyer Liqasının 11-ci turunda "Qarabağ"a qalib gəldikləri matçdan (2:1) sonra təşkil olunan mətbuat konfransında deyib:

O, qələbəyə baxmayaraq, Ağdam təmsilçisinin "Araz-Naxçıvan"dan daha yaxşı çıxış etdiyini söyləyib: "İlk oyunda da, bu gün də "Qarabağ" bizdən qat-qat üstün idi. Amma şans biz tərəfdə idi. Lazımi vaxtda qolları vura bildik və üstünlüyü ələ aldıq. Rəqibin Avropa Liqası oyunundakı yorğunluğu da bizim üçün müsbət hal oldu. "Qarabağ" çox qaça bilmədi".

O, komandanın avrokuboklara vəsiqə uğrunda mübarizə aparıb-aparmayacağı barədə bunları deyib: "Komandanı oyundan oyuna kökləyirik. Heyətimiz o qədər də geniş deyil. Bu gün avrokuboklar çox çətindir. Çalışırıq hər oyunda nələrisə yaxşı edək. Cücəni payızda sayarlar. Biz işimizi görəcəyik. Bacardıqca yuxarı pillələrdə olmaq istəyirik".

Mütəxəssis "Araz-Naxçıvan"da komanda və klub birdən formalaşdı. Bu, sizi qorxutmur" sualına belə cavab verib: "Oyundan sonra uşaqlara dedim ki, işimiz daha da çətinləşir. Bu gün böyük şeylər haqda danışmağa dəyməz. Gündəlik işimizi görməliyik. Düzgün iş gördükcə nəticə də gələcək".

Baş məşqçi "Bir neçə il əvvəl "Araz-Naxçıvan" bu stadionda"Qarabağ"a məğlub olandan sonra çempionatda iştirakını dayandırmışdı. Bu gün eyni məkanda onları məğlub etdiniz" fikrinə də münasibət bildirib: "Böyük bir şey etməmişik. Şans biz tərəfdə idi. Səbrli müdafiə olunduq. Rəqib qol vursaydı, tam fərqli şey ola bilərdi".

A.Bağırov "Araz-Naxçıvan"ın bu mövsüm Naxçıvanda oyun keçirib-keçirməyəcəyi haqda məlumatının olmadığını qeyd edib: "Bu barədə məlumatım yoxdur. Rəhbərliyə aid olan məsələdir. Ümid edirəm tez bir zamanda məlumat olar".

O, səhvlərə görə müdafiəçilərini danlamadığını deyib: "Uduzanda da futbolçulara danlamaq mənasında söz demirəm heç vaxt. Futbol səhvlərlə gözəldir".

A.Bağırov "Orxan Əliyev Region Liqasından sizinlə birlikdə bura kimi gəldi. Bu, necə baş verdi" sualını bu cür cavablandırıb: "Hər insanın içində bir "mən" var. Ona motivasiya vermək lazımdır. Orxan bizi dinləyir, meydanda mübarizə aparır, səhvlərini boynuna alır. Vadim də həmçinin".

Mütəxəssis Region Liqasında çalışdıqdan sonra Premyer Liqada uğur qazanmasından da danışıb: "Bilmirəm bundan sonra necə olacaq. 2010-cu ildə "Neftçi"də seleksiyaçı məşqçi kimi çalışmışam. 2015-ci ildə PRO lisenziyası almışam. Qismətdən elə olub ki, Premyer Liqaya dəvət almamışam. Bəlkə də çoxlarından çox çalışmışam. Komandalarım 1-ci liqada çempion olub. U-11 Liqasında belə işləmişəm. Qismət bu günə imiş. Öz bacarığımı göstərməyə bilməzdim".

O, sonda "Qarabağ"ın "Araz-Naxçıvan"ın 2-ci qolundan öncə qayda pozuntusunun olduğunu iddia etməsinə toxunub:  "Heç vaxt hakimlərin işinə qarışmıram. Həmişə feyr-pleyi sevirəm".