"Komanda oyundan-oyuna daha da artıracaq" - Regekampf

"Komanda oyundan-oyuna daha da artıracaq" - Regekampf
ÖLKƏ FUTBOLU 7 Avqust 2022 / 19:52 3467
-  A +

"Üç xal qazandığımıza görə sevinirəm. Bizim üçün bir az çətin perioddur. Bugünkü oyunun start heyətində daha çox ikinci heyətdə yer alan futbolçular var idi. Onlar da şans, təcrübə qazanmalıdır".

Qol.az xəbər verir ki, bu sözləri "Neftçi"nin baş məşqçisi Laurentsiu Regekampf Azərbaycan Premyer Liqasının 1-ci turunun "Şamaxı" ilə matçından sonra keçirilən mətbuat konfransında deyib.

"Əsas düşüncəmiz də avrokuboklarda növbəti mərhələyə adlamaqdır. Meydança süni örtüklü olduğuna görə futbolçularımın zədələnə biləcəyindən narahat idim. Qapıçımızı itirdik və bu, üzücüdür. Ümidvaram ki, Aqil tezliklə komandaya qoşulacaq. İndi hazırda cəmi iki qapıçımız var. Çünki Rza da milli komandanın heyətindədir. Çətin vəziyyətdəyik" - deyə rumıniyalı mütəxəssis bildirib.

O, əsas heyətdə meydana çıxan gənc futbolçular barədə də fikirlərini bildirib: "Bütün futbolçularımı qələbə münasibətilə təbrik edirəm. Bu görüş Avstriyada keçirəcəyimiz "Rapid"lə oyuna hazırladığımız planın bir hissəsi idi. Əsas odur ki, üç xalı qazandıq. Uşaqlardan pozitiv siqnallar aldım. Fasilə zamanı onlara dedim ki, özlərinə daha çox inanmalı, meydanda daha təhlükəli, qapıya daha meyilli olmalıdırlar. Hamısı birlikdə demək olar ki, ilk dəfə idi oynayırdılar. Meydanda çox aqressiv idilər, rəqibə yaxın oynamağa çalışırdılar. Top itkisindən sonra onu dərhal qazanmağa çalışırdıq. Topa daha çox biz sahib idik. Düşünürəm ki, oyundan-oyuna daha da artıracaqlar və inam gələcək".

Regekampf "Başakşehir"dən yenidən icarəyə götürülən Mert Çelik və "Minsk"dən transfer edilən Yegor Boqomolski barədə isə bu cür danışıb: "Rapid"ə qarşı hansı heyətin oynayacağından danışmayacam. Sırf olaraq, Mert haqda da danışmaq istəmirəm. Düşünürəm ki, bu gün müdafiə xəttindəki futbolçuların hamısı yaxşı oyun göstərdi. Biz Mertin keyfiyyətini bilirdik, ona görə komandamıza cəlb etdik. Konfrans Liqasının qrup mərhələsinə vəsiqə qazanmaq istəyiriksə, oyunçuların hamısı oynamalıdır. Ağır proqramdır, amma yüksək səviyyə tələb olunur.

Yeqorun ilk rəsmi oyunu idi. O, bu gün çox qaçdı, mübarizə apardı, birinci hissədə də qol vurmaq üçün şans əldə etdi. Son saniyədə isə qərar verə bilmədi. Yeqor gənc futbolçudur, amma döyüşkəndir, səviyyəsini qaldırmaq üçün kifayət qədər vaxtı var".

"Neftçi"nin çalışdırıcısı ikinci hissədə zədələnərək oyunu yarımçıq tərk edən Aqil Məmmədovun durumunun hələ aydın olmadığını söyləyib: "Aqilin durumunun nə yerdə olduğunu dəqiq bilmirəm. Oyundan sonra ona yaxınlaşdım. İlk təəssüratım odur ki, burnu qırılıb. Gözləməliyik, xəstəxanaya getdikdən sonra durumunu biləcəyik. Amma hazırda onun durumu yaxşı görünmür".(sportal.az)

Daha çox


Son xəbərlər
27.03.24  21:58

Keyn sağaldı