“Neftçi”yə 20 futbolçu adı göndərdim, fikir vermədilər” - Flavinyo

"Neftçi”nin sabiq kapitanı, klubun canlı əfsanələrindən birinə çevrilmiş Flavinyonun müsahibəsi 

- Hazırda nə işlə məşğulsunuz? 

- Düzü, futbolla bağlı heç bir fəaliyyət göstərmirəm. Ev tikintisi ilə məşğul olan firmam var, onunla maraqlanıram. 

- Azərbaycanda keçirdiyiniz illəri necə xatırlayırsınız? 

- Karyeramın ən gözəl illərini Azərbaycanda keçirdim. Ora çox tez uyğunlaşdım, insanlar mənə isti münasibət göstərdilər, öz ailələrinin bir üzvü kimi davrandılar. Ölkəniz üçün çox darıxıram. Bir gün yenidən Azərbaycana səyahət etmək istərdim. 

- Azərbaycan futbolunu izləyirsiniz? 

- Açığı, Premyer Liqanı izləmirəm. Amma ümumi proseslərdən xəbərdaram. Tez-tez çempionat oyunlarının nəticələrinə baxıram. 

- Ardıcıl 3 çempionluq qazandığınız “Neftçi” son 9 ildə bunu yalnız bir dəfə bacarıb. Sizcə, səbəb nədir? 

- Mənim vaxtımda Sadıq Sadıqov kimi çox yaxşı prezidentimiz və güclü, əsl peşəkar kollektivimiz var idi. Bütün bunlar Premyer Liqada 3 çempionluq qazanmağımıza, 2 dəfə ölkə kubokuna yiyələnməyimizə və Avropa Liqasının qrupuna düşməyimizə kömək oldu. Xüsusən də, Avropa Liqasında oynamaq karyeramın ən yüksək zirvəsi idi. Halbuki Azərbaycana gedəndə bu həyəcanı yaşayacağımı heç gözləmirdim. Ümumiyyətlə, heç yerdə “Neftçi”dəki qədər titul qazanmadım. 

- “Qarabağ” son 8 ildə avrokubokların qrupunda çıxış edib. “Neftçi” forması altında “Qarabağ”la mübarizəni necə xatırlayırsınız? 

- “Qarabağ” həmişə əla rəqib olub. Bu komanda ilə yaxşı oyunlar keçirirdik. Amma həmin vaxt təkcə “Qarabağ” yox, başqa güclü rəqiblər də var idi. Çempionatda maraqlı, gərgin matçlarımız çox olurdu. 

- “Neftçi” azarkeşlərinin daim xoş anlarla xatırladığı tək-tük əcnəbi futbolçulardansınız. Özünüzü bu qədər sevdirməyin sirri nədir? 

- Azərbaycanda, “Neftçi”də çox xoşbəxt idim. Bütün varlığımı kluba həsr etmişdim, onun uğuru üçün əlimdən gələni edirdim. Düşünürəm ki, bu amillər azarkeşlərin yaddaşında qalmağımda rol oynayıb. Elə mən özüm də “Neftçi” fanatlarını unutmuram. Küçədə gəzməyə çıxdığım zaman azarkeşlərimizin mənə göstərdikləri dəstəkdən ötrü darıxmışam. 

- Azərbaycanda gördüyünüz ən güclü futbolçu və məşqçi kim idi? 

- Bir neçə mütəxəssisin rəhbərliyi altında çıxış etdim. Hər birinin məndə xüsusi yeri var. Ancaq ən yaxşı məşqçi kimi Qurban Qurbanovu göstərərdim. Hərçənd onun komandasında oynamamışam, həmişə rəqib olmuşuq. Komandasının göstərdiyi nəticələr də Qurbanovun savadından, gücündən xəbər verir. O ki qaldı ən yaxşı futbolçuya, yalnız birini fərqləndirməzdim. Həm komanda yoldaşlarım, həm də rəqib olduqlarım içində yüksək səviyyəli oyunçular çox idi. 

- Burada hansı müdafiəçiyə qarşı oynamaq sizə çətin idi? 

- Azərbaycanda fiziki güc və sürət ön planda olurdu. Fərdi driblinqlərə çox üstünlük verilmirdi. Bu üzdən komandalar rəqiblərin müdafiə xəttini daha çox ötürmələrlə keçməyə çalışırdılar. Müdafiəçilərdən Rəşad Sadıqovu fərqləndirərdim. Ona qarşı oynamaq, onu keçmək çətin olurdu. Çünki düzgün yer seçirdi, hücumçunun bir sonrakı hərəkətini “oxuya” bilirdi. 

- Hələ də əlaqədə olduğunuz kimlərsə var?

- Bəli, Azərbaycanda çox gözəl dostlar qazandım. Onlarla tez-tez danışıram - Sadiq, Əziz, Rasim, Vüsal. Hamısı üçün çox darıxıram. 

- “Neftçi” və ya Azərbaycanın hansısa başqa klubundan Braziliyadakı futbolçularla bağlı sizinlə əlaqə saxlayan, məsləhət alan olur? 

- Bu il “Neftçi”yə kömək olmaq üçün hər şeyi etdim. Kluba 20-dən çox futbolçunun adını göndərdim ki, baxıb qiymət versinlər. Ancaq mənə fikir vermədilər, digər menecerlər vasitəsilə başqa oyunçular seçdilər. Braziliyada gizli istedada malik çox oyunçu var ki, onları üzə çıxarmaq lazımdır. İstəsələr, onlara bu cür futbolçular qazandıra bilərəm.

Mənbə: sports.az