“Elnur Məmmədovun bəhanə limiti dolanda “Neftçi”nin Müşahidə Şurası ayıldı”

ÖLKƏ FUTBOLU 18 May 2016 / 15:53 5305

- A +

“Neftçi”də bəzi adamlar Müşahidə Şurasının üzvlərinə yalnış məlumat veriblər, bəhanələr gətiriblər"

“Azərbaycan kubokunu finalında “Qarabağ” və “Neftçi”yə uğurlar arzu edirəm. "Neftçi" ötən mövsüm kubokun finalında "Qarabağ"a məğlub olmuşdu. Komanda finala revanş oyunu kimi çıxmalıdır. Klubun gənc futbolçuları göz qabağındadır. Bu futbolçuları illər boyu, pillə-pillə biz komanda üçün yetişdirib bu səviyəyə çatdırmışıq. Bu səbəbdən onların hər birinin potensialına bələdəm”.

Qol.az-ın müxbiri ilə söhbətində bu sözləri “Neftçi”nin sabiq-vitse prezidenti Tahr Süleymanov deyib. “Ağ-qaralar”ın hazırkı çıxışı haqda danışan T.Süleymanov Vəli Qasımovun baş məşqçi vəzifəsinə gəlişindən sonra komandada bir qədər irəliləyiş hiss olunduğunu söyləyib:

“Bu irəliləyişin kökündə isə Müşahidə Şurasının son qərarlarından biri durur. Yadınızdadırsa, idman direktoru Vəli Qasımovun və mətbuat xidmətinin birbaşa Müşahidə Şurasına tabe olmasıyla bağlı qərar qəbul edildi. Bu o deməkdir ki, Müşahidə Şurası dünənə qədər olub-bitənləri sadəcə müşahidə edirmiş. Bütün səlahiyyətlər isə icraçı direktor Elnur Məmmədovda olub”.

O qeyd edib ki, komandada uğursuz çıxış edəndə klubdakı bəzi adamlar müxtəlif bəhanələr gətiriblər: “Keçmişdən bəhanələr, gələcəkdən bəhanələr, futbolçu bəhanələri. Bəhanələrin limiti dolduqdan sonra isə artıq ayıldılar. Səhvləri daxildə axtardıqdan sonra "Neftçi" dirçəlməyə başladı. Hər zaman vurğulamışıq ki , "Neftçi"yə ikinci yer yaraşmaz. Amma "Neftçi" altıncı yerdədir. Çingiz Abdullayevin Müşahidə Şurasının sədri kimi təfəkkürü ilə komandanın indiki durumu bir-birinə tamamilə əksdir. Və gec-tez çıxış yolu tapılmalı idi. “Neftçi”də bəzi adamlar Müşahidə Şurasının üzvlərinə yalnış məlumat veriblər, bəhanələr gətiriblər. Amma ən sonda onların da limiti doldu. Bu vəziyyətdən çıxış kimi daxildə analiz edildi. Məncə, hələ ki, doğru analiz olunub. Biz bu mövsüm "Neftçi" klubunun adına yaraşmayan çıxışlar gördük”.

T.Süleymanov onu da deyib ki, yeni rəhbərliyin dövründə "Neftçi"də həddindən artıq uğursuz transfer siyasəti olub: “Komandanın adına yaraşmayan futbolçular gətirildi. "Neftçi"də hazırda elə futbolçular var ki, aylıq 20-25 min dollar pul alırlar. Bu səbəblər də bumeranq rolunu oynadı. Və komanda yeddinci pilləyə endi. Yeni mövsümdən legionerlərin hamısı dəyişilməli, komandaya Flavinyo, Almeyda, Reynaldo səviyyəli futbolçular cəlb edilməlidir. Bu halda onlar Avroliqanın qrup mərhələsi uğrunda mübarizə aparıla bilər. Vəli Qasımovun komandada qalmasının tərəfdarıyam, əcnəbinin gətiriməsinin isə əleyhinəyəm”.

Məftun RƏSULZADƏ

Daha çox