Zeynal Məmmədov: “İslahatlar dekabrda olacaq”

“Bakı” klubunun vitse-prezdenti Zeynal Məmmədovun Qol.Az saytına müsahibəsi

- Dünən daha iki klubumuz Avropa Liqasında mübarizəni dayandırdı. İlk öncə “İnter”in çıxışına toxunaq.

- Hər iki təmsilçimizin rəqibləri güclü idi.  Keçən dəfəki kimi bu dəfə də “İnter”in bəxti gətirmədi. Yenə penaltilər seriyasında məğlub oldular. Ancaq səfərdə də qol vuraraq, oyunu penaltilər seriyasına qədər uzatmaladı böyük şeydir. Yəni, bugün Azərbaycan klubları güclü rəqibləri ilə oyunda başabaş mübarizə aparırsa, bunun özü alqışa  layiqdir. Fikrimcə, klublarımız inkişaf  etməkdədir. Uğur qazanmaq vaxtımıza çox az qalıb. Hardasa, 2-3 ilə bu uğurları klublarımızdan gözləyə bilərik. Çünki yeni, istedadlı futbolçularımız yetişir.

- Bəs, “Xəzər Lənkəran”ın səfərdə “Lex” uduzmasını necə qarşıladınız?

- Məncə, “Xəzər Lənkəran” Polşada əlindən gələni etdi. Uduzsalar da, elə bir oyun nümayiş etdirdilər ki, Polşa futboluyla Azərbaycan futbolunun səviyyəsi heç fərqlənmədi. Eləcə də, “İnter”in Yunanıstan klubuna qarşı göstərdiyi oyunu da qeyd etmək olar. Belə bir rəqiblərlə oyunda məğlub olduqları üçün onları qınamağa dəyməz. Çünki həmin komandalar daha güclü idilər.

- “Neftçi”nin mərhələ adlaması barədə nə deyərdiniz?
 
- İstəyirəm ki, “Neftçi” Azərbaycanı uğurlu təmsil edən klub olsun. İnanıram ki, onlar ənı Avroliqanın qrup mərhələsinə düşəcəklər.  Onların uğur qazanması Azərbaycan futboluna reytinq xalları qazandıra bilər. 

- Klubunuzun yeni baş məşqçisi Bojidar Bondoviç haqda belə məlumatlar yayılıb ki, guya o, dələduzun biridir. Bu barədə nə deyə bilərsiniz?

- Mən belə şayiələrə fikir vermirəm. Kim nə deyir desin, kim nə yazır, özü bilər. Mən ancaq gördüyümə inanıram. Gəlin, gözləyək görək nə olur. Əgər doğrudan da belə bir insandırsa, bu, üzə çıxacaq. Ancaq necə deyərlər, yalanın ömrü 40 gün çəkər. “Bakı”nın nə qədər  baş məşqçisi olub ki, nə ediblərsə, üstü açılıb.  Mən fikirləşirəm ki, zamana ehtiyac var. Bir söz deyə bilmərəm.

- Klubunuzun üç futbolçusu - Elvin , Aqil və Növruz Məmmədovlar əsgərliyə gedib. Onların bundan sonrakı futbolçu taleyi necə olacaq?

- Elvin məsələsi çoxdan var idi. Sonra Aqillə Novruzun əsgərliyə getmək məsələsi qalxdı. Bilirsiniz, bu futbolçular həm “Bakı”nın, həm də milli komandanın əsas futbolçularıdır.  Mən belə fikirləşirəm ki, bu futbolçulara şərait yaratmaq lazımdır ki, formadan düşməsinlər. Onlara görə MOİK-ə müraciət etmişik. Görək necə olacaq. Çalışacağıq ki, ordu klubuna keçdikdən sonra onları icarəyə götürək. Ancaq yenə deyirəm, bu, bizdən asılı deyil. Bizim futbol akademiyamız var. Və hər bir 18 yaşı tamam olmuş futbolçu bu yolu keçməlidir. Ona görə də işlərimizi bu yöndə qurmağa çalışırıq. İstəyimiz odur ki, yerli gənc və istedadlı futbolçularımız itib-batmasınlar.

- Komandada islahatlar məsələsi nə yerdə qaldı? Demişdiniz ki, bir çox futbolçunu “Bakı”dan yola salacaqsınız.

- İslahatlarımızı dekabr ayına saxlamışıq. Həmin vaxta qədər kim özünü yaxşı tərəfdən göstərə bilməsə, onlarla yollarımızı ayıracağıq. Belə götürəndə, “Mura” Bolqarıstanın ÇSKA-nı da keçdi. Mən demişdim ki, Sloveniya klubu zəif deyil.  Əgər “Mura” bolqar klubunu da keçdisə, deməli biz də ÇSKA-nı çoxdan keçərdik. Lakin neyləmək olar ki, bu futboldur. Hər kəs yaxşı bilir ki, futbolda hər şey olur.

Əli HƏYATİ