"Bəlkə Mbodju göndərib, onu saxlayaq?" - Samir Abasov

"Komandamı təbrik edirəm. Çətin səfər oyunundan qalibiyyətlə ayrıldıq. Kubok məğlubiyyətindən sonra qələbəyə ehtiyacımız var idi. Bu gün fiziki baxımdan mükəmməl formadayıq. Oyun nəzarətimiz altında idi. Gənc oyunçularımızı da təbrik edirəm. Ümumi ansambldan qopmadılar".

Qol.az xəbər verir ki, bu sözləri "Neftçi"nin baş məşqçisi Samir Abasov Azərbaycan Premyer Liqasının 25-ci turunda "Sumqayıt"a 2:0 hesabı ilə qalib gəldikləri oyundan sonra keçirilən mətbuat konfransında deyib.

"Bu gün "Neftçi"dən gözləntilər həddən artıq böyükdür. Bu komanda ilə ən yaxşısını eləmişik. Son vaxtlar "Neftçi"də bu qədər cavan futbolçu oynadan məşqçi olmamışdı. Bütün bunlar, xüsusən də, yaşlı oyunçularımızın əziyyətinin bəhrəsidir. Bugünkü reallıq budur ki, "Neftçi" çıxdığı oyunlarda mübarizə aparmalıydı. Əvvəllər müdafiədə çox səhvlər edirdik. Amma bu gün komanda şəklində bunlara imkan vermirik. Uğurlu seriyanı davam etdirməyə çalışacağıq. İndiki durumda 2-ci yeri tutmaq bizim üçün o qədər də pis deyil" - deyə o bildirib.

"Neftçi"nin baş məşqçisi bu gün müdafiənin mərkəzində oynayan Eddi İsrafilovun çıxışını belə dəyərləndirib: "Qınayırlar ki, niyə tez-tez sistem deyişir? İtkilərimiz var, bu gün cinah müdafiəçilərimiz yox idi. Nələrsə etməliydik və sistem dəyişdi. Nə üçün sistemi dəyişdiyimizi də soruşacaqlar. Bu gün məcburiyyətdən onu mərkəzdə oynatdıq və əla çıxış etdi. Bəlkə Mbodju göndərib, onu saxlayaq? (gülür)".

O, "Neftçi"dən ayrılan futbolçu Romen Baskın müsahibəsinə münasibət bildirib. Bask Abasovun onunla prinsip apardığını, ammma sonradan kluba qayıtmaq istədiyini söyləmişdi.

"Onun müsahibəsini oxudum, çox məyus oldum. Ona qarşı çox yaxşılıq elədik. Bask bu gün ardıcıl 3-4 oyun oynayacaqdı. Çünki Kane getmişdi. Sadəcə "Havr"dan kapitan kimi gəlmişdi. Tələsik qərar verdi. Bəlkə də burada dözə bilərdi. Çox yaxşı transferlərimizdən biri idi. Bundan sonra zəng edib-etməyəcəyimiz sonrakı söhbətdir. Amma mən onun komandamızda olmasını istərdim".

S.Abasov "Neftçi"də adətən tez-tez klub daxilində kimlərinsə arasında mübahisələr olduğunun yazılması ilə bağlı söyləyib: "Adətdir. Araşdırmaq lazımdır. Bizim komandada çaxnaşma salmağa çalışırlar. Vacib oyunlar qabağı komanda daxilində problemlərin olduğunu deyirlər. Gah Samir Brkiçi istəmir, gah Samir kimləsə mübahisə etdi, onu bəyənmir-filan. Klubda hər kəs əziyyət çəkir, hamının zəhməti var. Bu gün bu komanda çətin kubok oyunundan sonra Sumqayıt səfərinə gəlir. Həqiqətən, çox çətin idi.

Baş məşqçi yeni müqavilə ilə bağlı rəhbərlikdən ona təklif olub-olmadığı ilə əlaqədar sualı belə cavablandırıb: "Mənimlə müqavilə uzadılmadığı üçün kiməsə heç nə deyə bilmərəm. Deyə bilərəm ki, komanda çoxdan idi çempion olmurdu, mən etdim, kubokda final oynamırdılar, mən çıxardım. Uzadarlar, qalıb işləyərik".